Yehoshafat Ya Yi Tafiya da Uba
Ubanmu yana tare da Yehoshafat domin yana neman sa maimakon Ba'al. Abin da ya fi fice a ayyukansa shi ne aika shugabanni da Lawiyawa da littafin koyarwa, su koyar a kowane birnin Yahuda. Mulkinsa kuma ya yi ƙarfi, ya yi arziki, ya cika da kayan ajiya.
17 1Ɗansa Yehoshafat ya zama sarki a maimakonsa, ya kuma ƙarfafa kansa gāba da Isra'ila. 2Ya kafa dakaru a cikin dukan biranen Yahuda masu katanga, ya kuma kafa rundunoni a ƙasar Yahuda, da kuma a cikin biranen Ifraimu da mahaifinsa Asa ya ci da yaƙi. 3Ubanmu ya kasance tare da Yehoshafat, gama ya bi hanyoyin farko na mahaifinsa Dawuda, bai nemi gumakan Ba'al ba. 4A maimakon haka, ya nemi Uban da mahaifinsa ya bauta wa, ya kuma yi biyayya ga umarnansa, ba ayyukan Isra'ila ba. 5Saboda haka Ubanmu ya tabbatar da mulki a hannunsa; dukan Yahuda suka kawo wa Yehoshafat kyautai, ya kuma sami arziki mai yawa da girma. 6Zuciyarsa ta ba da kai ga hanyoyin Ubanmu; ya kawar da masujadan kan tudu da ginshiƙan Ashera daga Yahuda. a a v6 Masujadan kan tudu wurare ne na sujada a bayan gari kan tuddai da ake amfani da su domin bautar gumaka; ginshiƙan Ashera kuwa sassaƙaƙƙun abubuwa ne na itace na tsafi da aka keɓe wa gunkin mace ta Kan'ana mai suna Ashera.
7A shekara ta uku ta mulkinsa, ya aiki shugabanninsa, Ben-hayil, da Obadiya, da Zakariya, da Netanel, da Mikahiya, su koyar a biranen Yahuda, 8tare da su kuma Lawiyawa, wato Shemaya, da Netaniya, da Zebadiya, da Asahel, da Shemiramot, da Yehonatan, da Adoniya, da Tobiya, da Tob-adoniya; tare da su kuma firistoci, wato Elishama, da Yehoram. 9Suka koyar a ko'ina a Yahuda, suna ɗauke da Littafin Koyarwar Ubanmu, suna zuwa dukan biranen Yahuda, suna koya wa mutane.
10Tsoron Ubanmu ya kama dukan mulkoki da suke kewaye da Yahuda, saboda haka ba su yi yaƙi da Yehoshafat ba. 11Waɗansu Filistiyawa suka kawo wa Yehoshafat kyautai da kuɗin haraji na azurfa; Larabawa kuwa suka kawo garkuna, raguna dubu bakwai da ɗari bakwai, da bunsurai dubu bakwai da ɗari bakwai. 12Yehoshafat ya ci gaba da ƙaruwa da iko ƙwarai, ya kuma gina kagarai da biranen ajiya a Yahuda. 13Yana da tanade-tanade masu yawa a biranen Yahuda, da kuma jarumawa masu ƙarfi a Urushalima. 14Ga yadda aka ƙidaya su bisa ga gidajen kakanninsu, daga Yahuda, shugabannin dubbai, Adna shugaba, tare da shi jarumawa masu ƙarfi dubu ɗari uku; 15biye da shi kuwa Yehohanan shugaba, tare da shi dubu ɗari biyu da tamanin; 16biye kuma Amasiya ɗan Zikri, wanda ya ba da kansa bisa radin zuciyarsa ga Ubanmu, tare da shi jarumawa masu ƙarfi dubu ɗari biyu. 17Daga Benyamin, Eliyada, jarumi mai ƙarfi, tare da shi dubu ɗari biyu masu ɗauke da baka da garkuwa; 18biye da shi kuwa Yehozabad, tare da shi dubu ɗari da tamanin shiryayyu domin yaƙi. 19Waɗannan mutane su suka yi wa sarki hidima, ban da waɗanda ya kafa a biranen da suke da katanga a ko'ina a Yahuda.