Khipāna Ram Gadhāli Ningkhān Ngasakna?
Ngahangkhavai hi mina mayangkhavai maleimana ngamkashārā saikora tharan kahao: kong kasaka akhalena naokāva, sāchi kharingli khayang kanamakha, ostrich-na awui ahui mangshapkhai, sāngāna ngachan-ali kanui, kala mangkhui awui lungkongli kaphung. Hi saikora hina Jobwui ngahan vang mahāmana.
39 1"Kaphungwui me china karan naopharāt kaji nana theila? Chaova̱bing naopharāt tharan nana ali mayonpamrala? 2Athumna anao phungkhavai kachāng chi nana mashing shānkhuishapra? Athum naokhara̱wui atam chi nana theila? 3Athum ngakhorda naopharāt; athumwui naokhara̱ khavaihaowa. 4Athumwui anaobing khamasaipamli khamakanga sāhaira; athum chihohailaga malatungmara.
5"Khipāna ram gadhāli ningkhān ngasakkhala? Khipāna gadhā kathākawui khara̱bing khalāthuihaokhala, 6chili ina lamhāng chi awui shimkhavai, kala machi ngalei chi awui pamkhavai mihaira? 7Ana keinungwui akhonla mana̱shiya kala khamayonawui kakathang akhon mashāmara. 8Ana awui wonhomphung phākhavai kaphungbingli ranganingda, khamateka won saikora phai.
9"Ramsei nali otram ngatha̱ khavai khuisangngaiala? Ana nawui tara̱ham ngalemli zunrala? 10Ramsei khara̱ eina luilamli khalapshaprala? Ana nakhanukli tampākbing lui vārala? 11Awui yāng kachangkhatwui vang eina nana ali chihānra? Nawui ot ali horsang mirala? 12Nawui mā chi hanmi khavai kala nawui lanpumli kazipkhui khavai nana ali chihānra?
13"Ostrichwui angachāngna mathānda khangatha̱a, kha chi varokwui pheimareng kala amareng kathāla? 14Ana awui ara̱bing ngaleitungli haihaida, kala chifali lum ngasaka, 15pheina chibingli za̱tāra, lah ramsāna chibingli naitāra kaji malaihaowa. 16Awui anao maningkha thāda ana awui anaobingli zakshilāk eina otsai; awui yāng arema sāhaoki jila ana makhangacheelakmana, 17kaja ina ali thangkhamei malai ngasaka, kala ali theishingkakhuili sharuk mamimana. 18Chithālala ana phālak eina yonga tharan, siguili kala awui katongapali ana mana̱rora.
19Nana siguili apangshap khamila? Nana akahung chi longkharor kahai morhā eina farormi? 20Nana ali khaohyur thāda yongkān ngasakla? Awui langso khaksuina khangachee ngasaka. 21Ana tampākli ngalei kupra kala awui pangshapli mathāna; ana rai kasāli muivāra. 22Ana khangacheeli mana̱rora kala mangacheemana; ana raighaiwui eina malanthuimana. 23Awuitungli malākhor, hingpik kahai kazei kala zeimajo kapharkhona. 24Khangachee kala sākashi eina ana ngalei shaimi; talla̱ kakhong tharan ana manganingshaprarmana. 25Talla̱ kakhong tharan ana, 'Aha!' da hānga. Ana katāva̱wui eina rai chi, raithānabingwui khangashum kala raikhon nganam.
26Nawui theishingkakhui eina langtikyur yongzatta angachāng chi azingshong khavai phayaila? 27Nawui ningkhami eina khalāng kajuipamli yongzatta kajuiva̱li awui athip sākara? 28Ana lunghārli somda, lunghārtungli, awui raipanli awui shim sāra. 29Chiwui eina ana awui kashakazā phākhuira; awui mik eina katāva̱wui eina theiya. 30Awui anaobingna ashee manga, kala kathingun khaleipam kachida, chili ana leira."
