ଦାଉଦଙ୍କ ବଂଶ ଅଧିକ ବଳବାନ ହୁଅନ୍ତି

ଶାଉଲଙ୍କ ବଂଶ ଦୁର୍ବଳ ହେବା ବେଳେ, ଅବ୍‌ନେର ଏକ ଉପପତ୍ନୀ ବିଷୟରେ ଅଭିଯୁକ୍ତ ହୁଅନ୍ତି, ଆମ୍ଭମାନଙ୍କ ପିତା ଯେଉଁ ରାଜ୍ୟ ବିଷୟରେ ଶପଥ କରିଥିଲେ ତାହା ଦାଉଦଙ୍କୁ ସମର୍ପଣ କରିବାକୁ ତାହାଙ୍କ ପକ୍ଷକୁ ଆସନ୍ତି, ଏବଂ ଇସ୍ରାଏଲକୁ ସାଙ୍ଗରେ ଆଣନ୍ତି। ଅସାହେଲର ପ୍ରତିଶୋଧ ନେଇ ଯୋୟାବ ଫାଟକରେ ଅବ୍‌ନେରଙ୍କୁ ହତ୍ୟା କରେ। ଦାଉଦ ଶବଖଟ ପଛରେ ଚାଲନ୍ତି, ଉପବାସ କରନ୍ତି, ଏବଂ ଶୋକ କରନ୍ତି ଯେପରି ସମସ୍ତେ ଜାଣନ୍ତି ଯେ ଏଥିରେ ତାହାଙ୍କର କୌଣସି ଭାଗ ନ ଥିଲା।

ଅଧ୍ୟାୟ 3।

ଶାଉଲଙ୍କ ବଂଶ ଓ ଦାଉଦଙ୍କ ବଂଶ ମଧ୍ୟରେ ଯୁଦ୍ଧ ବହୁକାଳ ପର୍ଯ୍ୟନ୍ତ ଚାଲିଲା। ଦାଉଦ କ୍ରମଶଃ ଅଧିକ ବଳବାନ ହେଲେ, ମାତ୍ର ଶାଉଲଙ୍କ ବଂଶ କ୍ରମଶଃ ଅଧିକ ଦୁର୍ବଳ ହେଲା। ହିବ୍ରୋଣରେ ଦାଉଦଙ୍କ ପୁତ୍ରମାନେ ଜନ୍ମ ହେଲେ। ତାହାଙ୍କ ପ୍ରଥମଜାତ ପୁତ୍ର ଅମ୍ନୋନ ଥିଲା, ଯାହାର ମାତା ଯିଷ୍ରିୟେଲୀୟା ଅହୀନୋୟମ ଥିଲା; ତାହାଙ୍କ ଦ୍ଵିତୀୟ ପୁତ୍ର କିଲୀୟବ, କର୍ମିଲୀୟ ନାବଲର ବିଧବା ଅବୀଗଲ ଗର୍ଭଜାତ; ତୃତୀୟ ପୁତ୍ର ଅବଶାଲୋମ, ଗଶୂରର ରାଜା ତଲ୍ମୟର କନ୍ୟା ମାଖାର ପୁତ୍ର; ଚତୁର୍ଥ ପୁତ୍ର ହଗୀତର ପୁତ୍ର ଅଦୋନୀୟ; ପଞ୍ଚମ ପୁତ୍ର ଅବୀଟଲର ପୁତ୍ର ଶଫଟୀୟ; ପୁଣି ଷଷ୍ଠ ପୁତ୍ର ଯିତ୍ରିୟମ, ଦାଉଦଙ୍କ ଭାର୍ଯ୍ୟା ଇଗ୍ଲା ଗର୍ଭଜାତ। ଏମାନେ ହିବ୍ରୋଣରେ ଦାଉଦଙ୍କ ଜନ୍ମିତ ପୁତ୍ର ଥିଲେ।

ଅବନର ଦାଉଦଙ୍କ ସହିତ ଯୋଗ ଦିଅନ୍ତି

ଶାଉଲଙ୍କ ବଂଶ ଓ ଦାଉଦଙ୍କ ବଂଶ ମଧ୍ୟରେ ଯୁଦ୍ଧ ଚାଲିଥିବା ସମୟରେ ଅବନର ଶାଉଲଙ୍କ ବଂଶରେ ଆପଣାକୁ ଅଧିକ ବଳବାନ କରୁଥିଲେ। ଶାଉଲଙ୍କର ରିସ୍ପା ନାମ୍ନୀ ଏକ ଉପପତ୍ନୀ ଥିଲା, ସେ ଅୟାର କନ୍ୟା ଥିଲା। ଈଶ୍‌ବୋଶତ ଅବନରଙ୍କୁ କହିଲା, “ତୁମ୍ଭେ କାହିଁକି ମୋʼ ପିତାଙ୍କ ଉପପତ୍ନୀ ସହିତ ଶୟନ କଲ?”

ଅବନର ଈଶ୍‌ବୋଶତର ବାକ୍ୟରେ ଅତ୍ୟନ୍ତ କ୍ରୋଧିତ ହୋଇ କହିଲେ, “ମୁଁ କି ଯିହୁଦା ପ୍ରତି ବିଶ୍ଵସ୍ତ କୁକୁରର ମସ୍ତକ? ଆଜି ମୁଁ ତୁମ୍ଭ ପିତା ଶାଉଲଙ୍କ ବଂଶ ପ୍ରତି, ତାହାଙ୍କ ଭ୍ରାତୃଗଣ ଓ ବନ୍ଧୁଗଣ ପ୍ରତି ବିଶ୍ଵସ୍ତତା ଦେଖାଉଅଛି, ପୁଣି ତୁମ୍ଭକୁ ଦାଉଦଙ୍କ ହସ୍ତରେ ସମର୍ପଣ କରି ନାହିଁ। ତଥାପି ଆଜି ତୁମ୍ଭେ ଏହି ସ୍ତ୍ରୀ ବିଷୟରେ ମୋତେ ଦୋଷ ଦେଉଅଛ! ^a ଆମ୍ଭମାନଙ୍କ ପିତା ଦାଉଦଙ୍କ ପ୍ରତି ଯାହା ଶପଥ କରିଅଛନ୍ତି, ତାହା ଯଦି ମୁଁ ତାହାଙ୍କ ନିମନ୍ତେ ନ କରେ, ତେବେ ପିତା ଅବନରକୁ ତଦନୁରୂପ, ବରଂ ତହିଁରୁ ଅଧିକ ଦଣ୍ଡ ଦେଉନ୍ତୁ, ଅର୍ଥାତ୍‍ ରାଜ୍ୟକୁ ଶାଉଲଙ୍କ ବଂଶରୁ ଅପସାରିତ କରିବା, ପୁଣି ଦାନଠାରୁ ବେର୍‌ଶେବା ପର୍ଯ୍ୟନ୍ତ ଇସ୍ରାଏଲ ଓ ଯିହୁଦା ଉପରେ ଦାଉଦଙ୍କ ସିଂହାସନ ସ୍ଥାପନ କରିବା ନିମନ୍ତେ ଯାହା ଶପଥ କରିଅଛନ୍ତି।”

ଆଉ ଈଶ୍‌ବୋଶତ ଅବନରଙ୍କୁ ଆଉ ଗୋଟିଏ କଥା କହି ପାରିଲା ନାହିଁ, କାରଣ ସେ ତାହାଙ୍କୁ ଭୟ କରୁଥିଲା।

ଅବନର ଆପଣା ପକ୍ଷରୁ ଦାଉଦଙ୍କ ନିକଟକୁ ଦୂତ ପଠାଇ କହିଲେ, “ଏ ଦେଶ କାହାର? ମୋʼ ସହିତ ଆପଣଙ୍କ ନିୟମ ସ୍ଥାପନ କରନ୍ତୁ, ଆଉ ଦେଖନ୍ତୁ, ସମଗ୍ର ଇସ୍ରାଏଲକୁ ଆପଣଙ୍କ ପକ୍ଷକୁ ଆଣିବା ନିମନ୍ତେ ମୋହର ହସ୍ତ ଆପଣଙ୍କ ସଙ୍ଗରେ ରହିବ।”

ଦାଉଦ କହିଲେ, “ଭଲ; ମୁଁ ତୁମ୍ଭ ସହିତ ନିୟମ କରିବି। ମାତ୍ର ମୁଁ ତୁମ୍ଭଠାରୁ ଗୋଟିଏ କଥା ଦାବି କରୁଅଛି: ତୁମ୍ଭେ ଯେତେବେଳେ ମୋʼ ମୁଖ ଦର୍ଶନ କରିବାକୁ ଆସିବ, ତୁମ୍ଭେ ପ୍ରଥମେ ଶାଉଲଙ୍କ କନ୍ୟା ମୀଖଲକୁ ନ ଆଣିଲେ ମୋʼ ମୁଖ ଦେଖିବ ନାହିଁ।” ଆଉ ଦାଉଦ ଶାଉଲଙ୍କ ପୁତ୍ର ଈଶ୍‌ବୋଶତ ନିକଟକୁ ଦୂତ ପଠାଇ କହିଲେ, “ମୁଁ ଯାହାଙ୍କୁ ଏକ ଶହ ପଲେଷ୍ଟୀୟ ପୁରୁଷର ଲିଙ୍ଗାଗ୍ରଚର୍ମ ଦ୍ଵାରା ବିବାହ ନିମନ୍ତେ ବାଗ୍‌ଦାନ କରିଥିଲି, ମୋହର ସେହି ଭାର୍ଯ୍ୟା ମୀଖଲକୁ ମୋତେ ଦିଅ।”

ଏଣୁ ଈଶ୍‌ବୋଶତ ଲୋକ ପଠାଇ ତାହାର ସ୍ଵାମୀ ଲୟିଶର ପୁତ୍ର ପଲ୍‌ଟୀୟେଲଠାରୁ ତାହାକୁ ନେଇଗଲା। ଆଉ ତାହାର ସ୍ଵାମୀ କ୍ରନ୍ଦନ କରୁ କରୁ ବହୁରୀମ ପର୍ଯ୍ୟନ୍ତ ତାହା ପଛେ ପଛେ ଯାଇ ତାହା ସଙ୍ଗରେ ଗଲା। ସେତେବେଳେ ଅବନର ତାହାକୁ କହିଲେ, “ଫେରିଯାଅ।” ତହିଁରେ ସେ ଫେରିଗଲା।

ଏଥିଉତ୍ତାରେ ଅବନର ଇସ୍ରାଏଲର ପ୍ରାଚୀନବର୍ଗଙ୍କ ସହିତ କଥାବାର୍ତ୍ତା କରି କହିଲେ, “ଦାଉଦ ଯେପରି ତୁମ୍ଭମାନଙ୍କ ଉପରେ ରାଜା ହୁଅନ୍ତି, ଏହା ତୁମ୍ଭେମାନେ ବହୁ କାଳରୁ ଇଚ୍ଛା କରୁଅଛ। ଏବେ ତାହା କର, କାରଣ ଆମ୍ଭମାନଙ୍କ ପିତା ଦାଉଦଙ୍କ ବିଷୟରେ ପ୍ରତିଜ୍ଞା କରିଅଛନ୍ତି, ‘ଆମ୍ଭେ ଆପଣା ଦାସ ଦାଉଦର ହସ୍ତ ଦ୍ଵାରା ଆପଣା ଲୋକ ଇସ୍ରାଏଲକୁ ପଲେଷ୍ଟୀୟମାନଙ୍କ ହସ୍ତରୁ ଓ ସେମାନଙ୍କର ସମସ୍ତ ଶତ୍ରୁ ହସ୍ତରୁ ଉଦ୍ଧାର କରିବା।’”

ଆଉ ଅବନର ବିନ୍ୟାମୀନଙ୍କୁ ମଧ୍ୟ କଥା କହିଲେ; ପୁଣି ଇସ୍ରାଏଲ ଓ ବିନ୍ୟାମୀନର ସମଗ୍ର ବଂଶ ଯାହା କରିବାକୁ ସମ୍ମତ ହୋଇଥିଲେ, ତାହାସବୁ ଦାଉଦଙ୍କୁ ଜଣାଇବା ପାଇଁ ଅବନର ହିବ୍ରୋଣକୁ ଗଲେ। ଏହିରୂପେ ଅବନର କୋଡ଼ିଏ ଜଣ ଲୋକ ସଙ୍ଗରେ ଘେନି ହିବ୍ରୋଣକୁ ଦାଉଦଙ୍କ ନିକଟକୁ ଆସନ୍ତେ, ଦାଉଦ ଅବନରଙ୍କ ଓ ତାହାଙ୍କ ସଙ୍ଗୀ ଲୋକମାନଙ୍କ ନିମନ୍ତେ ଭୋଜ ପ୍ରସ୍ତୁତ କଲେ। ଆଉ ଅବନର ଦାଉଦଙ୍କୁ କହିଲେ, “ମୁଁ ଉଠି ଯାଇ ମୋʼ ପ୍ରଭୁ ମହାରାଜଙ୍କ ନିକଟକୁ ସମଗ୍ର ଇସ୍ରାଏଲକୁ ଏକତ୍ର କରିବି, ଯେପରି ସେମାନେ ଆପଣଙ୍କ ସହିତ ନିୟମ କରିବେ, ଆଉ ଆପଣଙ୍କ ପ୍ରାଣ ଯାହା ଇଚ୍ଛା କରେ, ସେହି ସମସ୍ତ ଉପରେ ଆପଣ ରାଜତ୍ଵ କରିବେ।” ତହିଁରେ ଦାଉଦ ଅବନରଙ୍କୁ ବିଦାୟ କଲେ, ପୁଣି ସେ କୁଶଳରେ ଚାଲିଗଲେ।

ଯୋୟାବ ଅବନରଙ୍କୁ ହତ୍ୟା କରନ୍ତି

ଆଉ ଦେଖ, ସେହିକ୍ଷଣି ଦାଉଦଙ୍କ ଦାସମାନେ ଓ ଯୋୟାବ ଏକ ଲୁଟ୍‌ପାଟରୁ ପ୍ରଚୁର ଲୁଟ୍‌ଦ୍ରବ୍ୟ ସଙ୍ଗରେ ଘେନି ଫେରିଆସିଲେ। ମାତ୍ର ଅବନର ହିବ୍ରୋଣରେ ଦାଉଦଙ୍କ ସଙ୍ଗରେ ନ ଥିଲେ, କାରଣ ଦାଉଦ ତାହାଙ୍କୁ ବିଦାୟ କରିଥିଲେ, ପୁଣି ସେ କୁଶଳରେ ଯାଇଥିଲେ। ଯେତେବେଳେ ଯୋୟାବ ଓ ତାହାର ସମସ୍ତ ସୈନ୍ୟ ଉପସ୍ଥିତ ହେଲେ, ସେତେବେଳେ ଲୋକମାନେ ଯୋୟାବକୁ ଜଣାଇ କହିଲେ, “ନେରର ପୁତ୍ର ଅବନର ମହାରାଜଙ୍କ ନିକଟକୁ ଆସିଥିଲେ, ପୁଣି ସେ ତାହାଙ୍କୁ ବିଦାୟ କରିବାରୁ ସେ କୁଶଳରେ ଚାଲିଗଲେ।”

ତହୁଁ ଯୋୟାବ ମହାରାଜଙ୍କ ନିକଟକୁ ଯାଇ କହିଲା, “ଆପଣ ଏ କଅଣ କଲେ? ଦେଖନ୍ତୁ, ଅବନର ଆପଣଙ୍କ ନିକଟକୁ ଆସିଥିଲେ; ଆପଣ କାହିଁକି ତାହାଙ୍କୁ ବିଦାୟ କଲେ ଯେ, ସେ ପୁରାପୁରି ଚାଲିଗଲେ? ଆପଣ ତ ନେରର ପୁତ୍ର ଅବନରଙ୍କୁ ଜାଣନ୍ତି, ସେ ଆପଣଙ୍କୁ ଭୁଲାଇବା ପାଇଁ, ଆଉ ଆପଣଙ୍କ ଗତାୟାତ ଓ ଆପଣଙ୍କ ସମସ୍ତ କାର୍ଯ୍ୟ ଜାଣିବା ପାଇଁ ଆସିଥିଲେ।”

ପୁଣି ଯୋୟାବ ଦାଉଦଙ୍କ ନିକଟରୁ ବାହାରିଯାଇ ଅବନରଙ୍କ ପଛେ ଦୂତ ପଠାଇଲା, ତହିଁରେ ସେମାନେ ସିରା କୂପଠାରୁ ତାହାଙ୍କୁ ଫେରାଇ ଆଣିଲେ। ମାତ୍ର ଦାଉଦ ତାହା କିଛି ଜାଣି ନ ଥିଲେ। ଅବନର ହିବ୍ରୋଣକୁ ଫେରିଆସନ୍ତେ, ଯୋୟାବ ତାହାଙ୍କ ସଙ୍ଗରେ ନିରୋଳାରେ କଥାବାର୍ତ୍ତା କରିବା ଛଳରେ ତାହାଙ୍କୁ ନଗରଦ୍ଵାର ଭିତରକୁ ଏକ ପାଖକୁ ନେଇଗଲା, ପୁଣି ସେଠାରେ ତାହାର ଭ୍ରାତା ଅସାହେଲର ରକ୍ତ ସକାଶୁ ତାହାଙ୍କ ଉଦର ଭିତରେ ଆଘାତ କଲା। ତହିଁରେ ସେ ମଲେ। ଏଥିଉତ୍ତାରେ ଦାଉଦ ଏହା ଶୁଣି କହିଲେ, “ନେରର ପୁତ୍ର ଅବନରଙ୍କ ରକ୍ତ ବିଷୟରେ ଆମ୍ଭମାନଙ୍କ ପିତାଙ୍କ ଛାମୁରେ ମୁଁ ଓ ମୋହର ରାଜ୍ୟ ଅନନ୍ତକାଳ ନିର୍ଦ୍ଦୋଷ। ତାହା ଯୋୟାବର ମସ୍ତକ ଉପରେ ଓ ତାହାର ପିତୃବଂଶ ଉପରେ ବର୍ତ୍ତୁ! ଯୋୟାବ ବଂଶରେ ପ୍ରମେହୀ, କିମ୍ବା କୁଷ୍ଠୀ, କିମ୍ବା ଯଷ୍ଟି ଅବଲମ୍ବନକାରୀ, କିମ୍ବା ଖଡ୍ଗ ଦ୍ଵାରା ପତିତ, କିମ୍ବା ଅନ୍ନହୀନ ଲୋକର ଅଭାବ କେବେ ନ ହେଉ।” ଏହିରୂପେ ଗିବୀୟୋନର ଯୁଦ୍ଧରେ ଅବନର ଆପଣାମାନଙ୍କ ଭ୍ରାତା ଅସାହେଲକୁ ବଧ କରିଥିବାରୁ ଯୋୟାବ ଓ ତାହାର ଭ୍ରାତା ଅବୀଶୟ ଅବନରଙ୍କୁ ବଧ କଲେ।

ଦାଉଦ ଅବନରଙ୍କ ନିମନ୍ତେ ଶୋକ କରନ୍ତି

ଆଉ ଦାଉଦ ଯୋୟାବକୁ ଓ ତାହା ସଙ୍ଗରେ ଥିବା ସମସ୍ତ ଲୋକଙ୍କୁ କହିଲେ, “ତୁମ୍ଭେମାନେ ଆପଣା ଆପଣା ବସ୍ତ୍ର ଚିରି ଚଟ ବସ୍ତ୍ର ପରିଧାନ କରି ଅବନରଙ୍କ ଆଗରେ ଶୋକ କର।” ପୁଣି ଦାଉଦ ରାଜା ଖଟୁଲି ପଛେ ପଛେ ଗମନ କଲେ। ଆଉ ସେମାନେ ହିବ୍ରୋଣରେ ଅବନରଙ୍କୁ କବର ଦେଲେ, ପୁଣି ରାଜା ଅବନରଙ୍କ କବର ନିକଟରେ ଉଚ୍ଚ ସ୍ଵରରେ ରୋଦନ କଲେ, ଆଉ ସମସ୍ତ ଲୋକ ରୋଦନ କଲେ। ଆଉ ରାଜା ଅବନରଙ୍କ ବିଷୟରେ ଏହି ବିଳାପ କରି ଗାନ କଲେ, “ମୂଢ଼ ଯେପରି ମରେ, ଅବନର କି ସେପରି ମରିବା ଉଚିତ ଥିଲା? ତୁମ୍ଭର ହସ୍ତ ବନ୍ଧା ହୋଇ ନ ଥିଲା, ତୁମ୍ଭର ଚରଣ ଶୃଙ୍ଖଳରେ ବନ୍ଧା ହୋଇ ନ ଥିଲା। ମନୁଷ୍ୟ ଯେପରି ଦୁଷ୍ଟମାନଙ୍କ ଆଗରେ ପତିତ ହୁଏ, ତୁମ୍ଭେ ସେପରି ପତିତ ହେଲ।” ତହିଁରେ ସମସ୍ତ ଲୋକ ପୁନର୍ବାର ତାହାଙ୍କ ନିମନ୍ତେ ରୋଦନ କଲେ।

ଏଥିଉତ୍ତାରେ ଦିନ ଥାଉ ଥାଉ ସମସ୍ତ ଲୋକ ଆସି ଦାଉଦଙ୍କୁ କିଛି ଭୋଜନ କରିବା ପାଇଁ ଅନୁରୋଧ କଲେ, ମାତ୍ର ଦାଉଦ ଶପଥ କରି କହିଲେ, “ସୂର୍ଯ୍ୟ ଅସ୍ତ ହେବା ପୂର୍ବରୁ ମୁଁ ଯଦି ରୁଟି କିମ୍ବା ଆଉ କୌଣସି ବସ୍ତୁ ଆସ୍ଵାଦ କରେ, ତେବେ ଆମ୍ଭମାନଙ୍କ ପିତା ମୋତେ ତଦନୁରୂପ, ବରଂ ତହିଁରୁ ଅଧିକ ଦଣ୍ଡ ଦେଉନ୍ତୁ!”

ତହିଁରେ ସମସ୍ତ ଲୋକ ତାହା ଲକ୍ଷ୍ୟ କରି ସନ୍ତୁଷ୍ଟ ହେଲେ; ରାଜା ଯାହା ଯାହା କଲେ, ସେହି ସମସ୍ତ ସମସ୍ତ ଲୋକଙ୍କୁ ତୁଷ୍ଟ କଲା। ଏହିରୂପେ ନେରର ପୁତ୍ର ଅବନରଙ୍କ ବଧ ରାଜାଙ୍କ ଇଚ୍ଛାରୁ ହୋଇ ନାହିଁ ବୋଲି ସମସ୍ତ ଲୋକ ଓ ସମଗ୍ର ଇସ୍ରାଏଲ ସେହି ଦିନ ଜାଣିଲେ। ପୁଣି ରାଜା ଆପଣା ଦାସମାନଙ୍କୁ କହିଲେ, “ଆଜି ଇସ୍ରାଏଲ ମଧ୍ୟରେ ଜଣେ ଅଧିପତି ଓ ମହାନ ପୁରୁଷ ପତିତ ହୋଇଅଛନ୍ତି, ଏହା କି ତୁମ୍ଭେମାନେ ଜାଣ ନାହିଁ? ଆଜି ମୁଁ ଅଭିଷିକ୍ତ ରାଜା ହୋଇ ମଧ୍ୟ ଦୁର୍ବଳ, ଆଉ ଏହି ଲୋକମାନେ, ଅର୍ଥାତ୍‍ ସରୂୟାର ପୁତ୍ରମାନେ ମୋʼ ପ୍ରତି ଅତି କଠିନ। ଯେ ମନ୍ଦ କର୍ମ କରେ, ତାହାର ମନ୍ଦତାନୁସାରେ ଆମ୍ଭମାନଙ୍କ ପିତା ତାହାକୁ ପ୍ରତିଫଳ ଦେଉନ୍ତୁ।”