Jehoshafati Aathiiaga na Ithe

Ithe witũ arĩ hamwe na Jehoshafatu tondũ nĩamũcaragia handũ ha gũcaria Baali. Ũndũ wake ũrĩa ũgegania makĩria nĩ gũtũma anene na Alawii na Ibuku rĩa Watho marutane itũũra-inĩ o rĩothe rĩa Juda, naguo ũthamaki wake ũkĩgĩa hinya, na ũtonga, na indo nyingĩ.

Gĩcunjĩ 17.

Naake mũriũ wake Jehoshafati agĩtuĩka mũthamaki ithenya rĩake, na akĩĩyũmĩrĩria nĩguo okĩrĩre Isiraeli. Nake akĩiga mbũtũ cia ita matũũrainĩ moothe manene ma Juda marĩa maarĩ na thingo cia hinya, na akĩiga mbũtũ cia arangĩri bũrũriinĩ wa Juda, na matũũrainĩ ma Efiraimu marĩa ithe Asa aatahĩte. Nake Ithe witũ aarĩ hamwe na Jehoshafati, amu aarũmĩrĩire njĩra iria cia mbere cia ithe Daudi, na ndaacaragia Mabaali. No we agĩcaria Ithe ũrĩa ithe aatung'ataga, na agĩathĩkĩra maathani make, no ndaarũmĩrĩire mĩtugo ya Isiraeli. Kwoguo Ithe witũ akĩrũmia ũthamaki guokoinĩ gwake; nao andũ a Juda oothe makĩrehera Jehoshafati iheo, nake akĩgĩa na ũtonga mũingĩ na gĩtĩĩo. Nayo ngoro yake yaarĩ na kĩyo njĩrainĩ cia Ithe witũ; nake akĩeheria kũndũ kũrĩa gũtũũgĩru na itugĩ cia Ashera kuuma Juda. ^a

Naguo mwaka wa gatatũ wa ũthamaki wake, agĩtũma anene ake Beni-haili, na Obadia, na Zekaria, na Nethaneli, na Mikaia, mathiĩ makarutane matũũrainĩ ma Juda, na Alawii hamwe nao: Shemaia, na Nethania, na Zebadia, na Asaheli, na Shemiramothu, na Jehonathani, na Adonija, na Tobija, na Tobu-adonija; na hamwe nao athĩnjĩri Ngai Elishama, na Jehoramu. Nao makĩrutana Juda guothe, makuuĩte Ibuku rĩa Mawatho ma Ithe witũ, magĩthiĩ matũũrainĩ moothe ma Juda, makĩrutaga andũ.

Naguo guoya wa Ithe witũ ũkĩgwĩra mothamaki moothe marĩa maathiũrũrũkĩirie Juda, nĩ ũndũ ũcio matiigana kũrũa na Jehoshafati. Afilisti amwe makĩrehera Jehoshafati iheo na betha ya igooti; nao Aarabu makĩmũrehera ndũũru cia mahiũ: ndũrũme 7,700, na thenge 7,700. Nake Jehoshafati agĩthiĩ na mbere kũgĩa na hinya mũno, na agĩaka ciĩgitĩro cia hinya na matũũra ma kũigĩrĩra indo kũu Juda. Nake aarĩ na indo nyingĩ matũũrainĩ ma Juda, na njamba cia ita irĩ hinya kũu Jerusalemu. Naguo mũtaratara wao kũringana na nyũmba cia maithe mao nĩ ũyũ: kuuma Juda, anene a ikundi cia andũ ngiri ngiri—Adina mũnene, na hamwe nake njamba cia ita 300,000; thuutha wake nĩ Jehohanani mũnene, na hamwe nake 280,000; thuutha wake Amasia mũrũ wa Zikiri, ũrĩa weeyendeire gũtungatĩra Ithe witũ, na hamwe nake njamba cia ita 200,000. Kuuma Benjamini: Eliada, njamba ya ita ĩrĩ hinya, na hamwe nake 200,000 meeyohete mota na ngo; thuutha wake Jehozabadi, na hamwe nake 180,000 meehaarĩirie gũthiĩ ita. Andũ aya nĩo maatungatagĩra mũthamaki, tiga o arĩa aaigĩte matũũrainĩ marĩa maarĩ na thingo cia hinya Juda guothe.