Ayubu 39

39 ¹"Je, wajua wakati mbuzi wa mlimani wanapozaa? Je, waziangalia paa wanapozaa? ²Je, waweza kuhesabu miezi wanayochukua mimba? Je, wajua wakati wanapozaa? ³Hujiinamisha na kuzaa; uchungu wao wa kuzaa umekwisha. ⁴Watoto wao hukua na kuwa na nguvu kondeni; huondoka wala hawarudi.

⁵"Ni nani aliyemwacha punda-mwitu huru? Ni nani aliyezifungua kamba za punda mwepesi, ⁶ambaye nimempa jangwa liwe makao yake na nchi ya chumvi iwe maskani yake? ⁷Huzidharau kelele za mji wala hasikii ukelele wa mwendesha-punda. ⁸Hutanga-tanga milimani kutafuta malisho yake, akitafuta kila kitu cha kijani.

⁹"Je, nyati yu radhi kukutumikia? Je, atalala usiku kando ya hori lako la kulishia? ¹⁰Je, waweza kumfunga nyati kwenye mtaro kwa kamba? Je, atalima mabondeni nyuma yako? ¹¹Je, utamtegemea kwa sababu nguvu zake ni nyingi? Je, utamwachia kazi yako? ¹²Je, waweza kumwamini akurudishie nafaka yako na kuikusanya kwenye sakafu yako ya kupuria?

¹³"Mbawa za mbuni hupiga-piga kwa furaha, lakini je, ni manyoya na uzuri wa korongo? ¹⁴Huyaacha mayai yake juu ya ardhi na kuyaacha yapate joto mavumbini, ¹⁵akisahau kwamba mguu waweza kuyaponda, au mnyama wa mwitu aweza kuyakanyaga. ¹⁶Huwatenda watoto wake kwa ukatili, kana kwamba si wake mwenyewe; haogopi kwamba taabu yake imekuwa bure, ¹⁷kwa sababu nilimsahaulisha hekima wala sikumpa fungu katika ufahamu. ¹⁸Lakini akianza kupiga mbio, humcheka farasi na mpanda-farasi wake.

¹⁹"Je, wewe humpa farasi nguvu zake? Je, waivika shingo yake manyoya yanayopepea? ²⁰Je, wamfanya arukaruke kama nzige? Mlio wa pua yake wa fahari huleta hofu. ²¹Hupiga-piga miguu bondeni na kufurahia nguvu zake; hukimbilia vitani. ²²Huicheka hofu wala haogopi; harudi nyuma mbele ya upanga. ²³Podo hutagatanya juu yake, mkuki unaong'aa na fumo. ²⁴Kwa shauku kali na ya hasira huila ardhi; hawezi kusimama tuli tarumbeta ilipolia. ²⁵Kila tarumbeta ilipolia husema, 'Aha!' Huisikia harufu ya vita kutoka mbali, ngurumo ya majemadari na kelele ya vita.

²⁶"Je, ni kwa ufahamu wako kwamba kipanga huruka na kutandaza mbawa zake kuelekea kusini? ²⁷Je, ni kwa amri yako kwamba tai hupaa juu na kujenga kiota chake mahali pa juu? ²⁸Hukaa juu ya jabali na kufanya maskani yake humo, juu ya mwamba wenye majabali, ngome yake. ²⁹Kutoka huko hutafuta chakula chake; macho yake hukiona kutoka mbali sana. ³⁰Makinda yake hujilisha damu, na palipo na waliouawa, ndipo yeye alipo."