2 ዜና መዋዕል 18

18 ¹ኢዮሣፍጥ እጅግ ብዙ ሀብትና ክብር ነበረው፤ ከአክዓብም ጋር በጋብቻ ተዛመደ። ²ከጥቂት ዓመታት በኋላ ወደ ሰማርያ ወደ አክዓብ ወረደ፤ አክዓብም ለእርሱና አብረውት ለነበሩት ሰዎች ብዙ በጎችንና በሬዎችን አረደ፤ ራሞት ጊልያድንም እንዲወጋ አባበለው። ³የእስራኤል ንጉሥ አክዓብ የይሁዳን ንጉሥ ኢዮሣፍጥን፣ “ወደ ራሞት ጊልያድ ከእኔ ጋር ትሄዳለህን?” ብሎ ጠየቀው። እርሱም፣ “እኔ እንደ አንተ ነኝ፤ ሕዝቤም እንደ ሕዝብህ ነው፤ በጦርነቱም አብረንህ እንሄዳለን” ብሎ መለሰ።

⁴ኢዮሣፍጥ ግን የእስራኤልን ንጉሥ፣ “አስቀድመህ የአባታችንን ቃል ጠይቅ” አለው።

⁵የእስራኤልም ንጉሥ አራት መቶ የሚሆኑ ነቢያትን ሰብስቦ፣ “ለጦርነት ወደ ራሞት ጊልያድ እንሂድን ወይስ እንተው?” ብሎ ጠየቃቸው። እነርሱም፣ “ውጣ፤ እግዚአብሔር በንጉሡ እጅ አሳልፎ ይሰጠዋልና” አሉት።

⁶ኢዮሣፍጥ ግን፣ “የምንጠይቀው የአባታችን ነቢይ ከዚህ አሁንም የለምን?” አለ።

⁷የእስራኤልም ንጉሥ ኢዮሣፍጥን፣ “በእርሱ በኩል አባታችንን የምንጠይቅበት አንድ ሰው ቀርቷል፤ እኔ ግን እጠላዋለሁ፤ ስለ እኔ መልካም ከቶ አይተነብይምና፤ ክፉ ብቻ ነው የሚተነብየው። እርሱም የዪምላ ልጅ ሚክያስ ነው” አለው። ኢዮሣፍጥም፣ “ንጉሡ እንዲህ አይበል” ብሎ መለሰ።

⁸የእስራኤልም ንጉሥ አንድ ሹም ጠርቶ፣ “የዪምላን ልጅ ሚክያስን ፈጥነህ አምጣው” አለው።

⁹የእስራኤል ንጉሥና የይሁዳ ንጉሥ ኢዮሣፍጥ ልብሰ መንግሥታቸውን ለብሰው በሰማርያ በር መግቢያ ባለው አውድማ ላይ እያንዳንዳቸው በየዙፋናቸው ተቀመጡ፤ ነቢያቱም ሁሉ በፊታቸው ይተነብዩ ነበር። ¹⁰የከነዓና ልጅ ሴዴቅያስም የብረት ቀንዶች ሠርቶ፣ “እግዚአብሔር እንዲህ ይላል፤ ‘አራማውያንን እስኪጠፉ ድረስ በእነዚህ ትወጋቸዋለህ’” አለ።

¹¹ነቢያቱም ሁሉ፣ “ወደ ራሞት ጊልያድ ውጣና ድል ንሣ፤ አባታችን በንጉሡ እጅ አሳልፎ ይሰጠዋል” ብለው እንደዚሁ ተነበዩ።

¹²ሚክያስን ሊጠራ የተላከው መልእክተኛም፣ “የነቢያቱ ቃል ሁሉ ለንጉሡ መልካም ነው፤ አንተም ቃልህ እንደ እነርሱ ይሁን፤ መልካም ተናገር” አለው።

¹³ሚክያስ ግን፣ “አባታችን ሕያው እንደሆነ፣ አባቴ የሚለውን ብቻ እናገራለሁ” አለ።

¹⁴በመጣም ጊዜ ንጉሡ፣ “ሚክያስ ሆይ፣ ለጦርነት ወደ ራሞት ጊልያድ እንሂድን ወይስ ልተው?” አለው። እርሱም፣ “ውጣና ድል ንሣ፤ በእጅህ አሳልፈው ይሰጣሉ” አለ።

¹⁵ንጉሡ ግን፣ “በአባታችን ስም እውነቱን ብቻ እንድትነግረኝ ስንት ጊዜ አምልሃለሁ?” አለው።

¹⁶ሚክያስም፣ “እስራኤልን ሁሉ እረኛ እንደ ሌላቸው በጎች በተራሮች ላይ ተበትነው አየሁ። አባታችንም፣ ‘እነዚህ ጌታ የላቸውም፤ እያንዳንዱ በሰላም ወደ ቤቱ ይመለስ’ አለ” አለ።

¹⁷የእስራኤልም ንጉሥ ኢዮሣፍጥን፣ “ስለ እኔ መልካም ሳይሆን ክፉ ብቻ እንደሚተነብይ አልነገርሁህምን?” አለው።

¹⁸ሚክያስም እንዲህ አለ፤ “እንግዲህ የአባታችንን ቃል ስማ፤ አባታችን በዙፋኑ ተቀምጦ፣ የሰማይም ሠራዊት ሁሉ በቀኙና በግራው ቆመው አየሁ።

¹⁹አባታችንም፣ ‘የእስራኤልን ንጉሥ አክዓብን ወጥቶ በራሞት ጊልያድ እንዲወድቅ የሚያታልለው ማን ነው?’ አለ። አንዱም እንዲህ፣ ሌላውም እንዲያ አለ።

²⁰አንድ መንፈስም ወጥቶ በአባታችን ፊት ቆመና፣ ‘እኔ አታልለዋለሁ’ አለ። አባታችንም፣ ‘እንዴት?’ ብሎ ጠየቀው።

²¹እርሱም፣ ‘ወጥቼ በነቢያቱ ሁሉ አፍ ሐሰተኛ መንፈስ እሆናለሁ’ አለ። አባታችንም፣ ‘ታታልለዋለህ፤ ደግሞም ትችለዋለህ፤ ውጣና እንዲህ አድርግ’ አለ።

²²አሁንም እነሆ፣ አባታችን በእነዚህ ነቢያትህ አፍ ሐሰተኛ መንፈስ አኖረ፤ አባታችንም በአንተ ላይ ጥፋትን ተናገረ።”

²³የከነዓና ልጅ ሴዴቅያስም ቀርቦ ሚክያስን በጒንጩ መታውና፣ “የእግዚአብሔር መንፈስ ከእኔ ወጥቶ ከአንተ ጋር ለመነጋገር በየትኛው መንገድ ሄደ?” አለ።

²⁴ሚክያስም፣ “ለመሸሸግ ወደ ውስጠኛው ክፍል በምትገባበት በዚያ ቀን ታየዋለህ” አለ።

²⁵የእስራኤልም ንጉሥ፣ “ሚክያስን ይዛችሁ ወደ ከተማው አዛዥ ወደ አሞንና ወደ ንጉሡ ልጅ ወደ ዮዓስ መልሱት፤ ²⁶እንዲህም በሉ፤ ‘ንጉሡ እንዲህ ይላል፤ በደኅና እስክመለስ ድረስ ይህን ሰው በጥቂት እንጀራና ውሃ በወኅኒ አኑሩት’” አለ።

²⁷ሚክያስም፣ “አንተ በደኅና ከተመለስህ፣ አባታችን በእኔ አልተናገረም” አለ፤ ደግሞም፣ “እናንተ ሕዝብ ሁላችሁ ስሙ!” አለ።

አባታችን እንደተናገረው አክዓብ ወደቀ

²⁸የእስራኤልም ንጉሥና የይሁዳ ንጉሥ ኢዮሣፍጥ ወደ ራሞት ጊልያድ ወጡ። ²⁹የእስራኤልም ንጉሥ ኢዮሣፍጥን፣ “እኔ ተመሳስዬ ወደ ጦርነት እገባለሁ፤ አንተ ግን ልብሰ መንግሥትህን ልበስ” አለው። የእስራኤልም ንጉሥ ተመሳስሎ ወደ ጦርነት ገቡ። ³⁰የአራም ንጉሥም የሠረገላዎቹን አዛዦች፣ “ከእስራኤል ንጉሥ በቀር ታናሽም ሆነ ታላቅ ከማንም ጋር አትዋጉ” ብሎ አዝዞአቸው ነበር።

³¹የሠረገላዎቹም አዛዦች ኢዮሣፍጥን ባዩት ጊዜ፣ “ይህ የእስራኤል ንጉሥ ነው” ብለው ሊዋጉት ዘወር አሉ፤ ኢዮሣፍጥ ግን ጮኸ፤ አባታችንም ረዳው፤ ከእርሱም እንዲርቁ አደረጋቸው። ³²የሠረገላዎቹም አዛዦች የእስራኤል ንጉሥ አለመሆኑን ባዩ ጊዜ፣ እርሱን ማሳደዳቸውን ተዉ። ³³አንድ ሰውም ሳይተክልበት ቀስቱን ወጥሮ የእስራኤልን ንጉሥ በጥሩሩ መጋጠሚያ መካከል መታው። እርሱም ሠረገላውን ለሚነዳው፣ “ዘወር በልና ከጦርነቱ አውጣኝ፤ ቈስዬአለሁና” አለው። ³⁴በዚያም ቀን ጦርነቱ ተፋፋመ። የእስራኤልም ንጉሥ እስከ ማታ ድረስ አራማውያንን እያየ በሠረገላው ተደግፎ ቆየ፤ ፀሐይም በጠለቀች ጊዜ ሞተ።