Teechi Kwandanyo Laitoryannyi ne Kolooitun
Ki tuiyo Jehu laitoryat ne weekyigei, koteebe koleenji, kele tos nyolu itoret che ya? Ki wol Jehoshaphat eng' kosup piik ak konde kirwoogik, koleenji kele oirwookyin Kwandanyo ko ma piik, ak kele ma mi eng' ineendet ne ma po iman, anan tiytaet, anan kagaigaet.
19 1Ki weekyigei Jehoshaphat laitoryatap Judah eng' kaalyeet koonnyi ne mi Jerusalem. 2Ki tuiyo Jehu weeriitap Hanani keerindet laitoryat Jehoshaphat ak koteebee koleenji, “Tos nyoljin itoret kiptengeginik ak icham icheek che wechei Kwandanyo? Amu nooto, mi nereegek che punu Kwandanyo paragung'ung'. 3Ago mi ne myee eng' inyee: kaianemu Aserik eng' emet ak kagonde muguleldang'ung' si icheeng' Kwandanyo.”
4Ki meny Jehoshaphat Jerusalem, kweityo kogeny komong' eng' piik, kong'eetyo Beer-sheba agoi emetap tuloonoogap Ephraim, koweechini icheek koweekyigei Kwandanyo, Kamuktaindetap kwanisyekwak. 5Ki konde kirwoogik eng' emet, eng' nganasook tugul che king'ot che po Judah, nganaseet age tugul. 6Ki leenji kirwoogik koleenji, “Ogeer kiit ne oyai—amu moirwookyin piik ago oirwookyin Kwandanyo, ak mi ineendet kobooten eng' kirwooget age tugul ne obesye. 7Ara anyun, ingotebee iyweetap Kwandanyo paragung'wong'. Oriipkei ak oyai, amu ma mi eng' Kwandanyo ne ma po iman, anan tiytaet, anan kagaigaet.”
8Ki konde kora Jehoshaphat eng' Jerusalem Lawiik alak, ak tisiik, ak pounigap ortinwegap piigap Israel, si koyai kirwoogetap Kwandanyo ak kobesyee ng'aleek; ak ki weekyigei icheek Jerusalem. 9Ki ng'atyi icheek koleenji, “Oyai ko uu ni, eng' iyweetap Kwandanyo, eng' imanit ak eng' mugulelwekwok tugul. 10Ye kaibu tupchosyekwok che menyei nganasookwak ng'olyoot—agobo korotiik, anan agobo ng'atuutik ak ng'atuutyet, kaneetisyosyek ak kirwoogutik—oteechi icheek, si mata koip tengekto eng' taitap Kwandanyo, koip nereegek paragung'wong' ak tupchosyekwok. Oyai ni, ak momoib tengekto. 11Ara anyun, Amaria tisiindet ne oo ko riibin okweek eng' ng'olyoot age tugul ne po Kwandanyo; ak Zebadia weeriitap Ishmael, pounindetap pororyetap Judah, eng' ng'olyoot age tugul ne po laitoryat. Boisyei Lawiik koek pounik eng' taing'wong'. Onyiganitu ak oyai—ingoek Kwandanyo kobooten icheek che yaei ne myee.”