2 Samuẹli 17

17 ¹Ahitofeli sì sọ fún Absalomu pé, “Jẹ́ kí n yan ọkùnrin ẹgbẹ̀rún méjìlá, kí n sì gbéra ní òru òní láti lépa Dafidi. ²Èmi yóò kọlù ú nígbà tí ó ti rẹ̀ tí àárẹ̀ sì mú un, èmi yóò dẹ́rùbà á, gbogbo àwọn ènìyàn rẹ̀ yóò sì sá; nígbà náà ni èmi yóò kàn pa ọba nìkan. ³Èmi yóò mú gbogbo àwọn ènìyàn náà padà wá sọ́dọ̀ rẹ. Ọkùnrin kan tí ìwọ ń wá—ikú rẹ̀ túmọ̀ sí pé gbogbo ènìyàn yóò padà, gbogbo àwọn ènìyàn náà yóò sì wà ní àlàáfíà.”

⁴Ìmọ̀ràn yìí sì dára lójú Absalomu àti lójú gbogbo àwọn àgbààgbà Israẹli. ⁵Absalomu wí pé, “Ẹ pe Huṣai ará Arki pẹ̀lú, kí a sì gbọ́ ohun tí òun pẹ̀lú yóò sọ.”

⁶Nígbà tí Huṣai dé ọ̀dọ̀ rẹ̀, Absalomu wí pé, “Báyìí ni Ahitofeli gba wá nímọ̀ràn. Ṣé kí a ṣe ohun tí ó sọ? Bí kò bá rí bẹ́ẹ̀, ìwọ sọ̀rọ̀.”

⁷Huṣai sì wí fún Absalomu pé, “Ìmọ̀ràn tí Ahitofeli gbà kò dára ní àkókò yìí. ⁸Huṣai sì fi kún un pé, “Ìwọ mọ baba rẹ àti àwọn ọkùnrin rẹ̀—jagunjagun oníjà gidigidi, bí beari tí a ti gba àwọn ọmọ rẹ̀ lọ́wọ́ rẹ̀ nínú pápá. Baba rẹ jẹ́ ológun tí ó mọ ìjà; òun kì yóò sùn pẹ̀lú àwọn ọmọ ogun.” ⁹Kódà ní báyìí ó ti fi ara pamọ́ sínú ihò kan tàbí níbòmíràn. Bí àwọn kan nínú àwọn ọkùnrin rẹ bá kọ́kọ́ ṣubú, ẹnikẹ́ni tí ó bá gbọ́ yóò wí pé, ‘A ti pa àwọn ọmọ ogun Absalomu run!’ ¹⁰Nígbà náà, kódà ẹni tí ó gbóná jù, ẹni tí ọkàn rẹ̀ dàbí ọkàn kìnnìún, yóò yọ́ pẹ̀lú ẹ̀rù, nítorí gbogbo Israẹli mọ̀ pé jagunjagun ni baba rẹ, àti pé àwọn tí ó wà pẹ̀lú rẹ̀ ní ìgboyà. ¹¹Nítorí náà, ìmọ̀ràn mi nìyí: kí o kó gbogbo Israẹli jọ sọ́dọ̀ rẹ, láti Dani títí dé Beerṣeba, tí ó pọ̀ bí iyanrìn etí òkun, kí ìwọ fúnra rẹ sì lọ sójú ogun. ¹²Àwa yóò dé ọ̀dọ̀ rẹ̀ níbikíbi tí ó bá wà, àwa yóò bà lé e bí ìrì ṣe ń bà lé ilẹ̀, a kì yóò sì fi òun tàbí ẹnikẹ́ni nínú àwọn ọkùnrin rẹ̀ sílẹ̀ láàyè. ¹³Bí ó bá sì padà sínú ìlú kan, gbogbo Israẹli yóò mú okùn wá síbẹ̀, àwa yóò sì wọ́ ọ lọ sínú àfonífojì títí tí òkúta wẹ́wẹ́ kan kì yóò fi ṣẹ́kù.”

¹⁴Absalomu àti gbogbo àwọn ọkùnrin Israẹli wí pé, “Ìmọ̀ràn Huṣai ará Arki sàn ju ti Ahitofeli lọ.” Nítorí Baba wa ti pinnu láti ba ìmọ̀ràn rere Ahitofeli jẹ́, kí Baba wa lè mú ìparun wá sórí Absalomu.

¹⁵Huṣai sì sọ fún àwọn àlùfáà Sadoku àti Abiatari pé, “Báyìí ni Ahitofeli gba Absalomu àti àwọn àgbààgbà Israẹli nímọ̀ràn, báyìí sì ni èmi gbà wọ́n nímọ̀ràn. ¹⁶Ní báyìí, ẹ fi iṣẹ́ ránṣẹ́ kíákíá sí Dafidi pé, ‘Má ṣe dúró ní òru òní ní ibi ìwọdò aginjù; ṣe é dájúdájú láti rékọjá, bí bẹ́ẹ̀ kọ́ ọba àti gbogbo àwọn ènìyàn tí ó wà pẹ̀lú rẹ̀ ni a ó gbé mì.’”

¹⁷Jonatani àti Ahimasi sì dúró ní Eni-rogeli; ọmọbìnrin ìránṣẹ́ kan a máa lọ sọ fún wọn, àwọn a sì máa lọ sọ fún Dafidi ọba, nítorí a kò lè rí wọn tí wọ́n ń wọ ìlú. ¹⁸Ṣùgbọ́n ọ̀dọ́mọkùnrin kan rí wọn, ó sì sọ fún Absalomu. Nítorí náà àwọn méjèèjì yára lọ, wọ́n sì dé ilé ọkùnrin kan ní Bahurimu, ẹni tí ó ní kànga ní àgbàlá rẹ̀, wọ́n sì sọ̀kalẹ̀ sínú rẹ̀. ¹⁹Aya ọkùnrin náà sì tẹ́ aṣọ ìbòrí sórí ẹnu kànga náà, ó sì fọ́n ọkà sí i, kí a má ba à kíyè sí ohunkóhun. ²⁰Nígbà tí àwọn ìránṣẹ́ Absalomu dé ọ̀dọ̀ obìnrin náà nínú ilé, wọ́n béèrè pé, “Níbo ni Ahimasi àti Jonatani wà?” Obìnrin náà wí pé, “Wọ́n ti rékọjá odò náà.” Àwọn ọkùnrin náà sì wá, wọn kò rí ẹnikẹ́ni, wọ́n sì padà sí Jerusalẹmu.

²¹Lẹ́yìn tí wọ́n lọ, àwọn méjèèjì gòkè láti inú kànga náà, wọ́n sì lọ ròyìn fún Dafidi ọba. Wọ́n wí fún un pé, “Dìde, kí o sì rékọjá omi náà kíákíá, nítorí Ahitofeli ti gbìmọ̀ èyí sí ọ.”

²²Nítorí náà Dafidi àti gbogbo àwọn tí ó wà pẹ̀lú rẹ̀ dìde, wọ́n sì rékọjá Jordani. Nígbà tí ilẹ̀ mọ́, kò sí ẹnìkan tí ó ṣẹ́kù tí kò tí ì rékọjá rẹ̀.

²³Nígbà tí Ahitofeli rí i pé a kò tẹ̀lé ìmọ̀ràn rẹ̀, ó di kẹ́tẹ́kẹ́tẹ́ rẹ̀ ní gàárì, ó sì lọ sílé sí ìlú rẹ̀. Ó to ilé rẹ̀ ṣe, lẹ́yìn náà ó so ara rẹ̀ kọ́. Ó kú, a sì sin ín sínú ibojì baba rẹ̀.

²⁴Dafidi sì dé Mahanaimu, nígbà tí Absalomu rékọjá Jordani pẹ̀lú gbogbo àwọn ọkùnrin Israẹli ní ẹ̀gbẹ́ rẹ̀. ²⁵Absalomu ti fi Amasa ṣe olórí ogun dípò Joabu. Baba Amasa ni Itira ará Israẹli, ẹni tí ó ti fẹ́ Abigaili ọmọbìnrin Nahaṣi, arábìnrin Seruah, ìyá Joabu. ²⁶Israẹli àti Absalomu sì pàgọ́ sí ilẹ̀ Gileadi.

²⁷Nígbà tí Dafidi dé Mahanaimu, Ṣobi ọmọ Nahaṣi láti Rabba ti àwọn ará Ammoni, Makiri ọmọ Ammieli láti Lo-debari, àti Barsilai ará Gileadi láti Rogelimu, ²⁸mú ibùsùn, àwokòtò, àti ohun èlò amọ̀ wá, pẹ̀lú àlìkámà, ọkà barle, ìyẹ̀fun, ọkà yíyan, ẹ̀wà, ẹ̀wà lentili, ²⁹oyin, wàrà dídì, àgùntàn, àti wàrà oníṣù láti inú ọ̀wọ́ ẹran fún Dafidi àti àwọn ènìyàn rẹ̀ láti jẹ, nítorí wọ́n wí pé, “Ebi ń pa àwọn ènìyàn náà, àárẹ̀ sì mú wọn, òǹgbẹ sì ń gbẹ wọ́n ní aginjù.”