Yamkabü Gadu Kho Aoei Ngaitikei?

Phebü ngüh kho müteibü leiyeibü akibü leiyebü kümenbü shuong danko paiyoda: alongei bukbü shongh kabü lon, sangnyu to mubü masu, saoeibü tei lemala tengbü ostrik, lühbü to ipbü ngeyang, haoeibü laanglip ka kibü au yaang. Khübü yoa che ongkei Job shanga maibü aki.

Chapter 39.

Shongh kabü lon shuong bukbü jih kho nyi ngeda lo? Meishi shuong bukkujinei nyi haoen to maangsangko lo? Haoenei jembü younak onko kibü lit shuong nyi lühbaka jinla thükkei lo? Hoba haoen bukbü jih kho nyi ngeda lo? Haoen khüpetko bukko; haoeneibü pangtei apda. Haoeneibü younak khongthua yemko hau kida; haoen bangjung hauda hoba touje angai.

“Yamkabü gadu la aoei kümkaleika kukei? Sobüsepbü gadueibü janglüh kho aoei ngaitikei, ngei hao la yam kho jembü chem shanga, hoba jem kaodak kho jembü kishang shanga kukei? Haoei sangnyu ngühlang kho awealau, hoba latbou ngekbü ngüh kho aditku. Haoei jembü lamshaushang shanga shongh shuonga paida, hoba nyem shuong pendou lamda.

“Masu ngou kho no khangenla maangangda lo? Haoei kaibü buphau junga khünei sühla lo? Masu ngou kho nyi janglühei sek to khühla thükkei lo? Haoei nyi phai to pholi shuong sek laütila lo? Haoeibü hau yaangbü shanga nyi hao to sühlangla lo? Nyi kaibü kümsilei hao to mailemla lo? Hao to nyi mailembo kaibü youshou leibaan, hoba kaibü amshanga yoshaila thükkei lo?

“Ostrik aueibü kaak olinbüei metda, lausikei kho stork aueibü nei hoba kaaknei lo? Saoei jembü tei kaoa üpyo, hoba thamngu ka lemala tengda, Youei kho naknyinla, ayingsi yamkabü meisiauei kho naksühla dogo saoei mada, Saoei jembü younak kho haoen jembü aying tegü maanga kümda; jembü kümsilei jim akibü la saoei ahatda, aishanga ngei hao la songsihon maatikei, hoba ditenbüa phejan akuko. Lausikei ladang haoei laangjung angda, haoei koli hoba khonei setbü to weko aki.

No koli to haoeibü hau kua lo? No haoeibü ngüm to kaoshang lekua lo? No hao to koksüng tegü saiyeitida lo? Haoeibü tubü kungkhün hakei hatbü shenda. Haoei yomanga paida hoba haoeibü hau yoa olinda; haoei lason to tangshaitham hauda. Haoei hatbü to weko aki hoba amokda; haoei in ka sepeinyu alongeida. Phot haoei khulimbo langh kümda, soneikangbü aubu hoba javelin. Aeibou kaangbü khauangei haoei kao suida; teklaang metlaje haoei atopeiko lola athük. Teklaang metlaje haoei laukei, ‘Aha!’ Haoei lason lüm saabü ka jemenda, leiyeibü shuongeibü langmak hoba lason sühbü ngek.

Kaibü ditenbüa aulu satan haoeibü kaak yungkük ae to seengda lo? Kaibü sakkubüei wekekshou thüka angan haoeibü hap thükkaboua kümda lo? Haoei laanga kida hoba khünei jembü kishang kümda, laanglip thüka, haoeibü lapheishon. Khünei ka haoei jembü shausiyung lamda; haoeibü nyekei kho saabü ka hapda. Haoeibü shoushou shuongei sii shauda, hoba haibü mang lato kialonga, khünei hao kida.”