Koyaigei Jehoshaphat ak Ahab
Ki yaigei Jehoshaphat tilyonut ak koot ne po Ahab, ak kochamgei kobar Ramot-gilead, yeityo koteebe maotyotap Kwandanyo. Mikaia kityo ne mwae ne kas iman—keechiirek che samis, ak tamirmiryet ne lembei eng' kutigap maotik—ak rotweet ne ki wirir koigeny koboorunegei kole imanda.
Ng'alaali Kwandanyo eng' mustari 19
18 1Ki tinyei Jehoshaphat mogornatosyek ak teegisto che eecheen, ak ki yaigei koek tilyonut ak Ahab. 2Kingobata kenyiisyek alak, ki wo koit Ahab eng' Samaria, ole ki par Ahab keechiirek ak tuuga che chaang' agobo ineendet ak piik che ki mi ak ineendet, kobirchin si kotogos Ramot-gilead kobar. 3Ki mwachi Ahab laitoryatap Israel Jehoshaphat laitoryatap Judah koleenji, “Ibei ak anee Ramot-gilead?” Ki wol koleenji, “Aa ko uu inyee, ak piikyuk ko uu piiguk; kibooto okweek eng' lugeet.”
4Ago ki leenji Jehoshaphat laitoryatap Israel, “Cheeng' taa ng'olyootap Kwandanyo.”
5Ki yum anyun laitoryatap Israel maotik, murenik pogol ang'wan, ak komwachi icheek koleenji, “Kibe lugeet Ramot-gilead, anan ketebi?” Ak kole icheek, “Togoste, amu indoi Kamuktaindet eutap laitoryat.”
6Ago ki le Jehoshaphat, “Tos ma ta komi yu maotyotap Kwandanyo ne kimuuchi keteebe eng' ineendet?”
7Ki mwachi laitoryatap Israel Jehoshaphat koleenji, “Mi chiito age ne kimuuchi keteepse eng' ineendet Kwandanyo, ago aweche ineendet, amu ma maoteni agobo anee tuguuk che myee, ago yaityet kityo. Mikaia weeriitap Imla ineendet.” Ak ki wol Jehoshaphat, kole, “Amat komwa laitoryat ko uu no.”
8Ki guur anyun laitoryatap Israel kiptaiyat age ak koleenji, “Imutu Mikaia weeriitap Imla ichogune.”
9Kitebee laitoryatap Israel ak Jehoshaphat laitoryatap Judah, chii tugul eng' ng'echerennyi ne po laitornatet, kolaachi ngoroik, eng' ole paraa ne mi kurgeetap nganaseetap Samaria; ak kimaotenso maotik tugul taitap icheek. 10Kiyachigei Zedekiah weeriitap Kenaana kuinoigap kariik, ak kole, “Kamwa Kamuktaindet ko uu ni, kole: ‘Itoortae chuuto piigap Syria, kot kogeskei.’ ”
11Kimaotenso maotik tugul ko uu nooto, kole, “Togoste Ramot-gilead, ak iboor! Amu indoi Kwandanyo eutap laitoryat.”
12Ki leenji chiito ne ki kiyookto si koguur Mikaia koleenji, “Ng'aleegap maotik tugul ko che myee agobo laitoryat. Ingorategei ng'olyoong'ung' ak nenywa, imwae inyee ne myee.”
13Ago ki le Mikaia, “Ko uu ye sabei Kwandanyo, amwae kityo ne mwaiwo Kwandanyu.”
14Kingo it ineendet, koleenji laitoryat, “Mikaia, kibe lugeet Ramot-gilead, anan ketebi?” Ak kowol, “Togoste ak iboor; ko kindoi eung'ung'.”
15Ago ki leenji laitoryat ineendet, “Oo ata che akuukyin si imwaiwo kityo ne iman eng' kainetap Kwandanyo?”
16Ki le Mikaia, “Kaageer Israel tugul kabaiygei eng' tulweet, ko uu keechiirek che ma tinyei mestowondennywa. Ak kole Kwandanyo, ‘Ma tinyei icheek masta; ingoweekyigei chii tugul koonnyi eng' kaalyeet.’ ”
17Ki mwachi laitoryatap Israel Jehoshaphat koleenji, “Tos mamwaun ale, ma kiy ne myee agobo anee ne maoteni ineendet, ago yaityet kityo?”
18Ki le Mikaia, “Ogas anyun ng'olyootap Kwandanyo: Kaageer Kwandanyo kotebee ng'echereetap laitornatennyi, ak lugoosyek tugul che po kipsengwet che tononi eunnyi ne po tai ak ne po kaataam.
19Ak ki le Kwandanyo, ‘Ng'oo ne iberberi Ahab laitoryatap Israel, si kwo kotogosta ak kome eng' Ramot-gilead?’ Ki mwa age ko uu ni, komwa age ko uu ni.
20Konyo anyun tamirmiryo age kotonon eng' taitap Kwandanyo, ak kole, ‘Anee ne aberberi.’ Ak ki mwachi Kwandanyo ineendet koleenji, ‘Iberbertoi ano?’
21Ak ki le, ‘Awendi ak aegu tamirmir ne kenisyei eng' kutusweegap maotikyik tugul.’ Ak ki le Kwandanyo, ‘Iberberi ineendet ak iterteer; ui anyun ak iyai ko uu nooto.’
22Ara anyun, keero, kainde Kwandanyo tamirmir ne kenisyei eng' kutusweegap maotiguk chuuto tugul. Kagomwa Kwandanyo yaityet agobo inyee.”
23Konyo koriik Zedekiah weeriitap Kenaana, ak korabach Mikaia cheeng', ak koleenji, “Kabwa ano Kabuusetap Kamuktaindet kobun anee si kong'alaalun?”
24Ki le Mikaia, “Igeere kiito eng' peetuunooto ye iwendi koot ne po oriit si iunyegei.”
25Ki le laitoryatap Israel, “Onam Mikaia oweekte ole mi Ammon ne pounindetap nganaseet ak ole mi Joash ne weeriitap laitoryat, 26ak koleenji, ‘Kamwa laitoryat ko uu ni, kole: Onde chiichi korgoreet, obae ineendet amitwogigap nyalilda ak peegap nyalilda agoi aweigei eng' kaalyeet.’ ”
27Ki le Mikaia, “Ngo iweigei eng' kaalyeet, ko ma ko ng'alaal Kwandanyo eng' anee.” Ak ki le, “Ogas, okweek piik tugul!”
Kome Ahab ko uu ye ki mwa Kwanda
28Ki togosta anyun laitoryatap Israel kobooto Jehoshaphat laitoryatap Judah koba Ramot-gilead. 29Ki mwachi laitoryatap Israel Jehoshaphat, “Awalgei aegu chii age, awe lugeet, ago inyee ilaach ngoroiguk.” Kowalgei anyun laitoryatap Israel koek age, ak ki pa icheek lugeet. 30Ki ng'at laitoryatap Syria kiptainigap kariisyekyik koleenji, “Amobarge ak chii age tugul, ne ming'in anan ne oo, ago laitoryatap Israel kityo.”
31Kingo keer kiptainigap kariisyek Jehoshaphat, kole, “Niito laitoryatap Israel,” ak kowelelgei kobargei ak ineendet. Ago kiwaach Jehoshaphat, ak kotoret Kwandanyo; ak ki isto icheek koba loo kobun ineendet. 32Kingo keer kiptainigap kariisyek kole ma ineendet laitoryatap Israel, koweek kobagaakta ooreet ne ki oone ineendet. 33King'i chiito age kwangennyi ma ngen ole kobendi, ak kotyech laitoryatap Israel kwenutap kariikyik che ki ilaachi. Ak komwachi chiito ne kweryei charunee, “Welgei ak imuta eng' lugeet; amu kaariich.” 34Kitesak lugeet peetuunooto. Ak ki kiti laitoryatap Israel eng' chepkichutinnyi kotokyigei piigap Syria agoi koskoleny, yeityo kome ye kagororokta asiista.