ኢዮብ 39

39 ¹"የተራራ ፍየሎች መቼ እንደሚወልዱ ታውቃለህ? ዋላዎች ሲወልዱ ትጠብቃቸዋለህን? ²ፅንሳቸውን የሚሸከሙባቸውን ወራት መቍጠር ትችላለህን? የሚወልዱበትንስ ጊዜ ታውቃለህን? ³ተንበርክከው ይወልዳሉ፤ የምጥ ሥቃያቸውም ያልፋል። ⁴ልጆቻቸው በሜዳ ላይ ይጠነክራሉ፤ ይሄዳሉ፣ ተመልሰውም አይመጡም።

⁵"የሜዳ አህያን ነጻ ያወጣ ማን ነው? የፈጣኑን አህያ ገመድ የፈታስ ማን ነው? ⁶ለመኖሪያው ምድረ በዳውን፣ ለማደሪያውም የጨው ሜዳውን የሰጠሁት ለማን ነው? ⁷የከተማውን ጫጫታ ይንቃል፤ የነጂንም ጩኸት ከቶ አይሰማም። ⁸ለግጦሹ ተራሮችን ይዞራል፤ አረንጓዴውን ሁሉ ይፈልጋል።

⁹"የሜዳ በሬ ሊያገለግልህ ይፈቅዳልን? በግርግምህ አጠገብ ያድራልን? ¹⁰የሜዳውን በሬ በገመድ ከትልም ጋራ ማሰር ትችላለህን? ሸለቆዎችንስ ተከትሎህ ያርሳልን? ¹¹ኀይሉ ታላቅ ስለ ሆነ በእርሱ ትመካለህን? ድካምህንስ ለእርሱ አደራ ትሰጣለህን? ¹²እህልህን መልሶ እንዲያመጣ፣ ወደ አውድማህም እንዲሰበስብልህ ታምነዋለህን?

¹³"የሰጎን ክንፎች በደስታ ይማታሉ፤ ነገር ግን የሽመላ ላባና ክንፍ ናቸውን? ¹⁴እንቍላሎቿን በመሬት ላይ ትተዋለች፤ በትቢያ ውስጥም እንዲሞቁ ታደርጋለች፤ ¹⁵እግር ሊጨፈልቃቸው እንደሚችል፣ የዱር አውሬም ሊረግጣቸው እንደሚችል ረስታ። ¹⁶ልጆቿ የራሷ እንዳልሆኑ፣ በጭካኔ ትይዛቸዋለች፤ ድካሟ ከንቱ ስለ መሆኑ ፍርሃት የላትም፤ ¹⁷ጥበብን እንድትረሳ ስላደረግኋት፣ ማስተዋልንም ስላላካፈልኋት ነው። ¹⁸ነገር ግን ለመሮጥ ስትነሣ፣ ፈረሱንና ጋላቢውን ትሥቃለች።

¹⁹"ለፈረስ ኀይልን የምትሰጠው አንተ ነህን? አንገቱንስ በተንዠረገገ ጋማ ታለብሰዋለህን? ²⁰እንደ አንበጣ ዘልሎ እንዲሄድ ታደርገዋለህን? ኵራት የተሞላበት ማናፈሱ ያስደነግጣል። ²¹መሬቱን በኰቴው እየጫረ በኀይሉ ይደሰታል፤ ወደ ውጊያም ይገሠግሣል። ²²ፍርሃትን ይሥቃል፣ አይደነግጥምም፤ ከሰይፍም ፊት ወደ ኋላ አያፈገፍግም። ²³አፎቱ በጐኑ ያንቃጭላል፤ የሚያብለጨልጨው ጦርና ዠምቢያም እንዲሁ። ²⁴በጽኑና በሚንቀለቀል ስሜት መሬቱን ይውጣል፤ መለከት በተነፋ ጊዜ ጸጥ ብሎ መቆም አይችልም። ²⁵መለከት በተነፋ ጊዜ፣ ‘እሰይ!’ ይላል፤ የውጊያውንም ሽታ ከሩቅ ያሸታል፤ የአዛዦችን ነጐድጓድና የጦር ጩኸት።

²⁶"ጭልፊት የሚበረው፣ ክንፎቹንም ወደ ደቡብ የሚዘረጋው በአንተ ማስተዋል ነውን? ²⁷ንስር ከፍ ብሎ የሚበረው፣ ጎጆውንም በከፍታ ላይ የሚሠራው በአንተ ትእዛዝ ነውን? ²⁸በገደል ላይ ይኖራል፤ ማደሪያውንም እዚያ ያደርጋል፤ በዓለት አቀበት ላይ፣ በጽኑ መጠጊያው። ²⁹ከዚያ ሆኖ ምግቡን ይፈልጋል፤ ዐይኖቹም ከሩቅ ያዩታል። ³⁰ጫጩቶቹ ደምን ይጎነጫሉ፤ የተገደሉትም ባሉበት ስፍራ ሁሉ፣ እርሱ በዚያ ይገኛል።"