इयोब 39 FHB Father's Heart Bible™

39 ¹“पहाडी बाख्राहरूले कहिले बच्चा जन्माउँछन्, के तिमीलाई थाहा छ? मृगिनीहरूले बच्चा जन्माउँदा के तिमीले हेरचाह गर्छौ? ²तिनीहरूले आफ्ना बच्चा गर्भमा बोक्ने महिना के तिमीले गन्न सक्छौ? तिनीहरूले बच्चा जन्माउने समय के तिमीलाई थाहा छ? ³तिनीहरू निहुरिएर बच्चा जन्माउँछन्; तिनीहरूका प्रसव-वेदना सकिन्छ। ⁴तिनीहरूका बच्चा खुला मैदानमा हृष्टपुष्ट हुन्छन्; तिनीहरू गइहाल्छन् र फर्केर आउँदैनन्।

⁵“जङ्गली गधालाई कसले स्वतन्त्र गर्‍यो? वेगवान् गधाका डोरी कसले फुकाइदियो, ⁶जसलाई मैले उजाड-स्थान घरको रूपमा दिएँ र नुनिलो जमिन बस्ने ठाउँको रूपमा दिएँ? ⁷त्यसले सहरको हल्लालाई तुच्छ ठान्छ र हाँक्नेको चिच्याहट कहिल्यै सुन्दैन। ⁸त्यसले आफ्नो खर्कको खोजीमा पहाडहरू चहार्छ, हरेक हरियो वस्तु खोज्दै।

⁹“के जङ्गली गोरु तिम्रो सेवा गर्न राजी छ? के त्यो तिम्रो नादको छेउमा रात बिताउनेछ? ¹⁰के तिमीले डोरीले जङ्गली गोरुलाई सिउँडीमा बाँध्न सक्छौ? के त्यसले तिम्रो पछिपछि बेँसीहरू जोत्नेछ? ¹¹त्यसको बल ठूलो छ भनेर के तिमी त्यसमाथि भर पर्छौ? के तिमी आफ्नो परिश्रम त्यसलाई सुम्पनेछौ? ¹²के तिमीले त्यसलाई आफ्नो अन्न फिर्ता ल्याउने र आफ्नो खलामा जम्मा गर्ने भरोसा गर्न सक्छौ?

¹³“सुतुरमुर्गका पखेटा आनन्दसाथ फडफडाउँछन्, तर के ती सारसका प्वाँख र पखेटा हुन् र? ¹⁴त्यसले आफ्ना फुल जमिनमा छोड्छे र धूलोमा तिनलाई न्यानो हुन दिन्छे, ¹⁵खुट्टाले तिनलाई कुल्चन सक्छ, वा जङ्गली जनावरले तिनलाई माड्न सक्छ भनी त्यसले बिर्सन्छे, ¹⁶त्यसले आफ्ना बच्चालाई आफ्नै होइनन् झैँ कठोर व्यवहार गर्छे; त्यसको परिश्रम व्यर्थ भयो भन्ने त्यसलाई कुनै डर छैन, ¹⁷किनकि मैले त्यसलाई बुद्धि बिर्साइदिएँ र समझशक्तिमा त्यसलाई कुनै भाग दिइनँ। ¹⁸तैपनि जब त्यो दौडन थाल्छे, त्यसले घोडा र त्यसको सवारलाई गिल्ला गर्छे।

¹⁹“के तिमीले घोडालाई त्यसको बल दिन्छौ? के तिमीले त्यसको घाँटीमा लहराउने अयाल पहिराइदिन्छौ? ²⁰के तिमीले त्यसलाई सलह झैँ उफ्रन लगाउँछौ? त्यसको घमण्डी फुर्कारले त्रास उत्पन्न गराउँछ। ²¹त्यो बेँसीमा खुर बजार्छ र आफ्नो बलमा आनन्दित हुन्छ; त्यो युद्धमा जाइलाग्छ। ²²त्यो डरलाई गिल्ला गर्छ र भयभीत हुँदैन; त्यो तरवारदेखि पछि हट्दैन। ²³त्यसको छेउमा काँडको ठोक्रो खस्खसाउँछ, चम्किलो भाला र बर्छी पनि। ²⁴उग्र, प्रचण्ड उत्साहले त्यसले जमिन निल्छ; तुरही बज्दा त्यो स्थिर रहन सक्दैन। ²⁵तुरही ठूलो स्वरले बज्दा त्यो भन्छ, ‘आहा!’ त्यसले टाढैबाट युद्धको गन्ध पाउँछ, सेनापतिहरूको गर्जन र युद्धको हाँक पनि।

²⁶“के तिम्रो समझले नै बाज उड्छ र दक्षिणतिर आफ्ना पखेटा फैलाउँछ? ²⁷के तिम्रो आज्ञाले नै गरुड माथि उड्छ र उच्च ठाउँमा आफ्नो गुँड बनाउँछ? ²⁸त्यो भीरमा बस्छ र त्यहीँ आफ्नो बास बनाउँछ, चट्टानी टाकुरामा, त्यसको गढमा। ²⁹त्यहाँबाट त्यसले आफ्नो आहाराको खोजी गर्छ; त्यसका आँखाले टाढैबाट त्यो देख्छन्। ³⁰त्यसका बचेराहरूले रगत चाख्छन्, र जहाँ मारिएकाहरू हुन्छन्, त्यो त्यहीँ हुन्छ।”