یابانی اِششه‌یی کئم آزاد اتدی؟
سوآللار داوام ادر، ائنسان ائداره‌سئنه احتئیاجی اولمایان چؤل حیوانلاری باره‌ده: تَک‌باشینا دوغان داغ کچئلری، شهری سایمایان اِششک، اؤز یومورتالارینی یادیندان چیخاردان بایقوش، قورخویا گولَن آت، اؤز قایاسیندا اولان قارتال. بونلارین هچ بئری اَیّوبون راحاتلیغینا خئدمت اتمئر.
39 1«داغ کچئلرئنئن دوغدوغو واختینی بئلئرسن؟ مارال‌لار دوغاندا، سن اونلارا گؤز قویورسان؟ 2اونلارین بالا توتدوغو آیلاری سایا بئلرسن؟ دوغدوقلاری واختی بئلئرسن؟ 3اونلار چؤکوب بالالارینی دوغار؛ دوغوش آغریلاری قورتارار. 4اونلارین بالالاری آچیق چؤلده گوجلو اولار؛ گدئب بئر داها قاییتمازلار.
5«چؤل اِششه‌یی کئم آزاد اتدی؟ چاپار اِششه‌یئن ائپلرئنی کئم آچدی، 6من اونا صحرانی اِو اولاراق، شوره‌لئکلری ده مسکن اولاراق وردئم؟ 7او شهرئن گورولتوسونو سایماز، سورن آدامین باغیرتیسینی هچ اشئتمز. 8او اؤز اوتلاغی اوچون داغلاری دولاشار، هر یاشیل شیئن دالینجا آختاریر.
9«چؤل اؤکوزو سنه قوللوق اتمه‌یه راضی اولار؟ سنئن آخورونون یانیندا گجه‌نی کچئره‌ر؟ 10چؤل اؤکوزونو ائپلرله شوخوما باغلایا بئلرسن؟ او سنئن دالینجا دره‌لرده شوخوملایار؟ 11گوجو چوخ اولدوغو اوچون اونا توکّول ادئرسن؟ اؤز زحمتئنی اونا تاپشیرارسان؟ 12اونا اعتئبار ادئرسن کی، تاخیلینی گری گتئرسئن و اونو خرمنئنه ییغسین؟
13«بایقوشون قانادلاری شادلیقلا چیرپینار، آمّا اونلار لِیلَیئن توکلری و پَرلری‌دئرمی؟ 14او اؤز یومورتالارینی یرده بوراخار، قویار کی، تورپاقدا قیزیشسینلار، 15یادیندان چیخاردار کی، بئر آیاق اونلاری اَزه بئلر، یا چؤل حیوانی اونلاری تاپدالایا بئلر. 16اؤز بالالاری ائله، اونون دیئلمئش کئمی، شئدّتله رفتار ادیر؛ زحمتئنئن بوشا گتدئیئندن قورخوسو یوخدور، 17چونکی من اونا حئکمتی اونوتدوردوم، و آنلاقدان اونا بئر پای ورمه‌دئم. 18آمّا قاچماغا باشلایاندا، آتی و اونون آتلیسینی گؤروب گولر.
19«آتین گوجونو سن ورئرسن؟ اونون بوینونو دالغالانان توکلرله سن گیئندئرئرسن؟ 20اونو چَیئرتکه کئمی توللاندیرارسان؟ اونون مغرور فینخیرتیسی دهشت سالیر. 21دره‌ده یری اَشَر و اؤز گوجونه سِوئنَر؛ دؤیوشه آتیلار. 22قورخویا گولر و واهئمه‌یه دوشمز؛ قیلینجین قاباغیندان گری چکئلمز. 23اوخدان اونون اوستونده شاققیلدایار، پارلایان نئزه و مئزراق. 24شئدّتلی و جوشغون هیجانلا یری اودار؛ کَره‌نای چالیناندا یرئنده دورا بئلمز. 25کَره‌نای چالاندا دیئر: ”آها!“ دؤیوشون ائیسئنی اوزاقدان دویار، سرکرده‌لرئن گورولتوسونو و دؤیوش نئداسینی.
26«سنئن آنلاغینلادیرمی، کی قیرغی اوچار و قانادلارینی جنوبا طرف آچار؟ 27سنئن امرئنله‌دئرمی، کی قارتال یوکسلر و یوواسینی اوجا یرده قورور؟ 28او قایادا یاشار و اؤز مسکنئنی اورادا سالیر، اؤز قالاسی اولان تئز قایانین اوستونده. 29اورادان اؤز خؤره‌یئنی آختاریر؛ گؤزلری اونو اوزاقدان گؤرَر. 30اونون بالالاری قان ائچَر، و اؤلَنلر هارادا اولسا، او دا اورادادیر.»
