Naglakat si Jehosafat Kaupod sang aton Amay
Ang aton Amay yara kay Jehoshaphat kay nagapangita siya sa iya sa baylo sang mga Baal. Ang iya pinakahalangdon nga binuhatan amo ang pagpadala sang mga opisyal kag Levita upod ang libro sang pagtulun-an sa pagtudlo sa tagsa ka banwa sang Juda, kag ang iya ginharian nagabaskog, nagayaman kag natagaan sing maayo.
17 1Si Jehosafat nga iya anak nanghari sa iya baylo kag ginpalig-on niya ang iya kaugalingon batok sa Israel. 2Nagbutang sia sing mga soldado sa tanan nga napaderan nga mga siudad sang Juda kag mga bantay sa duta sang Juda kag sa mga siudad sang Efraim nga ginsakup ni Asa nga iya amay. 3Ang aton Amay kaupod ni Jehosafat, kay naglakat sia sa nahauna nga mga dalanon ni David nga iya amay, nga wala nagapangita sa mga Baal. 4Kondi, ginpangita niya ang Amay nga gin-alagad sang iya amay, kag gintuman niya ang iya mga sugo, kag indi ang mga buhat sang Israel. 5Gani ginpalig-on sang aton Amay ang ginharian sa iya kamot; ang bug-os nga Juda nagdala sing mga regalo kay Jehosafat, kag may bugana sia nga manggad kag dungug. 6Ang iya tagiposoon nahamuot sa mga dalanon sang aton Amay; ginkuha niya ang mga mataas nga duug kag ang mga haligi ni Asera sa Juda. a a v6 Ang mga mataas nga duug amo ang mga simbahanan sa gua sa putukputukan sang bukid nga gingamit sa pagsimba sa diosdios; ang mga haligi ni Asera amo ang tinigban nga kahoy nga mga butang sa pagsimba nga ginhalad sa diosa sang Canaan nga si Asera.
7Sa ikatlo nga tuig sang iya paghari ginpadala niya ang iya mga opisyal nga si Ben-hail, si Obadias, si Zacarias, si Netanel, kag si Micaias sa pagpanudlo sa mga siudad sang Juda, 8kag kaupod nila ang mga Levita nga si Semaias, si Netanias, si Zebadias, si Asael, si Semiramot, si Jehonatan, si Adonias, si Tobias, si Tob-adonias; kag kaupod nila ang mga saserdote nga si Elisama kag si Jehoram. 9Nagpanudlo sila sa bug-os nga Juda, nga nagadala sang Tulun-an sang Pagtudlo sang aton Amay, nga nagakadto sa tanan nga siudad sang Juda, nga nagatudlo sa katawohan.
10Ang kahadluk sa aton Amay nagtupa sa tanan nga ginharian sa palibot sang Juda, gani wala sila magpakig-away kay Jehosafat. 11May mga Filisteo nga nagdala kay Jehosafat sing mga regalo kag pilak nga buhis; ang mga Arabo nagdala sing mga panong: 7,700 ka mga karnero nga lalaki, 7,700 ka mga kanding nga lalaki. 12Nagdugang-dugang pa gid ang pagkagamhanan ni Jehosafat, kag nagpatindog sia sing mga kuta kag mga siudad nga talaguan sa Juda. 13May bugana sia nga mga pagkabutang sa mga siudad sang Juda, kag mga maisog nga hangaway sa Jerusalem. 14Amo ini ang ila pagtalana suno sa panimalay sang ila mga katigulangan: gikan sa Juda, ang mga komandante sang mga linibo—si Adna ang komandante, kaupod niya ang 300,000 ka mga maisog nga hangaway; 15sunod sa iya amo si Jehohanan ang komandante, kag kaupod niya ang 280,000; 16sunod amo si Amasias nga anak ni Zicri, nga nagboluntaryo para sa aton Amay, kaupod niya ang 200,000 ka mga maisog nga hangaway. 17Gikan sa Benjamin: si Eliada, isa ka maisog nga hangaway, kag kaupod niya ang 200,000 nga may armas nga pana kag taming; 18sunod sa iya amo si Jehozabad, kag kaupod niya ang 180,000 nga nasangkapan para sa inaway. 19Ini nga mga tawo nag-alagad sa hari, luwas sa mga ginbutang niya sa napaderan nga mga siudad sa bug-os nga Juda.
