2ይ ዜና 19 FHB Father's Heart Bible™

19 ¹ኢዮሳፍጥ ንጉስ ይሁዳ ናብ ቤቱ ናብ ኢየሩሳሌም ብሰላም ተመለሰ። ²ኢዩ ወዲ ኣናኒ እቲ ረኣዪ ንንጉስ ኢዮሳፍጥ ተራኸቦ፤ ከምዙይ ኢሉ ኸዓ ጠየቖ፦ “ንሓጥኣን ክትሕግዝ፥ ነቶም ንኣቦና ዝፀልኡ ድማ ከተፍቅሮም ይግበኣካዶ? ስለዙይ ቍጥዓ ካብ ኣቦና ኣብ ልዕሌኻ ኣሎ። ³ኾይኑ ግና ፅቡቕ ነገር ኣባኻ ተረኺቡ ኣሎ፤ ነቶም ሓወልቲ ጣዖት ኣስታሮት ካብ ምድሪ ኣወጊድካ፥ ልብኻ ድማ ንኣቦና ንምድላይ ኣንቢርካ።”

⁴ኢዮሳፍጥ ኣብ ኢየሩሳሌም ተቐመጠ፤ ሽዑ ድማ ካብ ቤርሳቤህ ክሳዕ ደጕዓ ኤፍሬም ናብ ህዝቢ መሊሱ ወፀ፤ ናብ ኣቦና፥ ናብ ኣምላኽ ኣቦታቶም ከዓ ክምለሱ ገበሮም። ⁵ኣብ ምድሪ፥ ኣብ ኵለን ዝተዓረዳ ከተማታት ይሁዳ፥ በብከተማ ፈረድቲ ሸመ። ⁶ነቶም ፈረድቲ ከዓ ከምዙይ በሎም፦ “እትገብርዎ ተመልከቱ፤ ንሰብ ዘይኮነ ንኣቦና ኢኹም እትፈርዱ ዘለኹም፤ ንሱ ኸዓ በቲ እትፈርድዎ ዅሉ ነገር ምሳኻትኩም እዩ። ⁷ሕዚ ኸዓ ፍርሓት ኣቦና ኣብ ልዕሌኹም ይኹን። ኣብ ኣቦና ዓመፅ የለን፥ ኣድልዎ የለን፥ ጉቦ ምቕባልውን የለን እሞ፥ ተጠንቂቕኩም ግበሩ።”

⁸ኢዮሳፍጥ ከዓ ኣብ ኢየሩሳሌም፥ ፍርዲ ኣቦና ንምፍፃም፥ ክርክር ንምፍራድ፥ ገሊኣቶም ሌዋውያንን ካህናትን ኣሕሉቕ ዓሌት ኣቦታት እስራኤልን ሸመ፤ ናብ ኢየሩሳሌም ድማ ተመለሱ። ⁹ከምዙይ ኢሉ ድማ ኣዘዞም፦ “ብፍርሓት ኣቦና፥ ብእምነትን ብምሉእ ልብኹምን ከምዙይ ግበሩ። ¹⁰እቶም ኣብ ከተማታቶም ዝነብሩ ኣሕዋትኩም ዝኾነ ክርክር፥ ብዛዕባ ደም ይኹን ብዛዕባ ሕግን ትእዛዝን ስርዓትን ፍርድን እንተ ኣምፅኡልኩም፥ ኣብ ቅድሚ ኣቦና ሓጢኣት ከይስከሙ፥ ኣብ ልዕሌኹምን ኣብ ልዕሊ ኣሕዋትኩም ከዓ ቍጥዓ ከየምፅኡ ኣጠንቅቕዎም። ከምዙይ ግበሩ፥ ሓጢኣትውን ኣይክትስከሙን ኢኹም። ¹¹እንሆ፥ ኣማርያስ እቲ ሊቀ ካህናት ብዅሉ ነገር ኣቦና ኣብ ልዕሌኹም ሓላፊ እዩ፤ ዘባድያስ ወዲ እስማኤል፥ ሹም ነገድ ይሁዳ ድማ ብዅሉ ነገር ንጉስ ኣብ ልዕሌኹም እዩ። ሌዋውያን ድማ ኣብ ቅድሜኹም ከም ኣሕሉቕ የገልግሉ። ፅንዑ ግበሩውን፤ ኣቦና ምስቶም ፅቡቕ ዝገብሩ ይኹን።”