Mandeha miaraka amin’ny Ray i Josafata

Momba an'i Josafata ny Raintsika satria Izy no katsahiny fa tsy ny Baala. Ny asa lehibe indrindra nataony dia ny nandefasany lehiben'ny miaramila sy Levita nitondra ny bokin'ny fampianarana hampianatra tamin'ny tanàna rehetra tao Joda, ary nanjary matanjaka, manan-karena ary nahazo ny zava-drehetra ilainy ny fanjakany.

Toko 17.

Dia Josafata zanany no nanjaka nandimby azy, ary nampahery ny tenany izy hanohitra an’i Israely. Nanisy miaramila izy tany amin’ny tanàna mimanda rehetra any Joda, ary nametraka miaramila mpiambina tany amin’ny tany Joda sy tany amin’ny tanànan’i Efraima izay azon’i Asa rainy. Nomba an’i Josafata Raintsika, satria nandeha tamin’ny lalan’i Davida rainy tamin’ny voalohany izy, ka tsy nitady ireo Baala. Fa ny Ray notompoin’ny rainy no notadiaviny, ary nankatò ny didiny izy, fa tsy nanaraka ny fanaon’i Israely. Ary Raintsika no nampiorina ny fanjakana teo an-tànany; ary Joda rehetra nitondra fanomezana ho an’i Josafata, dia nanana harena sy voninahitra be izy. Nitodika tamin’ny lalan’i Raintsika ny fony; ary nanaisotra ny fitoerana avo sy ny andry Asera tao Joda izy. ^a

Tamin’ny taona fahatelo nanjakany dia naniraka ireo lehiben’ny miaramilany izy, dia Benhaila, Obadia, Zakaria, Netanela ary Mikaia, mba hampianatra ao amin’ny tanànan’i Joda, ary niaraka taminy ny Levita: Semaia, Netania, Zebadia, Asahela, Semiramota, Jonatana, Adonia, Tobia ary Tobadonia; ary niaraka taminy ny mpisorona Elisama sy Jorama. Nampianatra tany Joda izy ireo, ary nitondra ny Bokin’ny Lalàn’i Raintsika; nitety ny tanàna rehetra any Joda izy ka nampianatra ny olona.

Dia nianjera tamin’ny fanjakana rehetra manodidina an’i Joda ny tahotra an’i Raintsika, ka tsy nanafika an’i Josafata izy ireo. Ary ny Filistina sasany nitondra fanomezana ho an’i Josafata sy vola ho hetra; ny Arabo koa nitondra ondry: ondrilahy fito arivo sy fitonjato, osilahy fito arivo sy fitonjato. Nihamanan-kery hatrany i Josafata, ary nanorina tanàna mimanda sy tanàna fitahirizam-bokatra tany Joda izy. Nanana fitaovana sy entana be tao amin’ny tanànan’i Joda izy, sady nanana lehilahy mahery fo mpiady tao Jerosalema. Izao no isan’izy ireo araka ny tranon’ny razany: avy amin’i Joda, ny lehiben’ny arivo: Adna lehibe, ary niaraka taminy lehilahy mahery fo telo hetsy; ary teo akaikiny Johanana lehibe, ary niaraka taminy roa hetsy sy valo alina; ary teo akaikiny Amasia zanak’i Zikry, izay nanolo-tena ho an’i Raintsika, ary niaraka taminy lehilahy mahery fo roa hetsy. Avy amin’i Benjamina: Eliada, lehilahy mahery fo, ary niaraka taminy roa hetsy nitondra tsipika sy ampinga; ary teo akaikiny Jozabada, ary niaraka taminy iray hetsy sy valo alina voaomana ho amin’ny ady. Ireo lehilahy ireo no nanompo ny mpanjaka, afa-tsy izay napetrany tao amin’ny tanàna mimanda manerana an’i Joda.