2 ሳሙኤል 17

17 ¹አኪጦፌልም አቤሴሎምን እንዲህ አለው፤ “ዐሥራ ሁለት ሺህ ሰዎች ልምረጥና በዚህች ሌሊት ዳዊትን ተከትዬ ልውጣ። ²እርሱ ደክሞና ዝሎ ሳለ እወጋዋለሁ፤ አስደነግጠዋለሁም፤ ሕዝቡም ሁሉ ይሸሻሉ፤ ከዚያም ንጉሡን ብቻ እመታለሁ። ³ሕዝቡንም ሁሉ ወደ አንተ እመልሳለሁ፤ የምትፈልገው ያ አንድ ሰው ሲሞት ሁሉም ይመለሳል፤ ሕዝቡም ሁሉ በሰላም ይኖራል።”

⁴ይህ ዕቅድ አቤሴሎምንና የእስራኤልን ሽማግሌዎች ሁሉ ደስ አሰኛቸው። ⁵አቤሴሎምም፣ “አራካዊውን ሑሻይንም ጥሩት፤ እርሱም የሚለውን እንስማ” አለ።

⁶ሑሻይም ወደ እርሱ በመጣ ጊዜ አቤሴሎም፣ “አኪጦፌል እንዲህ መከረ፤ እርሱ እንዳለው እናድርግን? ባይሆንስ አንተ ተናገር” አለው።

⁷ሑሻይም አቤሴሎምን፣ “አኪጦፌል የሰጠው ምክር በዚህ ጊዜ መልካም አይደለም” አለው። ⁸ሑሻይም ጨምሮ እንዲህ አለ፤ “አባትህንና ሰዎቹን ታውቃቸዋለህ፤ በሜዳ ላይ ግልገሎቿ እንደተነጠቁ ድብ የሚከፉ ብርቱ ተዋጊዎች ናቸው፤ አባትህም የተለማመደ ተዋጊ ነው፤ ከሰራዊቱም ጋራ አያድርም። ⁹አሁንም እንኳ በጕድጓድ ውስጥ ወይም በሌላ ስፍራ ተሸሽጓል፤ ከሰዎችህ አንዳንዶቹ መጀመሪያ ቢወድቁ፣ የሚሰማ ሁሉ፣ ‘የአቤሴሎም ሰዎች ተፈጁ!’ ይላል። ¹⁰ያን ጊዜ ልቡ እንደ አንበሳ ልብ የሆነ ደፋር እንኳ በፍርሃት ይቀልጣል፤ አባትህ ተዋጊ መሆኑን፣ ከእርሱም ጋራ ያሉት ደፋሮች መሆናቸውን እስራኤል ሁሉ ያውቃልና። ¹¹ስለዚህ ምክሬ ይህ ነው፤ እስራኤል ሁሉ ከዳን እስከ ቤርሳቤህ፣ በባሕር ዳር እንዳለ አሸዋ የበዛ ሆኖ ወደ አንተ ይሰብሰብ፤ አንተም ራስህ ወደ ጦርነቱ ውጣ። ¹²ባለበት ስፍራ ሁሉ እናገኘዋለን፤ መሬት ላይ እንደሚያርፍ ጠል በእርሱ ላይ እናርፍበታለን፤ እርሱንም ሆነ ከሰዎቹ አንዱን እንኳ በሕይወት አናስቀርም። ¹³ወደ ከተማም ቢያፈገፍግ፣ እስራኤል ሁሉ ወደዚያ ገመዶች ያመጣል፤ ድንጋይ ቍራጭ እንኳ እስካይቀር ድረስ ወደ ሸለቆው እንጎትተዋለን።”

¹⁴አቤሴሎምና የእስራኤል ሰዎች ሁሉ፣ “የአራካዊው ሑሻይ ምክር ከአኪጦፌል ምክር ይሻላል” አሉ። አባታችን በአቤሴሎም ላይ መዓትን ያመጣ ዘንድ የአኪጦፌልን መልካም ምክር ለማክሸፍ ወስኖ ነበርና።

¹⁵ሑሻይም ካህናቱን ሳዶቅንና አብያታርን እንዲህ አላቸው፤ “አኪጦፌል አቤሴሎምንና የእስራኤልን ሽማግሌዎች የመከረው እንዲህ ነው፤ እኔም የመከርሁት እንዲህ ነው። ¹⁶አሁንም ለዳዊት ፈጥናችሁ፣ ‘በዚህች ሌሊት በምድረ በዳው መሻገሪያ ዘንድ አትቈይ፤ ሳትውል ተሻገር፤ ያለዚያ ንጉሡና ከእርሱ ጋራ ያለው ሕዝብ ሁሉ ይዋጣል’ ብላችሁ ላኩ።”

¹⁷ዮናታንና አኪማአስ በዐይንሮጌል ይጠባበቁ ነበር፤ አንዲት አገልጋይ ሴት ሄዳ ትነግራቸው ነበር፤ እነርሱም ሄደው ለንጉሡ ለዳዊት ይነግሩ ነበር፤ ወደ ከተማይቱ ሲገቡ መታየት አይችሉም ነበርና። ¹⁸ነገር ግን አንድ ጎልማሳ አያቸውና ለአቤሴሎም ነገረ፤ ስለዚህ ሁለቱ ፈጥነው ሄደው በባሑሪም ወዳለ አንድ ሰው ቤት ደረሱ፤ እርሱም በግቢው ውስጥ የውሃ ጕድጓድ ነበረው፤ ወደ ውስጡም ወረዱ። ¹⁹የሰውዬውም ሚስት በጕድጓዱ አፍ ላይ መሸፈኛ ዘረጋች፤ በላዩም እህል በተነች፤ ስለዚህ ምንም አልታወቀም። ²⁰የአቤሴሎም አገልጋዮችም ወደ ቤቱ ወደ ሴትዮዋ መጥተው፣ “አኪማአስና ዮናታን የት አሉ?” ብለው ጠየቋት። እርሷም፣ “ወንዙን ተሻገሩ” አለች። ሰዎቹም ፈልገው ማንንም ባለማግኘታቸው ወደ ኢየሩሳሌም ተመለሱ።

²¹ከሄዱም በኋላ ሁለቱ ከጕድጓዱ ወጥተው ሄደው ለንጉሡ ለዳዊት ነገሩት፤ “ተነሥተህ ፈጥነህ ውሃውን ተሻገር፤ አኪጦፌል በአንተ ላይ እንዲህ አሢሯልና” አሉት።

²²ስለዚህ ዳዊትና ከእርሱ ጋራ የነበሩት ሁሉ ተነሥተው ዮርዳኖስን ተሻገሩ፤ እስኪነጋ ድረስ ያልተሻገረ አንድ እንኳ አልቀረም።

²³አኪጦፌልም ምክሩ እንዳልተሰማ ባየ ጊዜ አህያውን ጫነ፤ ተነሥቶም ወደ ከተማው ወደ ቤቱ ሄደ፤ ቤቱንም አሰናድቶ ራሱን ሰቀለ፤ ሞተም፤ በአባቱም መቃብር ተቀበረ።

²⁴ዳዊትም ወደ መሐናይም መጣ፤ አቤሴሎም ግን ከእርሱ ጋራ ካሉት የእስራኤል ሰዎች ሁሉ ጋራ ዮርዳኖስን ተሻገረ። ²⁵አቤሴሎም በኢዮአብ ፈንታ አማሳን በሰራዊቱ ላይ ሾሞ ነበር፤ የአማሳ አባት የኢዮአብ እናት የጽሩያ እኅት የሆነችውን የናዖስ ልጅ አቢግያን ያገባ እስራኤላዊው ይትራ ነበር። ²⁶እስራኤልና አቤሴሎም በገለዓድ ምድር ሰፈሩ።

²⁷ዳዊትም ወደ መሐናይም በደረሰ ጊዜ፣ ከአሞናውያን ረባት የመጣው የናዖስ ልጅ ሳቢ፣ ከሎዳባር የመጣው የዐሚኤል ልጅ ማኪር፣ ከሮጌሊም የመጣው ገለዓዳዊው በርዚላይ፣ ²⁸አልጋዎችን፣ ሳሕኖችንና የሸክላ ዕቃዎችን፣ ከስንዴ፣ ከገብስ፣ ከዱቄት፣ ከተጠበሰ እህል፣ ከባቄላ፣ ከምስር ጋራ፣ ²⁹ማርን፣ የቀዘቀዘ ወተትን፣ በጎችንና ከመንጋው የተገኘ አይብን ዳዊትና ሕዝቡ ይበሉ ዘንድ አመጡ፤ “ሕዝቡ በምድረ በዳ ተርቧል፤ ደክሞአልም፤ ተጠምቷልም” ብለው ነበርና።