2 Samuel 17

17 ¹Unya miingon si Ahitofel kang Absalom, “Tugoti ako nga mopili ug 12,000 ka lalaki ug molakaw karong gabii sa paggukod kang David. ²Sulongon ko siya samtang gikapoy ug maluya pa siya, lisangon ko siya, ug mangalagiw ang tanan niyang katawhan; unya patyon ko lamang ang hari. ³Dad-on ko pagbalik kanimo ang tanang katawhan. Ang usa ka tawo nga imong gipangita—ang iyang kamatayon nagpasabot nga mobalik ang tanan, ug ang tibuok katawhan maanaa sa kalinaw.”

⁴Kini nga plano daw maayo alang kang Absalom ug sa tanang mga katigulangan sa Israel. ⁵Miingon si Absalom, “Tawga usab si Husai nga Arkanhon, ug patalinghogan ta kon unsa usab ang iyang isulti.”

⁶Sa pag-abot ni Husai kaniya, miingon si Absalom, “Mao kini ang gitambag ni Ahitofel. Buhaton ba nato ang iyang giingon? Kon dili, isulti mo.”

⁷Miingon si Husai kang Absalom, “Ang tambag nga gihatag ni Ahitofel dili maayo niini nga higayon. ⁸Midugang si Husai, “Nasayod ka sa imong amahan ug sa iyang mga tawo—mabangis nga mga manggugubat, sama sa oso nga gikuhaan sa iyang mga anak diha sa kapatagan. Ang imong amahan batid nga manggugubat; dili siya matulog uban sa mga sundalo.” ⁹Bisan karon nagtago siya sa usa ka bangag o sa laing dapit. Kon ang uban nimong mga tawo mangapukan pag-una, si bisan kinsa nga makadungog moingon, ‘Gipamatay na ang mga tawo ni Absalom!’ ¹⁰Unya bisan ang labing maisog, kansang kasingkasing sama sa kasingkasing sa leon, matunaw sa kahadlok, kay nasayod ang tibuok Israel nga ang imong amahan manggugubat ug maisog ang mga kauban niya. ¹¹Busa mao kini ang akong tambag: tigoma nganha kanimo ang tibuok Israel, gikan sa Dan hangtod sa Beerseba, sama kadaghan sa balas sa daplin sa dagat, ug ikaw mismo ang moadto sa gubat. ¹²Maabtan nato siya bisan asa siya, mohugpa kaniya sama sa yamog sa yuta, ug walay mabiling buhi bisan siya o bisan kinsa sa iyang mga tawo. ¹³Kon moatras siya ngadto sa usa ka siyudad, ang tibuok Israel magdala ug mga pisi didto, ug guyoron nato kini ngadto sa walog hangtod nga walay bisan usa ka gamayng bato nga mabilin.”

¹⁴Miingon si Absalom ug ang tanang mga tawo sa Israel, “Ang tambag ni Husai nga Arkanhon mas maayo kay sa kang Ahitofel.” Kay gilaraw sa atong Amahan nga pakyason ang maayong tambag ni Ahitofel, aron ang atong Amahan makapadala ug katalagman kang Absalom.

¹⁵Gisultihan ni Husai ang mga pari nga si Zadok ug si Abiatar, “Mao kini ang gitambag ni Ahitofel kang Absalom ug sa mga katigulangan sa Israel, ug mao kini ang akong gitambag. ¹⁶Karon pagpadala dayon ug pulong kang David: ‘Ayaw pagpabilin karong gabii sa mga tabokanan sa kamingawan; tabok gayod nga walay palta, kay basin ang hari ug ang tanang katawhan nga kauban niya pagalamyon.’”

¹⁷Si Jonatan ug si Ahimaaz naghulat didto sa En-rogel; moadto ang usa ka sulugoong babaye ug mosulti kanila, ug moadto sila ug mosulti kang Haring David, kay dili sila mahimong makita nga mosulod sa siyudad. ¹⁸Apan nakita sila sa usa ka batan-ong lalaki ug gisuginlan niya si Absalom. Busa nagdali ang duha ug nakaabot sa balay sa usa ka tawo sa Bahurim, nga adunay atabay sa iyang sawang, ug mikanaog sila ngadto niini. ¹⁹Gibukhad sa asawa sa tawo ang usa ka tabon ibabaw sa baba sa atabay ug gisabwag niya ang lugas sa ibabaw niini, aron walay namatikdan. ²⁰Sa pag-abot sa mga sulugoon ni Absalom ngadto sa babaye sa balay, nangutana sila, “Hain si Ahimaaz ug si Jonatan?” Mitubag siya, “Mitabok sila sa sapa.” Nangita ang mga tawo, walay nakaplagan, ug mibalik sila sa Jerusalem.

²¹Human sila mobiya, misaka ang duha gikan sa atabay ug miadto sila ug mitaho kang Haring David. Miingon sila kaniya, “Bangon ug tabok dayon sa tubig, kay si Ahitofel naglaraw niini batok kanimo.”

²²Busa mibangon si David ug ang tanang kauban niya ug mitabok sila sa Jordan. Sa pagbanagbanag sa adlaw walay bisan usa nga nahibilin nga wala makatabok niini.

²³Sa nakita ni Ahitofel nga wala sunda ang iyang tambag, gisiyahan niya ang iyang asno ug mipauli siya sa iyang lungsod. Gihan-ay niya ang iyang panimalay, unya nagbitay siya sa iyang kaugalingon. Namatay siya ug gilubong sa lubnganan sa iyang amahan.

²⁴Miabot si David sa Mahanaim, samtang mitabok si Absalom sa Jordan uban ang tanang mga tawo sa Israel nga kauban niya. ²⁵Gipili ni Absalom si Amasa nga magdumala sa kasundalohan puli kang Joab. Ang amahan ni Amasa mao si Itra nga Israelihanon, nga nangasawa kang Abigail nga anak ni Nahas, igsoong babaye ni Zeruia, nga inahan ni Joab. ²⁶Nagkampo ang Israel ug si Absalom sa yuta sa Gilead.

²⁷Sa pag-abot ni David sa Mahanaim, si Sobi nga anak ni Nahas gikan sa Raba sa mga Amonihanon, si Makir nga anak ni Amiel gikan sa Lo-debar, ug si Barzilai nga Gileadnon gikan sa Rogelim, ²⁸nagdala ug mga higdaanan, mga palanggana, ug mga kolon, lakip ang trigo, sebada, harina, sinanlag nga lugas, mga liso, lentehas, ²⁹dugos, keso nga gatas, mga karnero, ug keso gikan sa panon alang kang David ug sa iyang katawhan nga pagakan-on, kay miingon sila, “Gigutom, gikapoy, ug giuhaw ang katawhan sa kamingawan.”