Hiak swak thang rwe
Chongdip

Ish-Bosheth Athat Tamnu

Ish-Bosheth om babaan rwan kaithangnupa mi katei na lumik saanu kaan bi bating ria chung bi bweiluga athat sat rwe, atiga balu ding Hebron la kalwang khut rwe, haga ani Pa om takhum baannu gaye diga ringa. David na, kama Saul ding athat rwe diga rinnu manpa ding athat satnu, bani ding athat sat rwe. Balu ding Abner om kahannu riak bi thun thang rwe.

Bung 4.

Saul om sa kapaisa Ish-Bosheth na Abner Hebron bi thi rwe diga theinu kaan bi, maan basung katop rwe, khatle Israel pum kanuk rwe. Saul om sa kapaisa na babaan rwan kaithangnupa mi katei pat ni am ngaake: Benjamin om phum bi Beeroth rwan Rimmon om sa kapaisa rwan, Baanah le Rechab—balangbe Beeroth le Benjamin om naat diga sing chak thang nge, balangbe Beeroth rwanna Gittaim la pak thou drwe khatle inzaan tangga habei ga mi nun danga lung ong nge.

Saul om sa kapaisa Jonathan na baket pat ni ket lwamnu sa kapaisa khat am ngaake. Saul le Jonathan om cham ga Jezreel khouna hungnu kaan bi maan pat impaang ngaake; bating sian ngaaknu kamaisa na pak thou dam lang bating namluga, atiyeda maan pak khutnu kaan bi haga ta thangluga ket lwam rwe. Bameng ga Mephibosheth ngaake.

Beeroth rwan Rimmon om sa kapaisa rwan, Rechab le Baanah na, lumik saanu kaan bi Ish-Bosheth in bi hung rwe, maan chakrin karuk tanu dat pi basaknu kaan bi. Banina gehu lou lang danga in bazai bi se khut rwe, bating bon ding sun thangluga, khatle Rechab le banao Baanah na dwak ngaak rwe. Ish-Bosheth na bating ria in bi ria chung bi in ongnu kaan bi banina in bi hung drwe. Banina bating bweiluga athat sat rwe, balu ding tanchatluga lou thouluga, Arabah lampui la zingpha pum se ngaake. Banina Ish-Bosheth om lu ding Hebron bi David khou pwan hung rwe, khatle krwang khou rinne, “Phaang ngo, nang om ring zongnu nang om munanu Saul om sa kapaisa Ish-Bosheth om lu ding hei gaye. Inzaan ani Pa na Apukraangba krwang lang Saul le bakik taat chung bi takhum baan thang rwe.” a a v8 Mi athatnu rwanna bani om noh ding ani Pa chung bi tai thang nge, atiyeda Baom katak ga David khou pina hung nge, maanna bani ding baze maknu mi athat tamnu rwan diga chong sem thang nge.

Atiyeda David na Beeroth rwan Rimmon om sa kapaisa rwan, Rechab le banao Baanah khou katak rinne, “Ariangrek pum bina ei om ring ding ran swak thangnu ani Pa ga ringga ongme, haga batak takka, mi khatna akhou, ‘Phaang ngo, Saul thi rwe,’ diga rinnu kaan bi, maan cham bazaangnu pwan hung nge diga baningluga, eina Ziklag bi bating namluga athat sat rwe. Haba ga bating cham lang eina bating pi thangnu taswan ngaake! Sa maknu mi nunna ririak senu mi ding bahak in bi, bahak ria chung bi athat tamnu kaan bi, haga tatoga inku lianlune! Inzaan eina nani khouna bating thi man ding kalou thouluga, talei ram bina nani ding lou swak mak tabo? David na bating katang rwan khou katip thang rwe, khatle banina bani ding athat satluga bani kut le ket tanchatluga, Hebron bi tuikhun riak pi bapum ding kakhai thang rwe. Atiyeda Ish-Bosheth om lu ding Hebron bi Abner om thaan la kairi thang drwe.”