Jehoshaphatna Avāli Ngasoda Zata
Jehoshaphatna Baalbingli maphāla ithumwui Avāli phāvai, chiwui vang ithumwui Avā ali ngasoda leisai. Awui ot kakhalāk chiya, ainwui lairik zangda Judahwui keinung kachida tamchithei khavai kathānabing kala Levinaobingli chihovā chi; kala awui wungram pangshap, kashāng kala kachungkha eina pemhaowa.
17 1Awui naomayara Jehoshaphatna awui mahut awunga sāhaowa, kala Israelli yangshida khalattawui pang ngasaka. 2Ana Judahwui raipan sākahai keinung saikorali raimi shinngasaka, kala Judah ngaleili kala awui avā Asana yuihaikahai Ephraimwui keinungbingli raimi chipama. 3Ithumwui Avāna Jehoshaphatli ngasomi, kaja ana awui avāva̱ Davidwui rida apongbing chili zata, kala Baalbingli maphāmana. 4Chitha-ilala, ana awui avāna otram ngatha̱khami Avāli phāda, awui ningkhami mayonda, Israelwui sākachithei ngashan chili mazatmana. 5Chiwui vang eina ithumwui Avāna wungram chi awui pāngli sākai; Judah saikorana Jehoshaphatli lemmet phungrāmi, kala awui kashāng kala khayākakā kachungkhana. 6Ana malung pinglak eina ithumwui Avāwui apongbing chili zata, kala Judahwui eina khorumpam kajuibing kala Asherim chi horhaowa. a a v6 Khorumpam kajuibing hi meoma̱ khorumwui vang kaphungtonli leikahai luiwuk khorumpambingna; Asherim hi Canaannaobingwui vare-preiva̱ Asherahli tharchigat kahai, thing eina sākhui kahai meoma̱bingna.
7Ana mungda kakathuma kum, ana awui wungnaobing Benhail, Obadiah, Zechariah, Nethanel, kala Micaiahli Judahwui keinungbingli tamchithei khavai chihovā. 8kala athumli Levinaobing ngasoda: Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, kala Tob-adonijah; kala athumli ngasoda pāngmonbing Elishama eina Jehoramna. 9Athumna ithumwui Avāwui ainwui lairik chi zangda Judahwui keinung saikorali vāda, Judah peichaoda mibingli tamchithei.
10Ithumwui Avāwui khangachee Judah kuimareida khalei wungram saikorawuitungli tāhaowa, chiwui vang eina athumna Jehoshaphatli rai masāmana. 11Philistinenaobing kaikhana Jehoshaphatli lemmet kala shai lupā phungrāmi, kala Arabnaobingna yaobing, ramsā thingshini shāshini kala mevā thingshini shāshini phungrāmi. 12Jehoshaphatna mataisangkhangai mataisanghaowa, kala ana Judahli raipanbing kala lankazip keinungbing sākai. 13Judahwui keinungbingli awui otrom kachungkhana, kala Jerusalemli awui raikapinga mimānga lei. 14Avāva̱ ngarāwui shimlak athishurda athumwui mishān chi hina: Judahwui thingthingwui raithānbingli Adnahna raithāna sai, kala ali ngasoda raikapinga mi thing shākathum lei; 15Awui thili Jehohananna raithāna sai, kala ali ngasoda mi thing shākhani hangchishat lei; 16Awui thili ithumwui Avāwui vang khalattawui ningkhān eina tharchigat kahai Zichriwui naomayara Amasiahna raithāna sai, kala ali ngasoda raikapinga mi thing shākhani lei. 17Benjaminwui eina raikapinga Eliadana raithāna sai, kala ali ngasoda malā kala chāngvei shaksā mi thing shākhani lei; 18Awui eina vameida Jehozabadna raithāna sai, kala ali ngasoda raili vākapai mi lakh akha thing hangchishat lei. 19Judah saikorali khalei raipan sākahai keinungbingli awungana haivāserabing mazangla, hi mibingna awungali otram ngatha̱sai.
