2 Thotrinchān 18

18 ¹Chitharan Jehoshaphatwui kashāng kala khayākakā kachungkhana, kala ana fathui eina Ahabli ngashika. ²Zingkum kaikha khaleilaga ana Samariali Ahabli vai, chili Ahabna awui vang kala ali khangaso mibingwui vang yao kala mukkā kachungkha taithatmi, kala Ramoth-gileadli angarar khavai ali sui. ³Israelwui awunga Ahabna Judahwui awunga Jehoshaphatli ngahāna, "Nana ili khangaso Ramoth-gileadli vārala?" Ana ngahānkai, "I kala na akhana, iwui mibingla nawui mibingna; ithumna raili nathumli zangra."

⁴Kha Jehoshaphatna Israelwui awungali hānga, "Sāngngarānda ithumwui Avāwui tui ngahānlu."

⁵Chieina Israelwui awungana marān mi shāmati kazipkhuilaga athumli ngahāna, "Ithumna Ramoth-gileadli rai khavai vāra, lah mavāla?" Athumna hānga, "Angararlu, kaja Varena awungawui pāngli horsangmira."

⁶Kha Jehoshaphatna hānga, "Ithumna awui tui ngahānkhui khavai ithumwui Avāwui marān akha aruila hili maleimalā?"

⁷Israelwui awungana Jehoshaphatli hānga, "Ithumwui Avāli ngahān khavai mi akha leifaya, kha ina ali ningkachaiya; kaja ana iwui vang khamathā akhala mahāngmila, zakkashi maningla hāngmi. Ana Imlahwui naomayara Micaiah china." Jehoshaphatna ngahānkai, "Awungana chithāda mahāngmialu."

⁸Chitharan Israelwui awungana kathāna akhali hokhuilaga, "Thākta Imlahwui naomayara Micaiahli ahokhuilu" da hānga.

⁹Israelwui awunga eina Judahwui awunga Jehoshaphatna sāri ngavaikhuilaga Samariawui ngavei zangkhavaili lanpumli kachiva̱ awui wungpamkhongli pama, kala marān saikorana athumwui mangāli marānsai. ¹⁰Chenaanahwui naomayara Zedekiahna mariwui angaji sākhuilaga hānga, "Varena hānga, 'Masāshimānmiranglakha eina tangda nana hi eina Aramnaobingli muivāra.'"

¹¹Marān saikorana akha thada marānda hānga, "Ramoth-gileadli angararda khayui ngasalu; ithumwui Avāna awungawui pāngli horsangmira."

¹²Micaiahli hokhui khavai chihovā kahai paomena ali hānga, "Yanglu, marānbingwui tui saikorana awungawui vang khamathā hānga; ara nawui tuila athumwui tui thada ngasaklu, khamathā hānglu."

¹³Kha Micaiahna, "Ithumwui Avāwui ming singda kahāngna, iwui Avāna hānglu kaji tui chi ina hāngra" da ngahānkai.

¹⁴Ana kharā tharan, awungana ali hānga, "Micaiah, ithumna Ramoth-gileadli rai khavai vāra, lah I mavāla?" Ana ngahānkai, "Angararda khayui ngasalu; athumli nawui pāngli horsangmira."

¹⁵Kha awungana ali hānga, "Ithumwui Avāwui ming eina khamashung mangmāng ili hānglu da, ina kayākhashida nali khangashit sāngasakphalungra?"

¹⁶Micaiahna hānga, "Israel saikora yaokahoma maleila yao thada, kaphungli raithā kahai ina thei. Kala ithumwui Avāna hānga, 'Athumli akhavā maleimana; kachiva̱ chingri kahai eina awui shimli hanungserulu.'"

¹⁷Israelwui awungana Jehoshaphatli ngahānkai, "Ana iwui vang khamathā akhala mahāngmila, makaphā maningla hāngmi da, ina nali mahāngmala?"

¹⁸Micaiahna hānga, "Chithākha ithumwui Avāwui tui nganālu: Ithumwui Avāna awui wungpamkhongli pamda kazingramwui ashangva̱ saikora awui yāpang kala yashongli khanganing chi ina thei.

¹⁹Kala ithumwui Avāna hānga, 'Israelwui awunga Ahabli Ramoth-gileadli vāda pitā khavai khipāna asuinikhala?' Akhana hi da hānga, khangatei akhana chi da hānga.

²⁰Manglā akhana rānganailaga ithumwui Avāwui mangāli nganingda hānga, 'Ina asuira.' Kala ithumwui Avāna ali ngahāna, 'Kathāda asuirakhala?'

²¹Ana hānga, 'Ina vāda awui marān saikorawui khamorli kakapik matui manglā sangmira.' Chieina ithumwui Avāna hānga, 'Nana ali asuira kala yuishapra. Vāda asāulu.'

²²Chiwui vang eina ara ithumwui Avāna kakapik matui manglā akha nawui marānbing hiwui khamorli zanghaira, kala ithumwui Avāna nawuitungli kalākashi hānghaira."

²³Chieina Chenaanahwui naomayara Zedekiahna rānganailaga Micaiahwui maisorli kapheya, kala, "Iwui eina shoklaga, Varewui Manglā kathāda nali ramatuipairakhala?" da ngahāna.

²⁴Micaiahna hānga, "Nana shimlungli zangngathum thanghon chitharan theinaora."

²⁵Israelwui awungana hānga, "Micaiahli khuida keinungwui rammunga Amon kala awungawui naomayara Joashli latunglu, ²⁶kala hānglu, 'Awungana hānga, I hapkakhano maleilakla latungranglakha eina tangda mipā hili phātopli narlu, kala kashakazā kala tara̱ kasha̱khamang milu.'"

²⁷Micaiahna hānga, "Nana hapkakhano maleilakla latungakha, ithumwui Avāna iwui eina mahāngmana." Kala ana hānga, "Mibing saikora, nganāserlu!"

Avāna Sāngngarānda Hāngkahai Kathāda Ahab Pitāhao

²⁸Chieina Israelwui awunga kala Judahwui awunga Jehoshaphatna Ramoth-gileadli angararda vai. ²⁹Israelwui awungana Jehoshaphatli hānga, "Ina azak ngacheikhuilaga raipamli vāra, kha nava nawui wungsāri shaksāpapamlu." Chieina Israelwui awungana azak ngacheikhuilaga, athum raipamli vāhaowa. ³⁰Aramwui awungana awui siguigari kathānabingli kasoda hānga, "Kateo kahak khipālikha mangararalu, kha Israelwui awunga mānga ngararlu."

³¹Siguigari kathānabingna Jehoshaphatli theilaga "Chi Israelwui awunga hilaka" da hānga, kala ali ngarar khavai ngareivai. Kha Jehoshaphatna vāoshoka, kala ithumwui Avāna ali ngachonmida, athumli awui eina ngashamshoka. ³²Siguigari kathānabing china ana Israelwui awunga maningmana chi kathei eina, athumna ali makharomluila hanungserhaowa. ³³Mi akhana kapphāphā kaji eina malā hunlaga Israelwui awungawui thikom ngachaili chāngvei eina zanghaowa; chieina awui siguigari kathaowali, "Ngareikhuilaga raipamwui eina ili phungunghaolu; I khamā za̱haira" da kasoi. ³⁴Chithang rai sakkachangkhathaowa. Israelwui awunga ngazin eina tangda Aramnaobingli ngaherlaga awui siguigarili khāngthotmikahaida lei, kala zimik katun eina thihaowa.