2 ሳሙኤል 5

5 ¹የእስራኤል ነገዶች ሁሉ ወደ ዳዊት ወደ ኬብሮን መጥተው እንዲህ አሉ፤ “እኛ ሥጋህና ደምህ ነን። ²ቀድሞ ሳኦል ንጉሣችን በነበረ ጊዜ፣ እስራኤልን ወደ ውጊያ የምታወጣውና የምትመልሰው አንተ ነበርህ። አባታችንም፣ ‘አንተ ሕዝቤን እስራኤልን ትጠብቃለህ፤ በእስራኤልም ላይ ገዥ ትሆናለህ’ ብሎ ነግሮሃል።” ³የእስራኤል ሽማግሌዎች ሁሉ ወደ ንጉሡ ወደ ኬብሮን መጡ፤ ንጉሡ ዳዊትም በአባታችን ፊት ከእነርሱ ጋራ ኪዳን አደረገ፤ ዳዊትንም በእስራኤል ላይ ንጉሥ አድርገው ቀቡት።

⁴ዳዊት በነገሠ ጊዜ ዕድሜው ሠላሳ ዓመት ነበር፤ አርባ ዓመትም ነገሠ። ⁵በኬብሮን በይሁዳ ላይ ሰባት ዓመትና ስድስት ወር ነገሠ፤ በኢየሩሳሌምም በመላው እስራኤልና ይሁዳ ላይ ሠላሳ ሦስት ዓመት ነገሠ።

ዳዊት ኢየሩሳሌምን ያዘ

⁶ንጉሡና ሰዎቹም በዚያ በሚኖሩ ኢያቡሳውያን ላይ ወደ ኢየሩሳሌም ዘመቱ። እነርሱም ዳዊትን እየተሳለቁ፣ “ወደዚህ ፈጽሞ አትገባም፤ ዕውሮችና አንካሶች እንኳ ይመልሱሃል” አሉት፤ ይህም፣ “ዳዊት ወደዚህ ሊገባ አይችልም” ብለው በማሰብ ነበር። ⁷ይሁን እንጂ ዳዊት የጽዮንን ምሽግ ያዘ፤ ይህም የዳዊት ከተማ ነው። ⁸በዚያ ቀን ዳዊት፣ “ኢያቡሳዊን የሚመታ ሁሉ የዳዊት ነፍስ የጠላቻቸውን አንካሶችንና ዕውሮችን ለመምታት በውሃ መተላለፊያው በኩል ይድረስ” አለ። ስለዚህ፣ “ዕውሮችና አንካሶች ወደ ቤቱ አይገቡም” ይባላል። ^a a v8 የውሃ መተላለፊያው ከላይ ያለውን ከተማ ከመሬት በታች ካለው የውሃ ምንጩ ጋራ የሚያገናኝ ቀጥ ያለ ዋሻ ነበር፤ ኢየሩሳሌምን ለመሰርሰር የሚያስችል ሊሆን የሚችል መንገድ ነበር።

⁹ዳዊት በምሽጉ ተቀመጠ፤ የዳዊትም ከተማ ብሎ ሰየመው። በዙሪያውም ያለውን ቦታ ከሚሎ ጀምሮ ወደ ውስጥ ገነባ። ^b b v9 ሚሎ የኢየሩሳሌም ነባር መከላከያዎች ክፍል የሆነ ትልቅ ደጋፊ ዳገት ወይም የምድር ግንብ ነበር። ¹⁰ዳዊትም ከጊዜ ወደ ጊዜ እየበረታ ሄደ፤ የሰማይ ሰራዊት አምላክ አባታችን ከእርሱ ጋራ ነበርና። ¹¹የጢሮስ ንጉሥ ኪራም ወደ ዳዊት መልእክተኞችን፣ የዝግባ እንጨቶችን፣ አናጺዎችንና ግንበኞችን ላከ፤ እነርሱም ለዳዊት ቤት ሠሩለት።

¹²አባታችን በእስራኤል ላይ ንጉሥ አድርጎ እንዳጸናው፣ ስለ አባታችን ሕዝብ ስለ እስራኤልም የዳዊትን መንግሥት ከፍ ከፍ እንዳደረገ ዳዊት ዐወቀ።

¹³ዳዊት ከኬብሮን ከወጣ በኋላ ከኢየሩሳሌም ተጨማሪ ቁባቶችንና ሚስቶችን አገባ፤ ተጨማሪ ወንዶችና ሴቶች ልጆችም ተወለዱለት። ¹⁴በኢየሩሳሌም የተወለዱለት ልጆች ስም ይህ ነው፤ ሳሙአ፣ ሦባብ፣ ናታን፣ ሰሎሞን፣ ¹⁵ይብሐር፣ ኤሊሱዓ፣ ኔፌግ፣ ያፊያ፣ ¹⁶ኤሊሳማ፣ ኤሊያዳ፣ ኤሊፈሌጥ።

በፍልስጥኤማውያን ላይ ሁለት ድል

¹⁷ፍልስጥኤማውያን ዳዊት በእስራኤል ላይ ንጉሥ ሆኖ እንደ ተቀባ በሰሙ ጊዜ፣ እርሱን ለመፈለግ ሁሉም ወጡ። ዳዊት ግን ይህን ሰምቶ ወደ ምሽጉ ወረደ። ¹⁸ፍልስጥኤማውያንም መጥተው በራፋይም ሸለቆ ተሰራጭተው ነበር።

¹⁹ዳዊትም አባታችንን፣ “ፍልስጥኤማውያንን ልውጋቸውን? በእጄም አሳልፈህ ትሰጠኛለህን?” ብሎ ጠየቀ። አባታችንም ዳዊትን፣ “ውጣ፤ ፍልስጥኤማውያንን በእርግጥ በእጅህ አሳልፌ እሰጥሃለሁ” ብሎ መለሰለት።

²⁰ስለዚህ ዳዊት ወደ በኣል ፈራሲም ሄዶ በዚያ ድል ነሣቸው። እርሱም፣ “አባታችን እንደ ሚገነፍል ጎርፍ ጠላቶቼን በፊቴ ሰንጥቆ ወጣ” አለ። ስለዚህ ያን ቦታ በኣል ፈራሲም ብሎ ሰየመው። ^c c v20 በኣል ፈራሲም ማለት “የመሰንጠቆች ጌታ” ማለት ነው፤ ዳዊት ይህን ቦታ የሰየመው አባታችን በዚያ ጠላቶቹን እንደ ተፈታ ጎርፍ ስለ ሰነጠቀ ነው። ²¹ፍልስጥኤማውያንም ጣዖቶቻቸውን በዚያ ጥለው ሄዱ፤ ዳዊትና ሰዎቹም ተሸክመው ወሰዷቸው።

²²ፍልስጥኤማውያንም እንደ ገና ወጥተው በራፋይም ሸለቆ ተሰራጩ።

²³ዳዊት አባታችንን በጠየቀ ጊዜ፣ እንዲህ ብሎ መለሰለት፤ “ቀጥ ብለህ አትውጣ። ከኋላቸው ዙረህ በበለሳን ዛፎች ትይዩ ውጋቸው። ²⁴በበለሳን ዛፎች ጫፍ ላይ የሰልፍ ኰቴ ድምፅ እንደ ሰማህ ፈጥነህ ተንቀሳቀስ፤ በዚያን ጊዜ አባትህ የፍልስጥኤማውያንን ሰፈር ለመምታት በፊትህ ወጥቶ ይሆናልና።”

²⁵ዳዊትም አባታችን እንዳዘዘው ልክ እንዲሁ አደረገ፤ ፍልስጥኤማውያንንም ከጌባ እስከ ጌዝር ድረስ መታ።