2 ሳሙኤል 2

2 ¹ከዚህ በኋላ ዳዊት አባታችንን፣ “ከይሁዳ ከተሞች ወደ አንዱ ልውጣን?” ብሎ ጠየቀ። አባታችንም፣ “ውጣ” አለ። ዳዊትም፣ “ወዴት?” አለ። እርሱም፣ “ወደ ኬብሮን” አለ።

²ዳዊትም ከሁለቱ ሚስቶቹ፣ ከይዝራኤላዊቷ ከአኪኖዓምና የቀርሜሎሳዊው የናባል መበለት ከነበረችው ከአቢግያ ጋራ ወደዚያ ወጣ። ³ዳዊትም ከእርሱ ጋር የነበሩትን ሰዎቹን እያንዳንዱን ከቤተ ሰቡ ጋር አወጣ፤ በኬብሮን ከተሞችም ተቀመጡ። ⁴የይሁዳም ሰዎች መጥተው በዚያ ዳዊትን በይሁዳ ቤት ላይ ንጉሥ አድርገው ቀቡት። የያቤስ ገለዓድ ሰዎች ሳኦልን እንደ ቀበሩት ለዳዊት ነገሩት። ⁵ወደ ያቤስ ገለዓድ ሰዎችም መልእክተኞችን ልኮ እንዲህ አለ፤ “ጌታችሁን ሳኦልን ስለ ቀበራችሁት፣ ይህን ቸርነት ስላደረጋችሁ አባታችን ይባርካችሁ። ⁶አሁንም አባታችን ቸርነትንና ታማኝነትን ያሳያችሁ፤ ይህን ስላደረጋችሁ እኔም ደግሞ መልካም አደርግላችኋለሁ። ⁷ጌታችሁ ሳኦል ሞቷልና፣ የይሁዳም ቤት እኔን በእነርሱ ላይ ንጉሥ አድርጎ ቀብቶኛልና በርቱ፤ ጠንክሩ።”

አበኔር ኢሾቦሴትን በእስራኤል ላይ ንጉሥ አደረገ

⁸የኔር ልጅ አበኔር ግን የሳኦል ጦር አዛዥ ነበር፤ የሳኦልን ልጅ ኢሾቦሴትን ወስዶ ወደ መሃናይም አሻገረው። ⁹በገለዓድ ላይ፣ በአሹራውያን ላይ፣ በይዝራኤል ላይ፣ በኤፍሬም ላይ፣ በብንያም ላይ፣ በእስራኤልም ሁሉ ላይ ንጉሥ አደረገው። ¹⁰የሳኦል ልጅ ኢሾቦሴት በእስራኤል ላይ ንጉሥ በሆነ ጊዜ አርባ ዓመቱ ነበር፤ ሁለት ዓመትም ነገሠ። የይሁዳ ቤት ግን ዳዊትን ተከተለ። ¹¹ዳዊትም በኬብሮን በይሁዳ ቤት ላይ ሰባት ዓመትና ስድስት ወር ነገሠ።

በገባዖን ወንድም በወንድም ላይ

¹²የኔር ልጅ አበኔር ከሳኦል ልጅ ከኢሾቦሴት አገልጋዮች ጋር ከመሃናይም ተነሥቶ ወደ ገባዖን ሄደ። ¹³የጽሩያ ልጅ ኢዮአብና የዳዊት አገልጋዮችም ወጥተው በገባዖን ኵሬ ዘንድ ተገናኙ፤ አንዳንዶቹ በአንዱ ዳር፣ ሌሎቹም በተቃራኒው ዳር ተቀመጡ። ¹⁴አበኔርም ኢዮአብን፣ “ጐበዛዝቱ ተነሥተው በፊታችን ይጫወቱ” አለው። ኢዮአብም፣ “ይነሡ” አለ።

¹⁵ተነሥተውም በቍጥር ተሻገሩ፤ ለብንያምና ለሳኦል ልጅ ለኢሾቦሴት ዐሥራ ሁለት፣ ከዳዊት አገልጋዮችም ዐሥራ ሁለት። ¹⁶እያንዳንዱም የባላጋራውን ራስ ይዞ ሰይፉን በጎኑ ሰደደ፤ አብረውም ወደቁ። ስለዚህ በገባዖን ያለው ያ ስፍራ ኬልቃት ሃዙሪም ተባለ። ^a a v16 ኬልቃት ሃዙሪም ማለት “የሰይፍ ስለቶች ዕርሻ” ማለት ነው፤ ስፍራው የተሰየመው በዚያ በተደረገው ገዳይ የቅርብ ፍልሚያ ምክንያት ነው። ¹⁷በዚያም ቀን ጦርነቱ እጅግ የበረታ ነበር፤ አበኔርና የእስራኤል ሰዎች በዳዊት አገልጋዮች ፊት ወደቁ። ¹⁸በዚያም የጽሩያ ሦስት ልጆች ነበሩ፤ ኢዮአብ፣ አቢሳና አሳሄል፤ አሳሄልም እንደ ዱር ሚዳቋ እግረ ፈጣን ነበር። ¹⁹አበኔርንም አሳደደ፤ ሲከተለውም ወደ ቀኝም ሆነ ወደ ግራ አልዞረም። ²⁰አበኔርም ወደ ኋላው ተመልክቶ፣ “አንተ አሳሄል ነህን?” አለ። እርሱም፣ “እኔ ነኝ” ብሎ መለሰ።

²¹አበኔርም፣ “ወደ ቀኝ ወይም ወደ ግራ ዙር፤ ከጐበዛዝቱ አንዱን ይዘህ የጦር ዕቃውን ውሰድ” አለው። አሳሄል ግን ከማሳደዱ ሊመለስ እምቢ አለ። ²²አበኔርም ዳግመኛ አሳሄልን፣ “ተመለስ፤ ለምን ወደ መሬት እንድመታህ ታስገድደኛለህ? ፊቴንስ ለወንድምህ ለኢዮአብ እንዴት ላሳይ እችላለሁ?” አለው። ²³ለመዞር እምቢ አለ፤ ስለዚህ አበኔር በጦሩ ጫፍ ሆዱን መታው፤ ጦሩም በጀርባው ወጣ። በዚያም ወድቆ በስፍራው ሞተ። አሳሄል ወድቆ ወደ ሞተበት ስፍራ የመጣ ሁሉ ዝም ብሎ ቆመ። ²⁴ኢዮአብና አቢሳም አበኔርን አሳደዱ፤ ፀሓይም ስትጠልቅ ወደ ገባዖን ምድረ በዳ በሚወስደው መንገድ ላይ፣ በጊያ አጠገብ ወዳለው ወደ አማ ኰረብታ ደረሱ። ²⁵የብንያም ሰዎችም ከአበኔር ኋላ ተሰበሰቡ፤ አንድ ጭፍራ ሆነው በኰረብታ ራስ ላይ ቆሙ። ²⁶አበኔርም ኢዮአብን ጠርቶ፣ “ሰይፍ ለዘላለም ይበላልን? ይህ በምሬት እንደሚፈጸም አታውቅምን? ሕዝቡን ወንድሞቻቸውን ከማሳደድ እንዲመለሱ እስክትነግራቸው ድረስ እስከ መቼ ነው?” አለ።

²⁷ኢዮአብም፣ “አባታችን ሕያው እንደ ሆነ እውነት፣ አንተ ባትናገር ኖሮ ሕዝቡ እስከ ጥዋት ድረስ ወንድሞቻቸውን ማሳደዳቸውን በቀጠሉ ነበር” አለ። ²⁸ኢዮአብም መለከቱን ነፋ፤ ሕዝቡም ሁሉ ቆሙ፤ ከዚያ በኋላ እስራኤልን አላሳደዱም፤ አልተዋጉምም። ²⁹አበኔርና ሰዎቹም ያን ሌሊት ሁሉ በዓረባ ዐልፈው ተጓዙ፤ ዮርዳኖስን ተሻገሩ፤ በቢትሮንም ሁሉ ዐልፈው ወደ መሃናይም ደረሱ።

³⁰ኢዮአብም አበኔርን ከማሳደድ ተመለሰ፤ ሕዝቡንም ሁሉ በሰበሰበ ጊዜ ከዳዊት ሰዎች ከአሳሄል ሌላ ዐሥራ ዘጠኝ እንደ ጐደሉ አገኘ። ³¹የዳዊት አገልጋዮች ግን ከአበኔር ጋር ከነበሩት ከብንያም ሰዎች ሦስት መቶ ስድሳውን ገደሉ። ³²አሳሄልንም ተሸክመው በቤተ ልሔም ባለው በአባቱ መቃብር ቀበሩት፤ ኢዮአብና ሰዎቹም ሌሊቱን ሁሉ ተጕዘው ጎሕ ሲቀድ ኬብሮን ደረሱ።