ଦ୍ଵିତୀୟ ବଂଶାବଳୀ 19 FHB Father's Heart Bible™

19 ¹ଯିହୂଦାର ରାଜା ଯିହୋଶାଫଟ୍‌ ନିରାପଦରେ ଯିରୂଶାଲମସ୍ଥ ଆପଣା ଗୃହକୁ ଫେରିଲେ। ²ହନାନିର ପୁତ୍ର ଯେହୂ ଦର୍ଶକ ରାଜା ଯିହୋଶାଫଟ୍‌ଙ୍କ ସଙ୍ଗେ ସାକ୍ଷାତ କରି ପଚାରିଲେ, “ଆପଣ କି ଦୁଷ୍ଟର ସାହାଯ୍ୟ କରିବା ଓ ଆମ୍ଭମାନଙ୍କ ପିତାଙ୍କୁ ଘୃଣା କରୁଥିବା ଲୋକମାନଙ୍କୁ ପ୍ରେମ କରିବା ଉଚିତ? ଏଥିପାଇଁ ଆମ୍ଭମାନଙ୍କ ପିତାଙ୍କ କ୍ରୋଧ ଆପଣଙ୍କ ଉପରେ ଅଛି। ³ତଥାପି ଆପଣଙ୍କ ଠାରେ ଉତ୍ତମ ବିଷୟ ଦେଖାଯାଏ; ଆପଣ ଦେଶରୁ ଆଶେରା ସ୍ତମ୍ଭସବୁ ଦୂର କରିଅଛନ୍ତି ଓ ଆମ୍ଭମାନଙ୍କ ପିତାଙ୍କର ଅନ୍ଵେଷଣ କରିବାକୁ ଆପଣା ମନ ସ୍ଥିର କରିଅଛନ୍ତି।”

⁴ଯିହୋଶାଫଟ୍‌ ଯିରୂଶାଲମରେ ବାସ କଲେ, ପୁଣି ବେର୍‌ଶେବାଠାରୁ ଇଫ୍ରୟିମ ପର୍ବତମୟ ଦେଶ ପର୍ଯ୍ୟନ୍ତ ଲୋକମାନଙ୍କ ମଧ୍ୟକୁ ପୁନର୍ବାର ବାହାରିଯାଇ ସେମାନଙ୍କୁ ସେମାନଙ୍କ ପିତୃପୁରୁଷଙ୍କ ଈଶ୍ଵର ଆମ୍ଭମାନଙ୍କ ପିତାଙ୍କ ନିକଟକୁ ଫେରାଇ ଆଣିଲେ। ⁵ସେ ଦେଶରେ, ଯିହୂଦାର ପ୍ରତ୍ୟେକ ପ୍ରାଚୀର-ବେଷ୍ଟିତ ନଗରରେ, ନଗରକୁ ନଗର ବିଚାରକର୍ତ୍ତା ନିଯୁକ୍ତ କଲେ। ⁶ସେ ବିଚାରକର୍ତ୍ତାମାନଙ୍କୁ କହିଲେ, “ତୁମ୍ଭେମାନେ ଯାହା କରୁଅଛ, ତାହା ବିଚାର କର; କାରଣ ତୁମ୍ଭେମାନେ ମନୁଷ୍ୟ ନିମନ୍ତେ ବିଚାର କରୁ ନାହଁ, ମାତ୍ର ଆମ୍ଭମାନଙ୍କ ପିତାଙ୍କ ନିମନ୍ତେ କରୁଅଛ, ପୁଣି ବିଚାର କରିବା ବେଳେ ସେ ତୁମ୍ଭମାନଙ୍କ ସଙ୍ଗେ ଅଛନ୍ତି। ⁷ଏବେ ଆମ୍ଭମାନଙ୍କ ପିତାଙ୍କ ଭୟ ତୁମ୍ଭମାନଙ୍କ ଉପରେ ଥାଉ। ସାବଧାନ ହୋଇ କାର୍ଯ୍ୟ କର; କାରଣ ଆମ୍ଭମାନଙ୍କ ପିତାଙ୍କ ଠାରେ କୌଣସି ଅନ୍ୟାୟ, କି ମୁଖାପେକ୍ଷା, କି ଲାଞ୍ଚ ନାହିଁ।”

⁸ଆହୁରି, ଆମ୍ଭମାନଙ୍କ ପିତାଙ୍କ ବିଚାର ସମ୍ପାଦନ କରିବାକୁ ଓ ବିବାଦ ମୀମାଂସା କରିବାକୁ ଯିହୋଶାଫଟ୍‌ ଯିରୂଶାଲମରେ କେତେକ ଲେବୀୟ, ଯାଜକ ଓ ଇସ୍ରାଏଲର ପିତୃବଂଶର ପ୍ରଧାନମାନଙ୍କୁ ନିଯୁକ୍ତ କଲେ; ସେମାନେ ଯିରୂଶାଲମକୁ ଫେରିଲେ। ⁹ସେ ସେମାନଙ୍କୁ ଆଜ୍ଞା ଦେଇ କହିଲେ, “ଆମ୍ଭମାନଙ୍କ ପିତାଙ୍କ ଭୟରେ, ବିଶ୍ଵସ୍ତ ଭାବରେ ଓ ସର୍ବାନ୍ତଃକରଣରେ ଏହିପରି କର। ¹⁰ଯେତେବେଳେ ଆପଣା ଆପଣା ନଗରବାସୀ ତୁମ୍ଭମାନଙ୍କ ଭ୍ରାତୃଗଣ ରକ୍ତପାତ ବିଷୟରେ, କିଅବା ବ୍ୟବସ୍ଥା ଓ ଆଜ୍ଞା, ବିଧି ଓ ଶାସନ ବିଷୟରେ ତୁମ୍ଭମାନଙ୍କ ନିକଟକୁ କୌଣସି ବିବାଦ ଆଣିବେ, ସେତେବେଳେ ତୁମ୍ଭେମାନେ ସେମାନଙ୍କୁ ସତର୍କ କରିଦେବ, ଯେପରି ସେମାନେ ଆମ୍ଭମାନଙ୍କ ପିତାଙ୍କ ଛାମୁରେ ଦୋଷୀ ହୋଇ ତୁମ୍ଭମାନଙ୍କ ଓ ତୁମ୍ଭମାନଙ୍କ ଭ୍ରାତୃଗଣ ଉପରେ କ୍ରୋଧ ନ ଆଣିବେ। ଏହା କର, ତେବେ ତୁମ୍ଭେମାନେ ଦୋଷୀ ହେବ ନାହିଁ। ¹¹ଏବେ ଦେଖ, ଆମ୍ଭମାନଙ୍କ ପିତାଙ୍କ ପ୍ରତ୍ୟେକ ବିଷୟରେ ପ୍ରଧାନ ଯାଜକ ଅମରୀୟ ତୁମ୍ଭମାନଙ୍କ ଉପରେ ଅଛନ୍ତି; ରାଜାଙ୍କ ପ୍ରତ୍ୟେକ ବିଷୟରେ ଯିହୂଦା ବଂଶର ଅଧିପତି ଇଶ୍ମାୟେଲର ପୁତ୍ର ସବଦୀୟ ଅଛନ୍ତି। ଲେବୀୟମାନେ ତୁମ୍ଭମାନଙ୍କ ସମ୍ମୁଖରେ କର୍ମଚାରୀ ହୋଇ ସେବା କରନ୍ତି। ବଳବାନ ହୋଇ କାର୍ଯ୍ୟ କର, ଆଉ ଆମ୍ଭମାନଙ୍କ ପିତା ସତ୍‌କର୍ମକାରୀମାନଙ୍କ ସଙ୍ଗେ ଥାଉନ୍ତୁ।”