Thükenbou to nyi haklep lo?
Jobei haoeibü ik kaoa thupaian ngüh lauko thonkei. Lausikei seneibü Bouei nyibou phekei: nyi lolo ngühmaanglanbü yeila shanga kü matjembü lulula lo? Kheijinei haoei Behemoth to chühkei—nyem shaubü, shumangei haoeibü kaoa to laakbo dogokei laksepan—haoeibü Kümbouei lolo jungto louthük kibü kümenbü.
40 1Hobaje seneibü Bouei Job to laukei:
2“Thükenbou yoa lemen longbou hao haklep lo? Kü matjembüei kho jongaitiashi.”
Jobei jembü sembung ikei yemkei
3Hobaje Jobei seneibü Bou to jongaikei: 4“Chühashi, ngo mubü aying—ngei no to küman jongaila? Ngei kü ikei kü sembung yeikei. 5Ngei che ong joyokei—ngei ajongailabü; nyinei—ngei touje aei alaulabü.”
6Hobaje seneibü Bouei yeishi ka Job to jongaikei:
7“Müt tegü nyi lolo lamleashi; ngei no ka phelabü, hoba nyi kü to jongailabü. 8Maimaitham nyi kü ngühmai leilutila lo? Nyi tükde yingla shanga ngo yuktilep lo? 9Nyi la kü tegü phak kia lo? Nyi kü tegü ngühei langmak maaktilep lo? 10Yaangenbü hoba soumo nyi lolo lekuashi; nyenhang hoba soneikangbüei nyi lolo neiashi. 11Kaibü khauang khüpan jinkushi; lilibü müt pendou to chühko hao yantiashi. 12Lilibü müt pendou to chühko hao khonsaktiashi; amaibü shuong haoen lobü kaoa ngoktikuashi. 13Haoen pendou thamngu ka liko khünashi; haoeneibü thenyek hee ka hueiashi. 14Kheijinei ngei lolo no to nyen sanglabü, aishanga kaibü mae ikei no khümenla thüklabü. 15Behemoth to chühashi, ngei no kümbü tegü kho ngei kümkei; haoei masu tegü sang shauda. a a v15 Behemoth kho yangsikok yaangbü che ki—aingenyu dei yangsikok yaangbü ayingsi kaonyeka kibü yangsikok yaangbü che—seneibü Bou kümbü danko soumo hatbü che tegü hanei tonenan kia. 16Chühashi—haoeibü hau haoeibü khünei ka kia, hoba haoeibü sei haoeibü shimunga kia. 17Haoei jembü mei cedar tegü sekoktida; haoeibü shenjang shuong kaangkhühtham khühan kia. 18Haoeibü lo kho chinamei kümbü phodong tegü ki, haoeibü ik you kho nameibü ngok tegü ki. 19Hao kho ngeibü kümsilei shuong ka shaangbü ki; haoeibü yaübou ong inei hao nyangko loula thükkei. 20Shongh shuongei jembü hek hekko hao shanga kuda, khünei yamkabü meisiau pendou olinda. 21Lotus bunyu shuong phanga hao thakdu hoba dei lom ka huan yepda. 22Lotus bunyu shuongei haoeneibü yemeei hao küplepla; shushou kabü willo bunyu shuongei hao kailepa. 23Shumang dei angsilonga, hao ahatda; Jordan haoeibü sembung to thensikei, hao sangsembo kida. 24Hao chühko kijinei aoyouei hao lapla thüklabü lo, ayingsi sungei haoeibü kung sepbula thüklabü lo?”
