2 ዜና መዋዕል 17

17 ¹ልጁ ኢዮሣፍጥም በእርሱ ፈንታ ነገሠ፤ በእስራኤልም ላይ ራሱን አጠናከረ። ²በይሁዳም የተመሸጉ ከተሞች ሁሉ ጭፍሮችን አስቀመጠ፤ በይሁዳ ምድርና አባቱ አሳ በያዛቸው በኤፍሬም ከተሞች ውስጥም ጦር ሰፈሮችን አኖረ። ³አባታችንም ከኢዮሣፍጥ ጋራ ነበር፤ በአባቱ በዳዊት የቀድሞ መንገዶች ተመላልሷልና፤ በኣሎችንም አልፈለገም። ⁴ይልቁንም አባቱ ያገለገለውን አብ ፈለገ፤ ትእዛዛቱንም ጠበቀ እንጂ የእስራኤልን ልማዶች አልተከተለም። ⁵ስለዚህ አባታችን መንግሥቱን በእጁ አጸና፤ ይሁዳ ሁሉ ለኢዮሣፍጥ ገጸ በረከት አመጡለት፤ ታላቅ ብልጽግናና ክብርም ነበረው። ⁶ልቡም በአባታችን መንገዶች ጸና፤ የኰረብታ መስገጃዎችንና የአሼራ ምሰሶዎችን ከይሁዳ አስወገደ። ^a a v6 የኰረብታ መስገጃዎች ለጣዖት አምልኮ ይገለገሉባቸው የነበሩ በኰረብታ ላይ የሚገኙ ከቤት ውጭ የሆኑ መስገጃዎች ነበሩ፤ የአሼራ ምሰሶዎች ደግሞ ለከነዓናዊቷ እንስት ጣዖት ለአሼራ የተሰጡ የተቀረጹ የእንጨት የአምልኮ ቍሳቍሶች ነበሩ።

⁷በነገሠ በሦስተኛው ዓመት በይሁዳ ከተሞች ያስተምሩ ዘንድ ሹማምቱን ቤንሃይልን፣ አብድዩን፣ ዘካርያስን፣ ናትናኤልንና ሚካያን ላከ፤ ⁸ከእነርሱም ጋራ ሌዋውያኑን ሸማያን፣ ናታንያን፣ ዘባድያን፣ አሣሄልን፣ ሸሚራሞትን፣ ዮናታንን፣ አዶንያን፣ ጦብያንና ጦብ አዶንያን ላከ፤ ከእነርሱም ጋራ ካህናቱን ኤሊሳማንና ኢዮራምን ላከ። ⁹በይሁዳም ሁሉ አስተማሩ፤ የአባታችንን የሕግ መጽሐፍ ይዘው ወደ ይሁዳ ከተሞች ሁሉ እየሄዱ ሕዝቡን አስተማሩ።

¹⁰የአባታችን ፍርሃት በይሁዳ ዙሪያ ባሉ መንግሥታት ሁሉ ላይ ወደቀ፤ ስለዚህ በኢዮሣፍጥ ላይ ጦርነት አላነሡም። ¹¹ከፍልስጥኤማውያን አንዳንዶቹ ለኢዮሣፍጥ ገጸ በረከትና የብር ግብር አመጡለት፤ ዐረቦችም መንጎችን አመጡለት፤ 7,700 አውራ በጎችና 7,700 ተባት ፍየሎች። ¹²ኢዮሣፍጥም እያደር እጅግ እየበረታ ሄደ፤ በይሁዳም ምሽጎችንና የመጋዘን ከተሞችን ሠራ። ¹³በይሁዳ ከተሞች ብዙ ቀለብ ነበረው፤ በኢየሩሳሌምም ኀያላን ተዋጊዎች ነበሩት። ¹⁴በአባቶቻቸው ቤት መሠረት የተመዘገቡት እንዲህ ነበር፦ ከይሁዳ የሺህ አለቆች፦ አለቃው ዐድና፣ ከእርሱም ጋራ 300,000 ኀያላን ተዋጊዎች ነበሩ፤ ¹⁵ከእርሱም ቀጥሎ አለቃው ዮሃናን ነበር፤ ከእርሱም ጋራ 280,000 ነበሩ፤ ¹⁶ከእርሱም ቀጥሎ ለአባታችን በፈቃዱ ራሱን የሰጠ የዘክሪ ልጅ አመሢያ ነበር፤ ከእርሱም ጋራ 200,000 ኀያላን ተዋጊዎች ነበሩ። ¹⁷ከብንያም፦ ኀያል ተዋጊ ኤልያዳ፤ ከእርሱም ጋራ በቀስትና በጋሻ የታጠቁ 200,000 ነበሩ፤ ¹⁸ከእርሱም ቀጥሎ ዮዛባድ ነበር፤ ከእርሱም ጋራ ለጦርነት የተዘጋጁ 180,000 ነበሩ። ¹⁹እነዚህ ሰዎች ንጉሡን አገለገሉ፤ በይሁዳ ሁሉ በተመሸጉ ከተሞች ካስቀመጣቸው ሌላ ነበሩ።