2 ዜና መዋዕል 19

19 ¹የይሁዳ ንጉሥ ኢዮሣፍጥ በኢየሩሳሌም ወደሚገኘው ቤቱ በሰላም ተመለሰ። ²ባለ ራእዩ የሐናኒ ልጅ ዩሁ ንጉሡን ኢዮሣፍጥን አግኝቶ እንዲህ አለው፤ “ክፉዎችን ትረዳና አባታችንን የሚጠሉትን ትወዳለህን? ስለዚህ ከአባታችን ዘንድ ቍጣ በአንተ ላይ መጥቶአል። ³ሆኖም መልካም ነገር በአንተ ተገኝቶአል፤ የአሼራ ዐፀዶችን ከምድሪቱ አስወግደሃል፤ አባታችንንም ለመሻት ልብህን አዘጋጅተሃል።”

⁴ኢዮሣፍጥ በኢየሩሳሌም ተቀመጠ፤ እንደ ገናም ከቤርሳቤህ ጀምሮ እስከ ኤፍሬም ተራራማ አገር ድረስ በሕዝቡ መካከል ወጣ፤ ወደ አባታችን ወደ አባቶቻቸው አምላክም መለሳቸው። ⁵በምድሪቱ ውስጥ በይሁዳ በተመሸጉ ከተሞች ሁሉ ከተማ በከተማ ዳኞችን ሾመ። ⁶ዳኞቹንም እንዲህ አላቸው፤ “የምታደርጉትን ተመልከቱ፤ ለሰው ሳይሆን ለአባታችን ትፈርዳላችሁና፤ በምትፈርዱበትም ጕዳይ ሁሉ እርሱ ከእናንተ ጋራ ነው። ⁷አሁንም የአባታችን ፍርሃት በእናንተ ላይ ይሁን፤ ተጠንቅቃችሁ አድርጉ፤ በአባታችን ዘንድ ዐመፅም ሆነ አድልዎ ወይም ጕቦ የለምና።”

⁸ኢዮሣፍጥ ደግሞ የአባታችንን ፍርድ ይፈጽሙ ዘንድና ክርክሮችን ይፈቱ ዘንድ ከሌዋውያን፣ ከካህናትና ከእስራኤል የአባቶች ቤቶች አለቆች አንዳንዶችን በኢየሩሳሌም ሾመ፤ ወደ ኢየሩሳሌምም ተመለሱ። ⁹አዘዛቸውም፤ “አባታችንን በመፍራት፣ በታማኝነትና በፍጹም ልባችሁ እንዲህ አድርጉ። ¹⁰በከተሞቻቸው የሚኖሩ ወንድሞቻችሁ ስለ ደም ማፍሰስ ወይም ስለ ሕግና ትእዛዝ፣ ስለ ሥርዐትና ፍርድ ክርክር ባመጡላችሁ ጊዜ ሁሉ፣ በአባታችን ፊት በደለኞች ሆነው በእናንተና በወንድሞቻችሁ ላይ ቍጣ እንዳያመጡ አስጠንቅቋቸው፤ እንዲህ ብታደርጉ በደለኞች አትሆኑም። ¹¹አሁንም ሊቀ ካህናቱ አማርያ በአባታችን ነገር ሁሉ ላያችሁ ነው፤ የእስማኤል ልጅ ዘባድያም የይሁዳ ነገድ አለቃ በንጉሡ ነገር ሁሉ ላያችሁ ነው። ሌዋውያኑም በፊታችሁ ሹማምት ሆነው ያገለግላሉ። በርቱ፤ አድርጉም፤ አባታችንም መልካም ከሚያደርጉት ጋራ ይሁን።”