2 Kronika 18 FHB Father's Heart Bible™

18 ¹Yehoxafati akhali na mpfuma zizinji na mbiri ikulu, mbaphatana na Ahabe kubulukira m'malowolani. ²Pakupita pyaka pingasi, iye atcita kuenda kuna Ahabe ku Samariya, kweneko Ahabe ampherera mabira mazinji na ng'ombe thangwi ya iye na anthu akhali na iye; mbansumba toera amenye nkhondo ku Ramoti-Gileyadi. ³Ahabe mambo wa Izarayeli abvundza Yehoxafati mambo wa Yuda, mbalonga kuti: “Munaenda na ine ku Ramoti-Gileyadi?” Iye atawira: “Ine ndiri ninga imwe, mbumba yanga ninga yanu; tinakuphatani pabodzi pa nkhondo.”

⁴Mbwenye Yehoxafati apanga mambo wa Izarayeli: “Pakutoma, sakani fala ya Baba wathu.”

⁵Na tenepo mambo wa Izarayeli agumanya aprofeta, amuna madzana manai, mbaabvundza: “Tiende ku Ramoti-Gileyadi kamenya nkhondo, peno tikhonde?” Iwo atawira: “Kwirani, thangwi Mulungu anadzaupereka m'manja mwa mambo.”

⁶Mbwenye Yehoxafati alonga: “Kodi nkhabepo pontho profeta wa Baba wathu pano, toera timbvundze?”

⁷Mambo wa Izarayeli apanga Yehoxafati: “Asalapo mamuna m'bodzi, toera kubulukira mwa iye tibvundze Baba wathu, mbwenye ine ndisamuida, thangwi iye nkhabe kundiprofetera pyadidi tayu, mbwenye pyakuipa basi. Iye ndi Mikaya mwana wa Imla.” Yehoxafati atawira: “Mambo mbaleke kulonga tenepo.”

⁸Penepo mambo wa Izarayeli acemera nyabasa m'bodzi wa mambo mbampanga: “Bweresa mwakamfulumize Mikaya mwana wa Imla.”

⁹Mambo wa Izarayeli na Yehoxafati mambo wa Yuda akhadakhala, m'bodzi na m'bodzi pa mpando wace waumambo, akhadabvala nguwo zaumambo, pa mbuto yakupwaza mbeu, pa nsuwo wa nzinda wa Samariya; aprofeta onsene mbakhaprofeta patsogolo pawo. ¹⁰Zedhekiya mwana wa Kenaana acita nyanga za utale mbalonga: “Mulungu alonga tenepa: ‘Na nyanga izi unadzagwaza Aarameu mpaka kufudzwa kwawo.’”

¹¹Aprofeta onsene aprofeta pibodzi pene, mbalonga: “Kwirani ku Ramoti-Gileyadi, imwe munadzakunda; Baba wathu anadzaupereka m'manja mwa mambo.”

¹²Ntumwi adatumwa kakacemera Mikaya ampanga: “Mafala a aprofeta onsene asasimba mambo. Mafala ako mbakhale ninga a iwo; longa pyadidi.”

¹³Mbwenye Mikaya alonga: “Ninga Baba wathu muli maso, ndinadzalonga basi pinalonga Baba wanga.”

¹⁴Pidafika iye, mambo ambvundza: “Mikaya, tiende kamenya nkhondo ku Ramoti-Gileyadi, peno ndikhonde?” Iye atawira: “Kwirani mukakunde; iwo anadzaperekwa m'manja mwanu.”

¹⁵Mbwenye mambo ampanga: “Mpaka kangasi ndinakucitisa kudumbira toera undipange undimo basi mu dzina ya Baba wathu?”

¹⁶Mikaya alonga: “Ndaona Aizarayeli onsene amwazika pa mapiri, ninga mabira akusowa nkumbizi. Penepo Baba wathu alonga: ‘Iwo nkhabe mbuya; m'bodzi na m'bodzi mbabwerere kunyumba mwace mwantendere.’”

¹⁷Mambo wa Izarayeli apanga Yehoxafati: “Kodi nee ndakupangani kuti iye nkhabe kundiprofetera pyadidi, mbwenye pyakuipa basi?”

¹⁸Mikaya alonga: “Na tenepo bveserani fala ya Baba wathu: Ndaona Baba wathu akhadakhala pa mpando wace waumambo, anyankhondo onsene a kudzulu akhadaima kumadyo na kumabzwere kwace.

¹⁹Baba wathu abvundza: ‘Mbani anadzanyengeza Ahabe mambo wa Izarayeli toera akwire mbaafe ku Ramoti-Gileyadi?’ M'bodzi akhalonga tenepa, unango tenepo.

²⁰Penepo nzimu ubodzi ubwera, mbuima patsogolo pa Baba wathu, mbulonga: ‘Ine ndinadzannyengeza.’ Baba wathu ambvundza: ‘Munjira ipi?’

²¹Iye atawira: ‘Ndinadzabuluka, mbandikhala nzimu wauthambi m'mulomo mwa aprofeta ace onsene.’ Penepo Baba wathu alonga: ‘Iwe unadzannyengeza, pontho unadzakunda. Buluka, ukacite tenepo.’

²²Na tenepo cincino, Baba wathu aikha nzimu wauthambi m'mulomo mwa aprofeta anu awa, pontho Baba wathu alonga kuti anakubweresera uipi.”

²³Penepo Zedhekiya mwana wa Kenaana abwera, mbamenya Mikaya pa tama, mbalonga: “Nzimu wa Mulungu abuluka munjira ipi mwa ine toera kulonga na iwe?”

²⁴Mikaya alonga: “Unadzapiona pa ntsiku ineyi pakupita iwe n'cipinda ca nkati toera kubisala.”

²⁵Mambo wa Izarayeli alonga: “Bwezani Mikaya kuna Amoni nkulu wa nzinda, na kuna Yoasi mwana wa mambo, ²⁶mbalonga: ‘Mambo alonga tenepa: Ikhani munthu uyu n'kaidi, mumpase nkate basi na madzi, mpaka ine ndibwerere mwantendere.’”

²⁷Mikaya alonga: “Mungabwerera mwantendere, Baba wathu nkhabe kulonga kubulukira mwa ine.” Penepo athimiza: “Bverani, imwe mbumba yonsene!”

Ahabe Agwa Ninga Mudalongera Baba

²⁸Na tenepo mambo wa Izarayeli na Yehoxafati mambo wa Yuda akwira kuenda ku Ramoti-Gileyadi. ²⁹Mambo wa Izarayeli apanga Yehoxafati: “Ine ndinadzacinja maonekero anga mbandipita m'nkhondo, mbwenye imwe bvalani nguwo zanu zaumambo.” Na tenepo mambo wa Izarayeli acinja maonekero ace, mbapita m'nkhondo. ³⁰Mambo wa Aramu akhadapanga akulu a makalesa ace a nkhondo kuti: “Lekani kumenya munthu, mng'ono peno nkulu, mbwenye mambo wa Izarayeli ekha basi.”

³¹Pidaona akulu a makalesa a nkhondo Yehoxafati, alonga: “Uyu ndi mambo wa Izarayeli,” mbazunguluka toera kumenya na iye. Mbwenye Yehoxafati akhuwa, Baba wathu amphedza, mbacitisa kuti abuluke kuli iye. ³²Pidaona akulu a makalesa a nkhondo kuti iye nee ndi mambo wa Izarayeli, asiya kunthamangisa. ³³Mamuna m'bodzi akoka uta wace mwakukhonda nyang'anisa, mbagwaza mambo wa Izarayeli pakati pa mabangwe a utenga wace wa nkhondo. Mambo apanga ntyali wa kalesa yace: “Zungunuka, undibuluse m'nkhondo, thangwi ndapwazwa.” ³⁴Nkhondo yakula ntsiku ineyi. Mambo wa Izarayeli akhadaimiswa m'kalesa mwace, maso ace mbakhayang'ana ku Aarameu mpaka namaulo, buluka penepo afa pakudoka kwa dzuwa.