Job 39

39 ¹“Nahibalo ka ba kon kanus-a manganak ang mga kanding sa kabukiran? Nagbantay ka ba sa mga bayeng usa sa dihang manganak sila? ²Maihap mo ba ang mga bulan nga ilang gisabak ang ilang mga anak? Nahibalo ka ba sa panahon nga sila manganak? ³Mangluko sila ug manganak; matapos ang ilang mga kasakit sa pagpanganak. ⁴Mokusog ang ilang mga anak diha sa hawan nga kapatagan; molakaw sila ug dili na mobalik.

⁵“Kinsa ang nagbuhi sa ihalas nga asno? Kinsa ang nagbadbad sa mga pisi sa paspas nga asno, ⁶nga kaniya gihatag ko ang kamingawan ingon nga puloy-anan ug ang asinon nga kapatagan ingon nga pinuy-anan? ⁷Gitamay niya ang kasaba sa siyudad ug wala gayod siya makadungog sa singgit sa tig-abog. ⁸Nagsuroy siya sa kabukiran aron sa pagpangita ug sibsibanan, nangita sa tanang lunhaw nga tanom.

⁹“Buot ba sa ihalas nga baka nga moalagad kanimo? Mopabilin ba siya sa kagabhion tapad sa imong pasungan? ¹⁰Mahigtan mo ba ang ihalas nga baka sa tudling pinaagi sa mga pisi? Modaro ba siya sa mga walog sunod kanimo? ¹¹Mosalig ka ba kaniya tungod kay ang iyang kusog daku kaayo? Itugyan mo ba kaniya ang imong buluhaton? ¹²Makasalig ka ba nga iyang dad-on pagbalik ang imong lugas ug tigumon kini ngadto sa imong giokanan?

¹³“Ang mga pako sa ostrich mokapakapa nga malipayon, apan sama ba kini sa mga balhibo ug bulbol sa talabong? ¹⁴Gibiyaan niya ang iyang mga itlog sa yuta ug gipainit kini diha sa abog, ¹⁵nga nahikalimot nga mahimong madugmok kini sa usa ka tiil, o matamakan sa usa ka ihalas nga mananap. ¹⁶Gidagmalan niya ang iyang mga anak, nga daw dili iya; wala siyay kahadlok nga ang iyang paghago nausik lamang, ¹⁷kay gihimo ko siya nga malimot sa kaalam ug wala ko siya hatagig bahin sa pagsabot. ¹⁸Apan sa dihang modagan na siya, gikataw-an niya ang kabayo ug ang nagkabayo niini.

¹⁹“Ikaw ba ang naghatag sa kabayo sa iyang kusog? Gibistihan mo ba ang iyang liog sa nagwagayway nga bungot? ²⁰Ikaw ba ang nagpalukso kaniya sama sa dulon? Ang iyang mapahitas-ong pagsinghak nagpahadlok. ²¹Nagkahig siya sa walog ug nagmaya sa iyang kusog; misulong siya ngadto sa gubat. ²²Gikataw-an niya ang kahadlok ug wala mahadlok; wala siya moatras gikan sa espada. ²³Ang baslayan nagkagalkal diha kaniya, ang nagkidlap nga bangkaw ug ang salapang. ²⁴Uban sa mabangis ug mapintas nga kadasig gilamoy niya ang yuta; dili siya makahunong sa dihang motunog ang trumpeta. ²⁵Sa pagtunog sa trumpeta miingon siya, ‘Aha!’ Nasimhotan niya ang gubat gikan sa halayo, ang dalugdog sa mga komandante ug ang singgit sa gubat.

²⁶“Pinaagi ba sa imong pagsabot nga molupad ang banog ug mobukhad sa iyang mga pako paingon sa habagatan? ²⁷Pinaagi ba sa imong sugo nga molupad sa kahitas-an ang agila ug magbuhat sa iyang salag sa itaas? ²⁸Nagpuyo siya sa pangpang ug didto naghimo sa iyang puloy-anan, sa batoon nga pangpang, ang iyang kuta. ²⁹Gikan didto nangita siya sa iyang pagkaon; nakita kini sa iyang mga mata gikan sa halayo. ³⁰Ang iyang mga piso nagkombira sa dugo, ug bisan asa ang mga patay, atua siya didto.”