2ይ ሳሙኤል 2 FHB Father's Heart Bible™

2 ¹ድሕሪዙይ ዳዊት ንኣቦና “ናብ ሓንቲ ኻብ ከተማታት ይሁዳዶ ክድይብ?” ኢሉ ጠየቐ። ኣቦና ድማ “ደይብ” በሎ። ዳዊት ከዓ “ናበይ?” በለ። ንሱ ኸዓ “ናብ ኬብሮን” በሎ።

²ዳዊት ድማ ምስ ክልቲአን ኣንስቱ፥ ምስ ኣሒኖዓም በዓልቲ ኢይዝራኤልን ኣቢግያ መበለት ናባል በዓል ቀርሜሎስን ናብኡ ደየበ። ³ዳዊት ድማ ነቶም ምስኡ ዝነበሩ ሰቡ፥ ነፍሲ ወከፍ ምስ ስድራ ቤቱ ኣደየቦም፤ ኣብ ከተማታት ኬብሮን ድማ ሰፈሩ። ⁴ሽዑ ሰብ ይሁዳ መፂኦም ንዳዊት ኣብኡ ኣብ ልዕሊ ቤት ይሁዳ ንጉስ ገይሮም ቀብእዎ። እቶም ሰብ ኢያቢስ ገለዓድ ንሳኦል ከም ዝቐበርዎ ድማ ንዳዊት ነገርዎ። ⁵ናብቶም ሰብ ኢያቢስ ገለዓድ ድማ ልኡኻት ልኢኹ ከምዙይ በሎም፦ “ንጐይታኹም ሳኦል ቀቢርኩም ነዝ ሰናይ ገይርኩምዎ ኢኹም እሞ፥ ኣቦና ይባርኽኩም። ⁶ሕዚ ኸዓ ኣቦና ሕያዋይነትን ሓቅን ይግበረልኩም፤ ነዙይ ስለ ዝገበርኩም ኣነውን ሰናይ ክገብረልኩም እየ። ⁷ፅንዑ፥ ኣትብዑ፤ ጐይታኹም ሳኦል ሞይቱ እዩ እሞ፤ ቤት ይሁዳውን ኣብ ልዕሊኦም ንጉስ ገይሮም ቀብኡኒ።”

ኣበኔር ንኢያቡስቴ ኣብ ልዕሊ እስራኤል ንጉስ ገበሮ

⁸እቲ ሓለቓ ሰራዊት ሳኦል ዝነበረ ኣበኔር ወዲ ኔር ግና፥ ንኢያቡስቴ ወዲ ሳኦል ሒዙ ናብ ማሓናይም ኣሳገሮ። ⁹ኣብ ልዕሊ ገለዓድ፥ ኣብ ልዕሊ ኣሹራውያን፥ ኣብ ልዕሊ ኢይዝራኤል፥ ኣብ ልዕሊ ኤፍሬም፥ ኣብ ልዕሊ ብንያም፥ ኣብ ልዕሊ ኵሉ እስራኤል ድማ ንጉስ ገበሮ። ¹⁰ኢያቡስቴ ወዲ ሳኦል ኣብ እስራኤል ንጉስ ምስ ኮነ፥ ወዲ ኣርብዓ ዓመት ነበረ፤ ክልተ ዓመት ድማ ነገሰ። እቶም ቤት ይሁዳ ግና ንዳዊት ሰዓብዎ። ¹¹ዳዊት ኣብ ኬብሮን ኣብ ልዕሊ ቤት ይሁዳ ሸውዓተ ዓመትን ሽዱሽተ ወርሕን ንጉስ ኮይኑ ነገሰ።

ኣብ ገባዖን ሓው ኣንፃር ሓው

¹²ኣበኔር ወዲ ኔር ምስ ኣገልገልቲ ኢያቡስቴ ወዲ ሳኦል ካብ ማሓናይም ናብ ገባዖን ወፁ። ¹³ኢዮኣብ ወዲ ፅሩያን ኣገልገልቲ ዳዊትን ድማ ወፂኦም ኣብ ጥቓ ቓላይ ገባዖን ተራኸቡ፤ እቶም ሓደ ኣብ ሓደ ገምገም፥ እቶም ካልኦት ድማ ኣብቲ ኻልእ ገምገም ኮፍ በሉ። ¹⁴ኣበኔር ድማ ንኢዮኣብ “እዞም መንእሰያት ተሲኦም ኣብ ቅድሜና ይተፃወቱ” በሎ። ኢዮኣብ ከዓ “ይተስኡ” በለ።

¹⁵ተሲኦም ድማ ብቑፅሪ ተሳገሩ፤ ዓሰርተ ኽልተ ንብንያምን ንኢያቡስቴ ወዲ ሳኦልን፥ ዓሰርተ ኽልተ ኸዓ ካብ ኣገልገልቲ ዳዊት። ¹⁶ነፍሲ ወከፍ ድማ ርእሲ መቃልሱ ሒዙ ሰይፉ ኣብ ጎኑ ኣእተወ፤ ብሓደ ኸዓ ወደቑ። ስለዙይ እታ ኣብ ገባዖን ዘላ ቦታ “ሔልቃት ሃዙሪም” ተባህለት። ^a a v16 ሔልቃት ሃዙሪም ማለት “ግራት ኣፋት ሰይፊ” ማለት እዩ፤ እታ ቦታ በቲ ኣብኡ ዝተገብረ ቐታሊ ኢድ ንኢድ ውግእ ተሰምየት። ¹⁷በታ መዓልቲ እቲኣ ዝነበረ ውግእ ከዓ የመና ብርቱዕ ነበረ፤ ኣበኔርን ሰብ እስራኤልን ድማ ኣብ ቅድሚ ኣገልገልቲ ዳዊት ወደቑ። ¹⁸ሰለስተ ደቂ ፅሩያ ድማ ኣብኡ ነበሩ፦ ኢዮኣብን ኣቢሳይን ኣሳሄልን። ኣሳሄል ከዓ ኣእጋሩ ኸም ሰስሓ በረኻ ቅልጡፍ ነበረ። ¹⁹ንኣበኔር ድማ ሰዓቦ፤ እናሰጐጎ ኸዓ ንየማን ኮነ ንፀጋም ኣይተገላገሰን። ²⁰ኣበኔር ድማ ንድሕሪት ግልፅ ኢሉ “ንስኻዶ ኢኻ ኣሳሄል?” በለ። ንሱ ኸዓ “እወ ኣነ እየ” ኢሉ መለሰ።

²¹ኣበኔር ድማ “ንየማን ወይ ንፀጋም ተገላገስ፤ ካብቶም መንእሰያት ሓደ ሒዝካ ኣፅዋሩ ውሰድ” በሎ። ኣሳሄል ግና ንኣበኔር ካብ ምስዓብ ክቋርፅ ኣበየ። ²²ኣበኔር ድማ መሊሱ ንኣሳሄል “ተመለስ፤ ስለ ምንታይ ክወቕዓካ ተገድደኒ ኣለኻ? ገፅ ሓውካ ኢዮኣብ ደኣ ኸመይ ገይረ ክርኢ?” በሎ። ²³ክግልስ ድማ ኣበየ፤ ስለዙይ ኣበኔር በቲ ድሕረዋይ ኲናቱ ኣብ ከብዱ ወግኦ፤ ካብ ሕቘኡ ኸዓ ወፀ። ኣብኡ ድማ ወዲቑ ኣብታ ቦታ ሞተ። ነፍሲ ወከፍ ናብቲ ኣሳሄል ወዲቑ ዝሞተ ቦታ ዝመፀ ኸዓ ደው በለ። ²⁴ኢዮኣብን ኣቢሳይን ድማ ንኣበኔር ሰዓብዎ፤ ፀሓይ ክትዓርብ እንተላ ኸዓ ኣብ መንገዲ ምድረ በዳ ገባዖን ኣብ ጥቓ ጊያሕ ናብ ዘሎ ዀረብታ ኣማ በፅሑ። ²⁵ደቂ ብንያም ድማ ደድሕሪ ኣበኔር ተኣኪቦም ሓደ ጉጅለ ኾኑ፤ ኣብ ርእሲ ሓደ ዀረብታ ኸዓ ደው በሉ። ²⁶ኣበኔር ድማ ንኢዮኣብ ፀዊዑ “ሰይፊ ንዘለኣለምዶ ክበልዕ እዩ? እዙይ ኣብ መወዳእታኡ መሪር ከም ዝኸውንዶ ኣይትፈልጥን ኢኻ? ነቲ ህዝቢ ኻብ ምስዓብ ኣሕዋቶም ክምለሱ ክሳዕ መዓዝ ኢኻ ዘይትእዝዞም?” በሎ።

²⁷ኢዮኣብ ድማ “ኣቦና ህያው እዩ፥ ንስኻ እንተ ዘይትዛረብ ነይርካ፥ እቲ ህዝቢ ኽሳዕ ንግሆ ንኣሕዋቶም ምሰጐጕዎም ነይሩ” በለ። ²⁸ኢዮኣብ ድማ መለኸት ነፍሐ፤ ኵሉ እቲ ሰራዊት ከዓ ደው በለ፤ ድሕሪዙይ ንእስራኤል ኣይሰጐጉን ኣይተዋግኡን። ²⁹ኣበኔርን ሰቡን ድማ በታ ለይቲ እቲኣ ብዅላ ዓረባ ኸዱ፤ ዮርዳኖስ ተሳጊሮም ብዅሉ ቢትሮን ሓሊፎም ናብ ማሓናይም በፅሑ።

³⁰ኢዮኣብ ድማ ካብ ምስዓብ ኣበኔር ተመሊሱ ንዅሉ እቲ ሰራዊት ኣከቦ፤ ብዘይ ኣሳሄል ከዓ ካብ ሰብ ዳዊት ዓሰርተ ትሽዓተ ሰብኣይ ከም ዝጐደሉ ረኸበ። ³¹ኣገልገልቲ ዳዊት ግና ካብ ደቂ ብንያም እቶም ምስ ኣበኔር ዝነበሩ ሰለስተ ሚእትን ስሳን ወቕዑ። ³²ንኣሳሄል ድማ ኣልዒሎም ኣብ መቓብር ኣቦኡ ኣብ ቤተልሔም ቀበርዎ፤ ኢዮኣብን ሰቡን ከዓ ለይቲ ምሉእ ተጓዒዞም ጎሕ ምስ ቀደደ ናብ ኬብሮን በፅሑ።