Bouei Mühghaü yeishikei ka jongaida
Toukei Bouei yeishikei ka jongaikei, awealaubü akiko phe ka lolo. Kaodak chemshang yaükei jihsiphaia, no laeto kikei? Yungnyu sangmeiei neila kukei jihsiphaia? Aoei dei la bou ki, aoei meisiau shuong samda, aoei au shoushou ngekda? Jobeibü khonsak che ong alen.
38 1Hobaje Bouei yeishikei ka Job to jongaikei: a a v1 Job lepbou shuongei thinei Bou dogo ange hean kibü Mühghaü shangabü chapter 35 ngüh juong laubü phaia, Bou hao lolo Mühghaü yeishikei ka hao aaolalebü shou yoa thenyek thenyek joyokei.
2“Hapbüngebü akibü ngühei dambü nakthüh kubou ho aoei ki? 3Bousu tegü no lolo lamleashi; ngei no ka phelabü, hoba no ngo to jongailabü. 4Ngei kaodak chemshang yaükei jihsiphaia, no laeto kikei? Ditenbü no yoa kialonga, kü la lenshi. 5Kho takbü aoei phokukei—maimaitham no ngeakei! Ayingsi kho thüka takan chühbü lüh aoei shingkei? 6Kho denshang ai thüka koukei, ayingsi kho chemnyek laang aoei khangkei, 7Ngeyang khanshoulitshou shuongei liko chia atkei jihsiphaia, hoba khuthükbü tan pendouei olinko ngekkei? 8Ayingsi aoei yungnyu koukap khinkei, kho na setshang ka paknyinjinei, 9ngei sangmei kho neila kukei, hoba sangmei nakthüh kho küplepbü neila kukei, 10ngei kho shanga ngeibü thonbü takletkukei, hoba kho ngok hoba koukap phokukei, 11hoba laukei, ‘No hanei sühko loulabü, lausikei kho phaia aloulabü; hanei kaibü yong lambü deishou nanglabü’? 12No ladangkei ngeyang to sakkukei, ayingsi langesaoa to kho kaonyek khokei, 13kho kaodak jijiham lapla, hoba amaibü shuong kho ka shaknyinla shanga lo? 14Kaodak thüng thüka shungkung kao tegü shatda, hoba kho chühlabü nei noplabü tegü tang longda. 15Amaibü shuong ka haoeneibü ngesakbü jeikei, hoba haoeneibü shingan kibü phak leiluan kia. 16No yungnyu deikük to haua, ayingsi deinyu haübü mang ka paia lo? 17Haibü bakhün no la tang khitkei lo, ayingsi nakthüh shangbü bakhün no hapa lo? 18Kaodak dangshuokbü maangkabü no hapbei lo? Habü pendou no ngekei, kü la lenashi. 19Ngesakbü kishang to haubü lam lae ki, hoba nakthühbü kishang lae ki, 20khübü kho khükabü leilang to no leilep, hoba khükabü kishang to haubü lamnyu no ngelep lo? 21Maimaitham no ngekei, aishanga no hauan bukkei, hoba kaibü chalou lühbak juongan ki! 22Ninthu bung to no atkei lo, ayingsi senlaang bung no hapbei lo, 23khübü kho ngei khonkubü chalou shanga amenan phokubü, lason hoba wapyo chalou shanga? 24Ngesakbü janyinbü kishang to haubü lam ai ki, ayingsi chaangbou yei kaodak thükto lintibü kishang lae ki? 25Lang kaang shanga deilam, hoba langmak shanga lamnyu aoei kümbei, 26aoyou akibü kaonyek to lang yantila, müt che ongkei akibü yam to, 27danbü hoba sangliphang kao soutila, hoba deilabü kao sang yeitikua shanga? 28Lang la bou ki lo? Nindei ao ka pakkei? 29Dei kaangbü aoeibü na ka longkei, hoba müh hanpang on ao ka bukkei, 30dei kho laang tegü kaangjinei, hoba yungnyu haübü kaothe kaangkhühtham kiteikei? 31Pleiades yangmen no khühlep lo, ayingsi Orion janglüh no phetphantilep lo? b b v31 Pleiades kho khanshoulitshou nyangko lapsibü che ki; Orion kho khanshoulitshou kaman yaangbü che ki — khonei nangnak müh ka maibü ngebü tetsi ki. 32Khanshoulitshou kaman kho khükabü jihsiphaia no leishaitilep lo, ayingsi sap kho khükabü shou soan yoa no leilep lo? 33Khuthük ngühkhüm no ngekei lo? Kaodak thüka khükabü songdakbü no phokulep lo? 34Sangmei to kaibü ngüh no longtilep lo, hoba dei yungsenei no küplepla nyi kümlep lo? 35Nyiei langpon shuong hautila, hoba haoen hauan, ka to, ‘Künei hanei kia,’ dogo lenla thükla lo? 36Aoei maangpona songsihon phokei, ayingsi aoei maangpon to ditenbü kukei? 37Aoei sangmei weenla songsihon ki? Aoei khuthük dei thung shuong tonletla thükla, 38ladang thamngu kaangan massa la yeikei, hoba kao thamngu shuong liko senetlaje? 39Nyiei molosaonyu pi shanga meishi kipbala, ayingsi molosaonyu shoushou shuongeibü mühei soula thükla, 40ladang haoen haoeneibü denshanga khüpetkei, ayingsi seka haiyeiko kilaje? 41Aoei aukhomakmak shanga shausiyung kuda, ladang jembü shoushou kü to ngekjinei hoba shausiyung aleko shoongeidaje?”
