2 Chronicles 18 FHB Father's Heart Bible™

18 ¹Etiya Jehoshaphat laga bahut dhun aru sonman thakise, aru tai shadi pora Ahab logot mili loise. ²Kisu saal pichete tai Samaria te Ahab logot te nami jaise, aru ta te Ahab pora tai aru tar logot thaka manuh khan nimite bahut mer aru goru khan mari dise, aru Ramoth-gilead te hamla koribole tai ke jor di koise. ³Israel laga raja Ahab pora Judah laga raja Jehoshaphat ke hudise, “Tumi moi logot Ramoth-gilead te jabo na?” Tai jawab dise, “Moi tumi nisena ase, moi laga manuh khan bhi tumar nisena ase; ami yudh te tumi logot milibo.”

⁴Kintu Jehoshaphat pora Israel laga raja ke koise, “Poila amar Pitri laga kotha bisaribi.”

⁵Titia Israel laga raja pora bhabobadi khan, 400 manuh ke joma korise, aru tarkhan ke hudise, “Ami yudh nimite Ramoth-gilead te jabo, na najabo?” Tarkhan koise, “Uporte jabi, kilemane Isor pora etu raja laga hath te di dibo.”

⁶Kintu Jehoshaphat koise, “Ta te amar Pitri laga ekjon bhabobadi aru nai naki, kun ke ami hudibo pare?”

⁷Israel laga raja pora Jehoshaphat ke koise, “Ekjon manuh ase, tar dwara ami amar Pitri ke hudibo pare, kintu moi tai ke ghin kore—tai moi laga bhal kotha kitia bhi bhabobani nakore, khali biya he. Tai Imlah laga chokra Micaiah ase.” Jehoshaphat jawab dise, “Raja pora eneka kobole nalage.”

⁸Titia Israel laga raja pora ekjon adhikari ke matise aru koise, “Imlah laga chokra Micaiah ke joldi loi anibi.”

⁹Israel laga raja aru Judah laga raja Jehoshaphat, duijon rajala kapor lagai kene, nijor nijor singhason te bohi thakise, Samaria laga dorja laga age te thaka dhan mara jaga te, aru sob bhabobadi khan tarkhan laga age te bhabobani kori thakise. ¹⁰Chenaanah laga chokra Zedekiah pora loha laga seng banaise aru koise, “Isor koi ase: ‘Etu khan pora tumi Aram manuh khan ke, taikhan khotom nohua tak, marikena phelai dibo.’”

¹¹Sob bhabobadi khan eneka he bhabobani korise, koikena: “Ramoth-gilead te jabi aru jiti lobi; amar Pitri pora etu raja laga hath te di dibo.”

¹²Micaiah ke matibole pathai diya khobor-diya manuh pora tai ke koise, “Bhabobadi khan laga kotha sob raja nimite bhal ase. Tumar kotha bhi tarkhan laga nisena hobole dibi—bhal kotha kobi.”

¹³Kintu Micaiah koise, “Amar Pitri jinda thaka nisena hosa pora, moi laga Pitri ki koi ase etu he moi kobo.”

¹⁴Tai aha pichete, raja koise, “Micaiah, ami Ramoth-gilead te yudh koribole jabo, na moi najabo?” Tai koise, “Uporte jabi aru jiti lobi; taikhan ke tumar hath te di dibo.”

¹⁵Kintu raja pora tai ke koise, “Amar Pitri laga nam te khali hosa he moi ke kobole, moi tumi ke kiman bar kosom khabole dibo lage?”

¹⁶Micaiah koise, “Moi sob Israel ke pahar khan te, roikha nathaka mer khan nisena, ephale-uphale hoi kene dikhise. Aru amar Pitri koise, ‘Taikhan laga malik nai; sob manuh shanti pora nijor ghor te wapas jabi.’”

¹⁷Israel laga raja pora Jehoshaphat ke koise, “Tai moi laga eku bhal kotha nohoi, khali biya he bhabobani koribo koikena moi tumi ke kowa nai?”

¹⁸Micaiah koise, “Titia amar Pitri laga kotha huni bi: Moi amar Pitri ke Tar singhason te bohi thaka dikhise, aru sorgo laga sob sipahi khan Tar dyna aru baya phale khara thakise.

¹⁹Aru amar Pitri koise, ‘Israel laga raja Ahab ke uporte jaikena Ramoth-gilead te giribole kun pora bhulai dibo?’ Ekjon pora eneka koise, dusra pora oneka koise.

²⁰Ekta atma age te ahise, amar Pitri laga age te khara hoise, aru koise, ‘Moi tai ke bhulai dibo.’ Aru amar Pitri pora tai ke hudise, ‘Kineka pora?’

²¹Tai koise, ‘Moi bahar te jaikena tar sob bhabobadi khan laga mukh te misa kowa atma hobo.’ Titia amar Pitri koise, ‘Tumi tai ke bhulai dibo aru jiti bhi lobo. Bahar te jabi aru eneka koribi.’

²²Etu nimite etiya, amar Pitri pora tumar etu bhabobadi khan laga mukh te misa kowa atma rakhidise, aru amar Pitri pora tumar bhirodh te dukh-digdar koi dise.”

²³Titia Chenaanah laga chokra Zedekiah usor te ahise, Micaiah laga gaal te marise, aru koise, “Isor laga Atma moi pora kun rasta pora tumi logot kotha kobole jaise?”

²⁴Micaiah koise, “Jun din tumi lukabole bhitor kamra te jabo, etu din tumi dikhibo.”

²⁵Israel laga raja koise, “Micaiah ke sheher laga adhikari Amon logot aru raja laga chokra Joash logot wapas loi jabi, ²⁶aru kobi, ‘Raja koi ase: Moi bhal pora wapas naha tak, etu manuh ke bondhi-ghor te rakhibi aru olop roti aru pani he dibi.’”

²⁷Micaiah koise, “Jodi tumi hosa pora bhal hoi kene wapas ahile, titia amar Pitri moi laga dwara kotha kowa nai.” Titia tai koise, “Huni bi, sob manuh khan!”

Pitri pora age te koi diya nisena Ahab giri jaise

²⁸Titia Israel laga raja aru Judah laga raja Jehoshaphat Ramoth-gilead te uporte jaise. ²⁹Israel laga raja pora Jehoshaphat ke koise, “Moi nijor ke bhes bodli korikena yudh te jabo, kintu tumi tumar rajala kapor lagabi.” Titia Israel laga raja nijor ke bhes bodli korise, aru tarkhan yudh te jaise. ³⁰Aram laga raja pora tar rath laga senapati khan ke hukum dise, “Chutu na dangor, kun ke bhi nalaribi, khali Israel laga raja ke he laribi.”

³¹Rath laga senapati khan pora Jehoshaphat ke dikha homoi te, taikhan koise, “Etu to Israel laga raja ase,” aru tai ke laribole ghuri jaise. Kintu Jehoshaphat jor pora kandise, aru amar Pitri pora tai ke modot korise, aru taikhan ke tai pora dur te loi jaise. ³²Rath laga senapati khan pora tai Israel laga raja nohoi koikena dikhise, titia taikhan tai ke piche kora chari dise. ³³Ekjon manuh pora eku chinta nakori kene tar dhonu khinchise aru Israel laga raja ke tar kavoj laga jora majote marise. Tai pora tar rath cholawa manuh ke koise, “Ghuri jabi aru moi ke yudh pora bahar loi jabi; moi jokhom hoise.” ³⁴Etu din yudh bahut jor pora hoise. Israel laga raja saam nohua tak tar rath te Aram manuh khan phale khara hoi thakise, aru titia surjo bura homoi te tai morise.