Kekiili Daudi Laitoryat eng' Judah
Koteebe Daudi Kwanda ole kwendi ak keyookto koba Hebron, ole koiili Judah ineendet laitoryat. Koiil Abner weeriitap Saulo parak eng' kaataam, ak kotuiyechigei koosyek aeng' eng' tamboiyotap Gibeon. Koegu perkeiyet koek koyeet, ak kobar Abner Asael tupchetap Joab ne labat, ago ma komachei.
Ng'alaali Kwandanyo eng' mustari 1
2 1Kingo keskei, koteebe Daudi Kwandanyo koleenji, “Atogosta koba nganaseet age eng' nganasoogap Judah?” Ki le Kwandanyo, “Togosta.” Ki le Daudi, “Ano?” Kole, “Hebron.”
2Ki togosta Daudi olooto kobooto osotikyik tuwai, Ainoam ne po Jezreel ak Abigail, osotyotap Nabal Karmelindet ne kigome. 3Ki togoste Daudi piikyik che ki mi kobooto ineendet, chii tugul kobooto kaanyi, ak ki menye nganasoogap Hebron. 4Yeityo kobwa murenigap Judah ak koiil Daudi laitoryat eng' kap Judah olooto. Ki mwachi Daudi keleenji ki kotup piigap Jabes-gilead Saulo. 5Ki iyookto piik che iyooktoi ole mi murenigap Jabes-gilead, koleenji, “Ingoberuurok Kwandanyo agobo kiit ne myee ne ki oyai kiptaiyandeng'wong' Saulo, otup ineendet. 6Nguno ingogoochi Kwandanyo okweek kiy ne myee ak imanda; anee agine ayaiywok ne myee amu oyai niito. 7Onyiganitu ak oigimitkei, amu kogome kiptaiyandeng'wong' Saulo, ak koiil kap Judah anee agine laitoryat eng' icheek.”
Kokiil Abner Ishbosheth Laitoryat eng' Israel
8Ago ki nam Abner weeriitap Ner, kiptaiyatap lugeetap Saulo, Ishbosheth weeriitap Saulo, ak koip ineendet koba Mahanaim. 9Ki kiil ineendet laitoryat eng' Gilead, ak eng' Ashurik, ak eng' Jezreel, ak eng' Ephraim, ak eng' Benjamin, ak eng' Israel tugul. 10Ki tinye Ishbosheth weeriitap Saulo kenyiisyek artam ye kingo ek laitoryat eng' Israel; ki laitoryat kenyiisyek aeng'. Ago ki sup kap Judah Daudi. 11Ki laitoryat Daudi eng' Hebron eng' kap Judah kenyiisyek tisap ak arawek lo.
Kobargei Tupcho ak Tupcho eng' Gibeon
12Ki ng'eet Abner weeriitap Ner, kobooto otwogigap Ishbosheth weeriitap Saulo, koba Gibeon kobun Mahanaim. 13Ki manda agine Joab weeriitap Zeruiah ak otwogigap Daudi ak kotuiyo icheek togeet eng' poldetap Gibeon; kotebi alak eng' ngeguut age, ak alak eng' ngeguut age. 14Ki leenji Abner Joab, “Ingong'eet murenik ak kobargei eng' tainnyo.” Ki le Joab, “Ingong'eet.”
15Ki ng'eetyo ak kolanda eng' koito, taman ak aeng' che po Benjamin ak Ishbosheth weeriitap Saulo, ak taman ak aeng' che po otwogigap Daudi. 16Ki nam chii tugul metitap puunyi ak kotoor rotwennyi eng' tereennyi, ak ki putyi togeennyi. Ki guure anyun yooto eng' Gibeon Helkat-hasurim. a a v16 Helkat-hasurim koere “mbareetap kutitap rotwek” — ki kiguure olooto agobo lugeet ne po meet ne ki kiyai eng' eunek eng' olooto. 17Ki piit lugeet ne koroom miising' peetuunooto; ki putyi Abner ak murenigap Israel eng' taitap otwogigap Daudi. 18Ki mi olooto weeriigap Zeruiah somok: Joab, Abisai ak Asahel; ko ki labat Asahel ko uu kenyeleet ne po timiin. 19Ki oone Abner, ak ma mastoi eutap tai anan murot kaataam ye koonei ineendet. 20Ki eeng'u let Abner ak kole, “Inyee ni, Asahel?” Kowol kole, “Anee.”
21Ki leenji Abner, “Weektagei eutap tai anan kaataam, inam age eng' murenik, ak iip kariikyik.” Ago ki ma chamei Asahel koeesyo koonei ineendet. 22Ki leenji Abner Asahel kogeny, “Weektagei. Amu nee si isubwo abariin? Amuuch ano keer taitap tupcheng'ung' Joab?” 23Ki ma chamei koweektagei, kotoor anyun Abner moennyi eng' let ng'otit, ak kinyoor eng' meegunyi; ki putyi olooto ak kome eng' olooto. Ak ki tonone chii tugul ne ki it ole ki putyi Asahel ak kome. 24Ki oone Joab ak Abisai Abner; ye karorokto asiista ki it tulweetap Amah, ne neegit Gia eng' ooreet ne iwendi surkwenitap Gibeon. 25Ki yumgei murenigap Benjamin kosubu Abner, koek kweanet agenge, ak kotonon paragutap tulweet. 26Ki guurchi Abner Joab, koleenji, “Tos amei rotweet koigeny? Mo ingen ile niito kogesugei ng'wanindo? Koa sait ata agoi imwachi piik koweektagei kometaa koonei tupchosyekwak?”
27Ki le Joab, “Ko iman kole sabei Kwandanyo, ngot mo ki ing'alaal inyee, ko ki testai piik koonei tupchosyekwak agoi mornet.” 28Ki kuut Joab iryageet; ak ki week piik tugul kobagaakta, ma koonei kogeny Israel anan kobargei. 29Ki panda Abner ak piikyik Arabah kemoi komugul, ak kolanda Jordan, ak kobata Bithron tugul, ak koit Mahanaim.
30Ki weektagei Joab mata koosup Abner, ak koyum piik tugul, ak konyoor ki pet piigap Daudi taman ak sogool, kobatee Asahel. 31Ago ki bar otwogigap Daudi murenigap Benjamin pogol somok ak konom ak taman, che ki mi kobooto Abner. 32Ki ip Asahel, ak kotupchi kereritap kwandanyi eng' Bethlehem; ki panda Joab ak piikyik kemoi komugul, ak koit Hebron eng' karon.