Ithumwui Avāna Awui Apong Kaishi Awungali Hāngkhamachinna
Jehuna latungkahai awungali samphangda ngahāna: makhayābingli ngachonra ngarok mangla? Jehoshaphatna mibing peichaoda vāda bichar kasābing ngarānda ngahānkai; athumli hānga, nathumna mibingwui vang maningla ithumwui Avāwui vang bichar sai, kala awuili makhamashung, mijang, pheizāla maleimana.
19 1Judahwui awunga Jehoshaphatna Jerusalemli awui shimli chingri eina latunga. 2Hananiwui naomayara marān Jehuna awunga Jehoshaphatli samphangda hānga, "Nana makhayābingli ngachonda, ithumwui Avāli yangkakharingbingli leishirala? Hiwui vang eina ithumwui Avāwui eina malungkhavāt nawuitungli lei. 3Chithālala nawuili kaphā samphanga, kaja nana ngalei chiwui eina Asherim sātekserhaida, kala ithumwui Avāli ningtongda phaira."
4Jehoshaphatna Jerusalemli sompama, kala Beer-shebawui eina Ephraimwui kaphungram peida luishit mibingwui ngachaili kayāngli thuilaga athumli ithumwui Avā, athumwui avāva̱ ngarāwui Vareli ning latung ngasaka. 5Ana ngalei chili Judahwui raipan sākahai keinung saikorali keinung kachida bichar kasābing kapangkhui. 6Ana bichar kasābingli hānga, "Nathumna khi sālikhala kaji nganātitkhuilu, kaja nathumna mibingwui vang maningla, ithumwui Avāwui vang bichar sai, kala nathumna bichar sāki kaji tuishot kachida ana nathumli ngasoda lei. 7Arui ithumwui Avāli khangacheela nathumwuitungli leiranu. Ning ngasharda ot sālu, khikhalajila ithumwui Avāwuili makhamashung maleimana, mijang maleimana, kala pheizāla maleimana."
8Chithādala Jerusalemli, Jehoshaphatna Levinaobing kaikha, pāngmonbing kala Israelwui avāva̱ ngarāwui shimkhurwui akhavābing kaikhali ithumwui Avāwui bichar sākhavai kala khonzar khangarok kupkhui khavai kapangkhui; kala athum Jerusalemli latunga. 9Ana athumli kasoi, "Ithumwui Avāli khangachee eina, ningtongda kala ning tharchao eina chithāda ot sālu. 10Athumwui keinungli khalei nathumwui achinā ngarāna ashee moreiwui vang, maningkha ain kala ningkhami, shiyan kala shiyan-chikanwui vang nathumli tuishot khuirā tharan, athumli hāngmathilu; chithākha athumna ithumwui Avāwui mangāli morei maphungmara, kala nathum kala nathumwui achinā ngarāwuitungli malungkhavāt mashokmara. Hi sālu, chithākha nathumna morei maphungmara. 11Arui pāngmon kharei Amariahna ithumwui Avāwui otsak kachiva̱li nathumwuitungli yangmi; Judah shangwui kathāna Ishmaelwui naomayara Zebadiahna awungawui otsak kachiva̱li nathumwuitungli yangmira. Kala Levinaobing nathumwui mangāli otva̱bing sāda otram ngatha̱ra. Nganingkhui kahai eina ot sālu. Ithumwui Avāna kaphā kasābingli ngasoda leiranu."
