Nani Wáyambula Ane wa Nseki?

Khyulu yisi kwamina mu bambisi bya nseki bina bisi konda lusadisu lwa batu: bakhombu ba mongu bisi buta bawu meni, ane wa nseki wuna wisi seka mbanza, ositirishi wuna wisi zimbakana maki mandi, bavalu wuna wisi seka boma, yi mbembi ha tadi dyandi. Ka kima ku mu byawu kisi sadila luzolu lwa Yobi.

Tata wetu kisi zonza mu mavese 1–30

Kapitulu 39.

«Wuzayi tangwa dina bakhombu ba mongu babutila? Wutadikini bangudi tangwa babutila? Wulenda kutanga zingonde zina banata bana ba bawu? Wuzayi tangwa dina babutila? Báfukama amana babuta; misongu mya kubutila kwa bawu mimani. Bana ba bawu bakola yi ngolu muna tseki; balubuka amana bavutukaku hika.

«Nani wáyambula ane wa nseki wenda kaka? Nani wakútumuna misinga mya ane wisi tyakula, wuna yáhana tseki ni homa handi, amana tsi ya mungwa ni homa ya kuzingila kwandi? Kasevila khololu ya mbanza amana kayukiku ndinga ya mutu wuna wisi nata mbisi. Kenda-kenda muna mongu, homa handi ha madya, kasosa kima kyosu kya tsi.

«Ngombi wa nseki wuzodi kusadila ngeyi? Wulenda lala bela-bela yi dinda dyaku dya madya? Wulenda kukasa ngombi wa nseki ni misinga mu nzila ya kubundula? Kabundula beti ku manima maku? Wuyekamina mwena yandi mukuma ngolu zandi zina za lawu? Wuheka kisalu kyaku kwena yandi? Wulenda kwikila yandi ni kavutula bule dyaku amana kadiwongika ku homa ha kuledika kwaku?

«Mahela ma ositirishi masi tuta yi kyesi, kaasi, keti mawu malusala yi misala mya sitoliki? Kasisa maki mandi ha tsi amana kayambula mangwala muna fusyangeni, mu kuzimbakana ni dikulu dilenda mafukumuna, kondilo mbisi ya nseki yilenda madyatikisa. Kábasa bana bandi mu ngolu, bwa ni ka bana bandi ku; kena yi bweya ku ni kisalu kyandi kyákala mu phamba, mukuma meni yámuzimbakanisa ngangu, amana yámuhanaku ndambu mu nzayilu. Kaasi tangwa kayandika kutina, kasevila mvalu yi wuna wuzakadini ha thandu yandi.

«Ngeyi wuheka mvalu ngolu zandi? Wuvwatisa tsingu yandi ni nsuki zisi vevuka? Wunsadisa kadumuka bwa makonko? Kusema kwandi kwa lulendu kwisi tula bweya. Kabula tsi ni malu muna beti amana kasángwala mu ngolu zandi; kenda ntinu mu kunwana mvita. Kasevila bweya amana bweya bwimukwataku; kavutuka ku manima ku ha thwala ya phoku. Nkutu wa madyonga wisi tsakuka mwena yandi, ngumba yisi lema yi dyonga. Mu nganzi yi mbundu yisi dindumuka kadidila tsi; kafwani telama ku tangwa phungi yisi bula. Ku muhungu wa phungi kazimbula: “Ha!” Kayuka nsudi wa mvita ku thama, thungidi ya bapfumu ba basuta yi kukalunga kwa mvita.

«Keti mu nzayilu waku khombolo yisi vevuka amana yisi yalumuna mahela mandi ku banda? Keti mu mulongi waku mbemba yisi tombuka amana yisi tunga zamba dyandi ku zilu? Yisi zingila ha londi dya matadi amana yisi tunga homa handi hakana, ha tadi dya mbuta, homa handi ha kuswamina. Tuka hakana yisi sosa madya mandi; mesu mandi misi dimona ku thama. Bana bandi bisi dya menga, amana kwosu kuna kwenina bamvumbi, kuna kenina yandi.»