Nana Sāshap-pangshapali mashungkhuirala?
Jobna awui khut eina amaa hārna kahang khaomana. Kha ithumwui Avāna kahang shisa: nang khamashung shimikhavai vang ei khamashung nangna chaohaira ma? Chiwui thili ana Behemoth-li kachuikhui: kathan sāda, awui makhali kharoka tuikong eina ngachan mali, Asāpāa khalatta kaphungshi zathang.
40 1Chiwui thili ithumwui Avāna Jobli hānga:
2"Sāshap-pangshapali khangarok china ali mashungkhuira? Iwui yangkashena chi ngahānkāranu."
Jobna Akhamorli Apāng Matam
3Chieina Jobna ithumwui Avāli ngahānkai: 4"Yanglu, I makakā mi akhana; kathada ina nali ngahānkārakhala? Ikhamorli ipāng matama. 5Ina hāngkhashiya; ina mangahānkāmara. Khani shida hānghaira, kha ina mahāngluimara."
6Chiwui thili ithumwui Avāna siphan zingrotwui eina Jobli ngahānkai:
7"Mayarnao thāda nakhalatta shānneilu; ina nali ngahānra, kala nana ili ngahānkālu. 8Nana maningakha iwui mashunli makhui ngasakra? Na khamashunga sākhavai ili khayon mamira? 9Na iwui thāda pāngthei kaila? Nana iwui thāda akhon eina kazing khangashum sāshapla? 10Nakhalatta khangamkharei kala khayākakā eina aman leingasaklu; khayā kala tekhamatei eina sāri shaklu. 11Nawui malungkhavāt chi heitālu; langkaso mi kachiva̱li yangtitlaga ali ngakhuntailu. 12Langkaso mi kachiva̱li yangtitlaga ali maishi ngasaklu; makhayābingli athum nganingpama chili sākachupmilu. 13Athum saikora chifali ngarumda chifalu; athumwui mai chikhurli chonrān eina fakhamlu. 14Chiwui thili ilala nali masot mira, kaja nawui yāpāngna nakhalatta huikhuishapra. 15Nali sākakhui thāda ina sākakhui Behemothli yanglu; ana sei thāda khawo shai. a a v15 Behemoth hi sā khavai kakāla akhana—maningakha tuili okthui sā kakā (hippopotamus) lah ngalei sā kakā akha—ithumwui Avāwui saikora sākahaiwui khangachee otsak akha thāda hili khāngchikatana. 16Yanglu, awui yāng awui kashānli lei, kala awui pangshap awukwui anonānli lei. 17Ana awui akhamei cedarthing thāda mararshāp ngasaka; awui khaishāngwui anonanbing namshāntit kahai thāda ngarumda sākazakzak kahaina. 18Awui ara̱kui pithraiwui utongna, awui pheipāng mari phākashut thai. 19A iwui otsakbingwui kharena; awui Kasaa māngna raighai eina awui ngalemli nganaishapa. 20Kaphungbingna awui vang heiun chungsanga, chili sāyur saikorana ngareowa. 21Lotus thingnāwui azingli, titi kala rāpurwui khaya̱li ana ngayaipama. 22Lotus thingnāwui khaya̱na ali fakhama; kongrāwui shumthingbingna ali kuinama. 23Kongna malungvātlala, ana makhanangmara; Jordanna akhamorli khuivālala, aning nganungkhunghaira. 24Ana machukta leilakha khipāna ali tukkhuishaprala, lah khalen eina anātangli ruisangshaprala?"
