2 Mga Cronicas 19

19 ¹Luwas nga nakabalik si Jehoshaphat nga hari sa Juda ngadto sa iyang balay sa Jerusalem. ²Gisugat ni Jehu nga anak ni Hanani nga mananagna si Haring Jehoshaphat ug nangutana, “Angay ba nimong tabangan ang mga daotan ug higugmaon ang mga nagdumot sa atong Amahan? Tungod niini, ania kanimo ang kapungot gikan sa atong Amahan. ³Apan may maayo nga nakita diha kanimo: gihawan nimo ang mga haligi ni Ashera gikan sa yuta ug gipahimutang nimo ang imong kasingkasing sa pagpangita sa atong Amahan.”

⁴Mipuyo si Jehoshaphat sa Jerusalem, unya migawas siya pag-usab taliwala sa katawhan, gikan sa Beersheba hangtod sa kabungtoran sa Efraim, nga nagpabalik kanila ngadto sa atong Amahan, ang Dios sa ilang mga katigulangan. ⁵Nagtudlo siyag mga maghuhukom sa yuta, sa tanang kinutaang mga siyudad sa Juda, siyudad sa matag siyudad. ⁶Miingon siya sa mga maghuhukom, “Tan-awa kon unsa ang inyong buhaton—kay naghukom kamo dili alang sa mga tawo kondili alang sa atong Amahan, ug anaa siya uban kaninyo sa matag kaso nga inyong hukman. ⁷Karon paabota diha kaninyo ang kahadlok sa atong Amahan. Pagbantay ug paglihok, kay sa atong Amahan walay pagkadili-matarong, walay pagpalabi, walay pagdawat ug hiphip.”

⁸Sa Jerusalem usab, nagtudlo si Jehoshaphat ug pipila ka mga Levita, mga pari, ug mga pangulo sa kabanay sa mga katigulangan sa Israel aron sa paghatag sa paghukom sa atong Amahan ug sa paghusay sa mga panaglalis; ug mibalik sila sa Jerusalem. ⁹Gimandoan niya sila, “Buhata kini sa ingon niini nga paagi, uban sa kahadlok sa atong Amahan, nga matinud-anon ug tibuok kasingkasing. ¹⁰Sa matag higayon nga ang inyong mga igsoon sa ilang mga siyudad magdala kaninyo ug panaglalis—mahitungod sa pag-ula ug dugo, o mahitungod sa balaod ug sugo, mga kasugoan ug mga lagda—pasidan-i ninyo sila, aron dili sila makasala atubangan sa atong Amahan, nga magdala ug kapungot kaninyo ug sa inyong mga igsoon. Buhata kini, ug dili kamo makasala. ¹¹Karon, si Amaria nga pangulong pari mao ang magdumala kaninyo sa matag butang sa atong Amahan; si Zebadia nga anak ni Ismael, ang pangulo sa banay sa Juda, sa matag butang sa hari. Ang mga Levita magsilbi ingon nga mga opisyal atubangan ninyo. Magmalig-on kamo ug paglihok—hinaut nga ang atong Amahan mag-uban sa mga nagbuhat ug maayo.”