2ይ ዜና 18 FHB Father's Heart Bible™

18 ¹ኢዮሳፍጥ ብዙሕ ሃብትን ክብረትን ነበሮ፤ ምስ ኣክኣብ ከዓ ብመውስቦ ተኣሳሰረ። ²ድሕሪ ብዙሕ ዓመታት ድማ ናብ ኣክኣብ ናብ ሰማርያ ወረደ፤ ኣክኣብ ከዓ ንእኡን ነቶም ምስኡ ዝነበሩ ህዝብን ብዙሕ ኣባጊዕን ኣብዑርን ሓረደሎም፤ ናብ ሬማት ዘገለዓድ ደዪቡ ክዋጋእ ድማ ኣበራትዖ። ³ኣክኣብ ንጉስ እስራኤል ድማ ንኢዮሳፍጥ ንጉስ ይሁዳ “ናብ ሬማት ዘገለዓድ ምሳይ ከይድካዶ?” በሎ። ንሱ ኸዓ “ኣነ ኸማኻ፥ ህዝበይ ከም ህዝብኻ እዩ፤ ኣብቲ ውግእ ምሳኻ ኢና” ኢሉ መለሰሉ።

⁴ኢዮሳፍጥ ግና ንጉስ እስራኤል “በጃኻ ቅድም ቃል ኣቦና ድለ” በሎ።

⁵ሽዑ ንጉስ እስራኤል ነቶም ነቢያት፥ ኣርባዕተ ሚእቲ ሰብኣይ፥ ኣከበ፤ “ናብ ሬማት ዘገለዓድ ክንዋጋእ ንኺድ፥ ወይ ክንተርፍ?” ኢሉ ድማ ሓተቶም። ንሳቶም ከዓ “ደይብ፤ እግዚኣብሄር ናብ ኢድ ንጉስ ኣሕሊፉ ክህቦ እዩ እሞ” በሉ።

⁶ኢዮሳፍጥ ግና “ኣብዙይ ገና እንጥይቖ ነቢይ ኣቦናዶ የለን?” በለ።

⁷ንጉስ እስራኤል ድማ ንኢዮሳፍጥ “ብእኡ ጌርና ንኣቦና እንጥይቖ ሓደ ሰብኣይ ተሪፉ ኣሎ፤ ኣነ ግና እፀልኦ እየ፤ ብዛዕባይ ፅቡቕ ዘይኮነ፥ ክፉእ ጥራሕ ይንበየለይ እዩ እሞ። ንሱ ሚክያስ ወዲ ይምላ እዩ” በሎ። ኢዮሳፍጥ ከዓ “ንጉስ፥ ከምኡ ኣይበል” ኢሉ መለሰ።

⁸ሽዑ ንጉስ እስራኤል ንሓደ ሹመኛ ፀዊዑ “ንሚክያስ ወዲ ይምላ ቀልጢፍካ ኣምፅኣዮ” በሎ።

⁹ንጉስ እስራኤልን ኢዮሳፍጥ ንጉስ ይሁዳን ድማ ልብሰ መንግስቲ ተኸዲኖም፥ ኣብቲ ኣብ ኣፍ ደገ ሰማርያ ዝርከብ ኣደባባይ፥ ነፍሲ ወከፍ ኣብ ዝዙፋኑ ተቐሚጦም ነበሩ፤ ኣብ ቅድሚኦም ድማ ኵሎም እቶም ነቢያት ይንበዩ ነበሩ። ¹⁰ሴዴቅያስ ወዲ ክንዓና ከዓ ናይ ሓፂን ኣቕርንቲ ሰርሐ፤ ከምዙይ ድማ በለ፦ “እግዚኣብሄር፦ ‘ንሶርያውያን ክሳዕ ዝጠፍኡ በዚኣተን ክትወግኦም ኢኻ’ ይብል ኣሎ።”

¹¹ኵሎም እቶም ነቢያት ድማ ከምኡ “ንሬማት ዘገለዓድ ውረራ፤ ክቐንዐካ እዩ፤ ኣቦና ድማ ናብ ኢድ ንጉስ ኣሕሊፉ ክህቦ እዩ” ኢሎም ተነበዩ።

¹²እቲ ንሚክያስ ክፅውዕ ዝኸደ ልኡኽ ድማ “እንሆ፥ ቃላት እቶም ነቢያት ብሓደ ኣፍ ንጉስ የቕንዑሉ ኣለዉ፤ ቃልካ ድማ ከም ቃል ሓደ ኻባታቶም ይኹን እሞ ፅቡቕ ተዛረብ” በሎ።

¹³ሚክያስ ግና “እቲ ኣቦይ ዝብለኒ ጥራሕ ከም ዝዛረብ ብህያው ኣቦና እምሕል ኣለኹ” በለ።

¹⁴ንሱ ናብ እቲ ንጉስ ምስ ቀረበ ድማ፥ እቲ ንጉስ “ሚክያስ፥ ናብ ሬማት ዘገለዓድ ክንዋጋእ ንኺድ፥ ወይ ክተርፍ?” በሎ። ንሱ ኸዓ “ደይብ፤ ክቐንዐካ ድማ እዩ፤ ናብ ኢድካ ኣሕሊፎም ክወሃቡ እዮም” በሎ።

¹⁵እቲ ንጉስ ግና “ብስም ኣቦና ሓቂ ጥራሕ ክትነግረኒ ክንደይ ሳዕ ከምሕለካ?” በሎ።

¹⁶ሚክያስ ከዓ “ንብዘሎ እስራኤል፥ ጓሳ ኸም ዘይብለን ኣባጊዕ ኮይኖም፥ ኣብ ኣኽራን ተበቲኖም ርኤኽዎም። ኣቦና ድማ ‘እዚኣቶም ጐይታ የብሎምን እሞ፥ ነፍሲ ወከፍ ብሰላም ናብ ቤቱ ይመለስ’ በለ” በለ።

¹⁷ንጉስ እስራኤል ከዓ ንኢዮሳፍጥ “ብዛዕባይ ፅቡቕ ዘይኮነ፥ ክፉእ ጥራሕ ከም ዝንበየለይ ኣይበልኩኻንዶ?” በሎ።

¹⁸ሚክያስ ድማ “እምበኣር ቃል ኣቦና ስማዕ፦ ኣቦና ኣብ ዙፋኑ ተቐሚጡ፥ ኵሉ ሰራዊት ሰማይ ድማ ኣብ የማኑን ኣብ ፀጋሙን ደው ኢሉ ርኤኹ።

¹⁹ኣቦና ድማ ‘ንኣክኣብ ንጉስ እስራኤል ናብ ሬማት ዘገለዓድ ክድይብ እሞ ኣብኣ ክወድቕ መን የጋግዮ?’ በለ። ሓደ ኸምዙይ፥ ካልእ ድማ ኸምቱይ በለ።

²⁰ሓደ መንፈስ ድማ ወፂኡ ኣብ ቅድሚ ኣቦና ደው ኢሉ ‘ኣነ ኸጋግዮ’ በለ። ኣቦና ኸዓ ‘ከመይ ጌርካ?’ በሎ።

²¹ንሱ ድማ ‘ወፂአ ኣብ ኣፍ ኵሎም ነቢያቱ ሓሳዊ መንፈስ ኮይነ ክዛረብ እየ’ በለ። ኣቦና ኸዓ ‘ክተጋግዮ ድማ ክትስዕር ኢኻ እሞ፥ ኪድ ከምኡ ግበር’ በለ።

²²ሕዚ ድማ፥ ኣቦና ኣብ ኣፍ እዞም ነቢያትካ እዚኣቶም ሓሳዊ መንፈስ ኣንቢሩ ኣሎ፤ ኣቦና ኸዓ ኣብ ልዕሌኻ ክፉእ ተዛሪቡ ኣሎ” በለ።

²³ሽዑ ሴዴቅያስ ወዲ ክንዓና ቐሪቡ ንሚክያስ መትልሑ ፀፍዖ፤ “እቲ መንፈስ እግዚኣብሄር ብኣኻ ክዛረብ ካባይ መኣዝ ሓሊፉ?” በሎ።

²⁴ሚክያስ ከዓ “ኽትሕባእ ናብ ውሻጠ ምስ ከድካ፥ በታ መዓልቲ እቲኣ ኽትርኢ ኢኻ” በሎ።

²⁵ንጉስ እስራኤል ድማ “ንሚክያስ ናብ ኣሞን ኣመሓዳሪ እታ ኸተማን ናብ ኢዮኣስ ወዲ ንጉስን መሊስካ ውሰዶ፤ ²⁶ከምዙይ ድማ በልዎም፦ ‘ነዝ ሰብኣይ እዙይ ኣሲርኩም ኣብ ቤት ማእሰርቲ ኣእትውዎ፤ ኣነ ብደሓን ክሳዕ ዝምለስ ከዓ፥ እንጀራ መከራን ማይ መከራን ጥራሕ ሃብዎ’ ይብል ኣሎ ንጉስ” በለ።

²⁷ሚክያስ ከዓ “ብሓቂ ብሰላም እንተ ተመሊስካ፥ ኣቦና ብኣይ ኣይተዛረበን” በለ። ቀፂሉ ድማ “ኣቱም ኵላትኩም ህዝቢ፥ ስምዑ!” በለ።

ኣክኣብ ከምቲ ኣቦና ዝተነበዮ ወደቐ

²⁸ሽዑ ንጉስ እስራኤልን ንጉስ ይሁዳ ኢዮሳፍጥን ናብ ሬማት ዘገለዓድ ደየቡ። ²⁹ንጉስ እስራኤል ድማ ንኢዮሳፍጥ “ኣነ መልክዐይ ለዊጠ ናብ ውግእ ክኣቱ፥ ንስኻ ግና ናይ መንግስቲ ክዳንካ ተኸደን” በሎ። ሽዑ ንጉስ እስራኤል መልክዑ ለዊጡ፥ ናብ ውግእ ኣተዉ። ³⁰ንጉስ ኣራም ድማ ነቶም ኣሕሉቕ ሰረገላታቱ “ንሓደ ሰብ እኳ፥ ንእሽተይ ኾነ ዓብዪ፥ ኣይትዋግኡ፤ ንንጉስ እስራኤል ጥራሕ ደኣ እምበር” ኢሉ ኣዘዞም።

³¹እቶም ኣዘዝቲ ሰረገላታት ንኢዮሳፍጥ ምስ ረኣይዎ፥ “እዝ ንጉስ እስራኤል እዩ” በሉ፤ ክዋግእዎ ኸዓ ናብኡ ገፆም መለሱ። ኢዮሳፍጥ ግና ኣእወየ፥ ኣቦና ድማ ረድኦ፤ ካብኡ ኸዓ ኣግለሶም። ³²ንሱ ንጉስ እስራኤል ከም ዘይኮነ ምስ ፈለጡ ድማ፥ እቶም ኣዘዝቲ ሰረገላታት ካብ ምስዓብ ተመለሱ። ³³ሓደ ሰብኣይ ድማ ቀስቱ ናብ ዝወረደት ትውረድ ኢሉ ገቲሩ ነቲ ንጉስ እስራኤል በቲ መጋጠሚ ድርዒ ወግኦ። ንሱ ኸዓ ነቲ ሰረገላኡ ዝዝውር ሰብ “ኣነ ቖሲለ ኣለኹ እሞ፥ ተመሊስካ ካብዚ ውግእ ኣውፅኣኒ” በሎ። ³⁴በታ መዓልቲ እቲኣ ድማ እቲ ውግእ በርትዐ፤ ንጉስ እስራኤል ከዓ ኣብ ሰረገላኡ ተደጊፉ ክሳዕ ምሸት ንሶርያውያን ኣማዕድዩ ይሪኦም ነበረ፤ ፀሓይ ምስ ዓረበት ድማ ሞተ።