Jehoshafatei Ahab yoa yen lambei
Jehoshafatei Ahab chempen yoa yen lambei hoba Ramoth Gilead to wapyola ngüha lekei, kheijinei haoei seneibü Bou thuseibou che lamashi dogo phekei. Mikaia alongei haoei maimaitham ditbü kho lenkei — sanlon lipbakbü, thuseibü shuong maangpona amaibü soushou — hoba shanenko ngaan ikjaibüei hao maimaitham lenbü yingtikei.
18 1Hobaje Jehoshafat to nyaksinam hoba nyensang nyenhang yaang kikei, hoba haoei Ahab yoa yen lambei. 2Po tuisho latetche hao Samaria to Ahab jungto yankei, khünei Ahabei hao shanga hoba hao yoa kibü müt shanga sanlon hoba masu juong haitikei, hoba Ramoth Gilead to wapyola hao thungeikei. 3Israel Choba Ahabei Jihuda Choba Jehoshafat to phekei, “Nyi ngo yoa Ramoth Gilead to haulep sai?” Haoei jongaikei, “Ngo nyi tegü ki, kü mütli kaibü mütli tegü ki; senei wapyoa ka yoa yolabü.”
4Lausikei Jehoshafatei Israel Choba to laukei, “Shaangla seneibü Bou ngüh lamashi.”
5Hibü Israel Chobaei thuseibü müt 400 kamshaikei, hoba haoen to phekei, “Sen wapyola shanga Ramoth Gilead to haulep sai, ayingsi natenla?” Haoenei laukei, “Angashi, aishanga Mühghaüei Choba la khümbo kulabü.”
6Lausikei Jehoshafatei laukei, “Senei phela shanga hanei seneibü Bou thuseibü che ongkei aki sai?”
7Israelbü Chobaei Jehoshafat to laukei, “Senei seneibü Bou to phela shanga müt che ong, lausikei ngei hao to mangsenda; haoei kü shanga amaibü atetenkuda aying, maibü limbo atetenda. Hao kho Imlaeibü shou Mikaia ki.” Jehoshafatei laukei, “Choba, nyi khei telau!”
8Hobaje Israel Chobaei ikjaibü che ngaan hoba laukei, “Imlaeibü shou Mikaia tongde leiba.”
9Israel Chobaei hoba Jihuda Choba Jehoshafatei lulueibü setshanga setan, Samaria bakhün koukhüm atshang to khongthua, haosi hele leankei, hoba thedanga thuseibü pendouei tetenko laukei. 10Kenaanaeibü shou Zedekiaei teklaang son namei kümankei, hoba laukei, “Mühghaüei hai lauda, ‘Siriabü haoen to hoei nyi wapyoashi, haoen ashemti shongko.’”
11Thuseibü pendouei ho tegü tetenko laukei, “Ramoth Gilead to angashi hoba thüksimina kishi; Choba la kho seneibü Bouei khümbo kulabü.”
12Mikaia ngala hautibü ngühlang künbouei hao to laukei, “Thuseibü shuong pendouei che tegü Choba la maibü lauda; kaibü ngüh haoen ngüh to jetei yeishi, hoba maibü laushi.”
13Lausikei Mikaiaei laukei, “Seneibü Bou lang kishongko, kü Bouei kü to ai lauda, kho ong ngei laulabü.”
14Ladang hao loukei, Chobaei hao to laukei, “Mikaia, sen wapyola shanga Ramoth Gilead to haulep sai, ayingsi ngei natenla?” Haoei jongaikei, “Angashi, hoba thüksimin hapashi; kaibü ik to khümbo kulabü.”
15Lausikei Chobaei hao to laukei, “Seneibü Bou nyena kü to ngühmai ong lenla shanga, lalokche ngei ka to theyolanyotilabü?”
16Mikaiaei laukei, “Ngei Israelbü pendou shongh shuonga, lombou akibü sanshuong tegü, aalabü hapbei. Hoba seneibü Bouei laukei, ‘Habü to bunyu aying; mütpem weko sangmaia chem to ngaiashi.’”
17Israelbü Chobaei Jehoshafat to laukei, “Haoei kü shanga amaibüje atetenkuda aying, maibüje limbo atetenda dogo ngei ka to alau lo?”
18Mikaiaei laukei, “Hibü shanga nyi seneibü Bou ngüha leashi: ngei Bou kho hao setshanga setan, hoba khuthüka tan pendou hao nanaenei hoba maeaenei loan kibü hapbei.
19Hobaje Bouei laukei, ‘Israel Choba Ahab Ramoth Gilead to angan hoba athükamin lottila shanga, aoei hao huonettilabü?’ Hobaje cheei den, cheei dena dogo laukei.
20Hobaje soushou che loukei hoba Bou thedanga loan laukei, ‘Ngei khüpettilabü.’ Hobaje Bouei hao to laukei, ‘Ailai?’
21Kheijinei haoei laukei, ‘Ngo haula hoba haoeibü thuseibü pendou sembung to yepeijaweko lentilabü.’ Hobaje Bouei laukei, ‘Nyi hao huonettilabü hoba tokei thükenlabü. Hauashi hoba kümashi.’
22Hibü tou chühashi, Bouei habü ho kaibü thuseibü daneibü sembunga yepeijaweko soushou jinkua, hoba Bouei ka shanga thushed laula kua.”
23Kheijinei Kenaanaeibü shou Zedekia nyangko loukei, hoba Mikaiaeibü omlanga ipbo laukei, “Ka to joyola Mühghaü Soushou kü ka lai satkei?”
24Hobaje Mikaiaei laukei, “Nyi lolo maangkabou shemjang to hula atlaje, ladang khünyet no no haplabü.”
25Hobaje Israel Chobaei laukei, “Mikaia Sangnyua kibü governor Amon jungto hoba Chobaeibü shou Joash jungto leian hauashi, 26hoba lenshi, ‘Chobaei hai lauda: Ngo sangmaia alongei shongko, ho müt to thüngshanga phoashi hoba hao to wentek hanbang hoba dei shibangei pangteiashi.’”
27Hobaje Mikaiaei laukei, “No sangmaia nyibou longailaje, Bouei kü danko alau.” Hobaje haoei laukei, “Kan mütli pendou, ditashi!”
Bouei lounyu laubü tegü Ahab tuongkei
28Hibü Israel Choba hoba Jihuda Choba Jehoshafat Ramoth Gilead to angan haukei. 29Ladang Israel Chobaei Jehoshafat to laukei, “Ngo lason to haula shanga lolo ashentilabü, lausikei nyije kaibü hele leashi.” Kheijinei Israel Chobaei lolo ashentikei, hoba haosi lason to haukei. 30Tou Siria Chobaei haoeibü kailong lakjaibü shuong la ngühkhüm kuko laukei, “Hanbü yingsikei yaangbü yingsikei aokei to awapyojan, Israel Choba ong to wapyoashi.”
31Hobaje ladang kailong lakjaibü shuongei Jehoshafat hapbei, haoenei laukei, “Ho Israel Choba ki,” hoba haoenei hao khulimbo wapyola meimeikei. Lausikei Jehoshafatei ngekkei, hoba Bouei hao to thuia haoen hao ka longeikei. 32Ladang kailong lakjaibü shuongei hao Israel Choba aying dogo haplaje, haoenei hao nangan shijung haubü longeikei. 33Hobaje müt cheei laujin kipan litjinei, Israel Choba khükhom la phanga haukei. Haoei koli kailong leibou to lenkei, “Lason yo ka ngo leilangashi hoba sepeiashi; aishanga ngo leilua.” 34Hobaje khünyet chalou lason kaangan kikei, hoba Israel Choba chasem shongko haoeibü kailonga Siriabü ae yeian settian kikei, hoba chanyu neplamto haikei.
