ፀላእቲ ኣብ ልዕሊ ህዝቢ ኣቦና ተንስኡ

ዓብዪ ሰራዊት መፀ፤ መልሲ ኢዮሳፍጥ ከዓ ፆምን ፀሎትን ናብ ኣቦና ኾነ፥ እታ ፀሎት ድማ ከምዙይ ትዛዘም፦ እንታይ ክንገብር ከም ዘለና ኣይንፈልጥን፥ ግና ዓይንና ናባኻ እዩ። እቲ ውግእ ናቱ ከም ዘይኮነ ተነግሮ። መዘምራን ነቲ ጉዕዞ መርሑ፤ እቶም ወረርቲ ድማ ንሓድሕዶም ተጠፋፍኡ።

ምዕራፍ 20።

ድሕር እዙይ ሞኣባውያንን ኣሞናውያንን ምስ ገለ ሜዑናውያን ኮይኖም ንኢዮሳፍጥ ክዋግእዎ መፁ። ልኡኻት መፂኦም ድማ ንኢዮሳፍጥ ከምዙይ ኢሎም ነገርዎ፦ “ካብ ስግር ባሕሪ ሞት፥ ካብ ኤዶም ዓብዪ ሰራዊት ኣብ ልዕሌኻ ይመፅእ ኣሎ፤ እንሆ ድማ ኣብ ሓሴቦን ታማር ኣለዉ” ንሳ ድማ ዓይንጋዲ እያ። ኢዮሳፍጥ ፈሪሑ፥ ንኣቦና ኽደልዮ ገፁ ኣቕንዐ፤ ኣብ ኵሉ ይሁዳ ኸዓ ፆም ኣወጀ። ይሁዳ ድማ ንኣቦና ኽደልይዎ ተኣከቡ፤ ካብ ኵለን ከተማታት ይሁዳ ኸዓ ኽደልይዎ መፁ።

ሽዑ ኢዮሳፍጥ ኣብ ጉባኤ ይሁዳን ኢየሩሳሌምን፥ ኣብ ቤት ኣቦና፥ ኣብ ቅድሚ እቲ ሓድሽ ቕፅሪ ደው በለ። ከምዙይ ድማ በለ፦ “ኦ ኣቦና፥ ኣምላኽ ኣቦታትና፥ ንስኻዶ ኣብ ሰማያት እትነብር ኣቦና ኣይኮንካን? ንስኻ ኣብ ልዕሊ ኵለን መንግስታት ኣህዛብ ትገዝእ ኢኻ። ሓይልን ብርትዐን ኣብ ኢድካ ኣሎ፤ ኣብ ቅድሜኻ ኽቐውም ዝኽእል ከዓ የለን። ኦ ኣቦና፥ ንስኻዶ ነቶም ኣብዛ ምድሪ እዚኣ ዝነበሩ ህዝቢ ኣብ ቅድሚ ህዝብኻ እስራኤል ኣየልቀቕካዮምን፥ ነታ ምድሪ ድማ ንዘርኢ ኣብርሃም ፈታዊኻ ንዘለኣለም ዘይሃብካዮም? ኣብኣ ድማ ተቐሚጦም፥ ኣብኣ ኸዓ ንስምካ ዝኸውን መቕደስ ሰሪሖምልካ ከምዙይ በሉ፦ መዓት፥ ሰይፊ ፍርዲ ይኹን ፌራ ወይ ጥሜት ናባና እንተ መፀ፥ ስምካ ኣብዛ ቤት እዚኣ ስለ ዘሎ፥ ኣብ ቅድሚ እዛ ቤት እዚኣን ኣብ ቅድሜኻን ደው ክንብል፥ ኣብ ጭንቅና ኸዓ ናባኻ ክንእዌ ኢና፤ ንስኻ ድማ ክትሰምዕን ከተድሕንን ኢኻ። ሕዚ ኸዓ፥ እንሆ ደቂ ኣሞንን ሞኣብን እምባ ሴይርን ኣለዉ፤ እስራኤል ካብ ምድሪ ግብፂ ክወፁ እንተለዉ፥ ኣብ ልዕሊኦም ክወርሩ ኣይፈቐድካሎምን፤ ካብኣቶም ኣግሊሶም ድማ ኣየጥፍእዎምን። እንሆ፥ ካብቲ ኽንወርሶ ዝሃብካና ርስቲ ኺሰጉና መፂኦም ከመይ ገይሮም ከም ዝፈድዩና ርአ። ኦ ኣቦና፥ ኣይትፈርዶምንዶ? ኣብ ልዕሊ እዝ ናባና ዝመፅእ ዘሎ ዓብዪ ሰራዊት ሓይሊ የብልናን፤ እንታይ ክንገብር ከም ዘለና ኣይንፈልጥን፤ ግና ዓይንና ናባኻ እዩ።”

ኵሉ ይሁዳ ድማ ምስ ህፃናቶምን ኣንስቶምን ደቆምን ኣብ ቅድሚ ኣቦና ደው በሉ።

ሽዑ ኣብ ማእኸል እቲ ጉባኤ፥ መንፈስ ኣቦና ኣብ ልዕሊ ያሃዚኤል ወዲ ዘካርያስ፥ ወዲ በናያስ፥ ወዲ የዒኤል፥ ወዲ መታንያ፥ እቲ ኻብ ዓሌት ኣሳፍ ዝኾነ ሌዋዊ ወረደ።

ከምዙይ ድማ በለ፦ “ኣቱም ኵሉ ይሁዳን ኣብ ኢየሩሳሌም እትነብሩን ንጉስ ኢዮሳፍጥን ስምዑ። ኣቦና ከምዙይ ይብለኩም ኣሎ፦ ‘በዝ ዓብዪ ሰራዊት እዙይ ኣይትፍርሑ ኣይትሸበሩ፤ እዝ ውግእ እዙይ ናይ ኣቦና ደኣ እዩ እምበር ናትኩም ኣይኮነን። ፅባሕ ናብኣቶም ውረዱ፤ እንሆ ብዓቐበት ዚዝ ይድይቡ ኣለዉ፤ ኣብ መወዳእታ እቲ ለሰ፥ ኣብ መንፅር ምድረ በዳ የሩኤል ክትረኽብዎም ኢኹም። ነዝ ውግእ እዙይ ክትዋግኡ ኣየድልየኩምን እዩ፤ ተሰሊፍኩም ፅንዑ፥ ኦ ይሁዳን ኢየሩሳሌምን ኣቦና ኸመይ ገይሩ ኸም ዘድሕነኩም ርኣዩ። ኣይትፍርሑ ኣይትሕለሉ፤ ፅባሕ ናብኣቶም ውፁ፤ ኣቦና ምሳኻትኩም እዩ እሞ።’”

ኢዮሳፍጥ ድማ ገፁ ናብ ምድሪ ኣድኒኑ ሰገደ፤ ኵሉ ይሁዳን ኣብ ኢየሩሳሌም ዝነበረ ህዝብን ድማ ኣብ ቅድሚ ኣቦና ወዲቖም ሰገዱ። እቶም ካብ ደቂ ቀዓትን ካብ ደቂ ቆሬን ዝኾኑ ሌዋውያን ድማ፥ ንኣቦና ኣምላኽ እስራኤል ብዓብዪ ድምፂ ዓው ኢሎም ኬመስግንዎ ተሲኦም ደው በሉ።

ኣንጊሆም ድማ ናብ ምድረ በዳ ተቆዓ ወፁ። ክወፁ እንተለዉ ኸዓ ኢዮሳፍጥ ደው ኢሉ ኸምዙይ በለ፦ “ኣቱም ይሁዳን ኣብ ኢየሩሳሌም እትነብሩ ህዝብን ስምዑኒ፤ ብኣቦኻትኩም እመኑ ክትፀንዑ ኢኹም፤ ንነቢያቱ እመንዎም ክትዕወቱ ኢኹም።”

ኢዮሳፍጥ ድማ ምስቶም ህዝቢ ተማኺሩ፥ ነቶም ቀቅድሚ እቲ ሰራዊት እናኸዱ ንኣቦና ዝዝምሩን ንቕዱስ ግርማኡ ዘመስግኑን መዘምራን መደበ፤ ከምዙይ ድማ ይብሉ ነበሩ፦ “ምሕረቱ ንዘለኣለም እዩ እሞ ንኣቦና ኣመስግንዎ።” ክዝምሩን ከመስግኑን ምስ ጀመሩ ድማ፥ ኣቦና ኣብ ልዕሊ እቶም ንይሁዳ ዝመፁ ደቂ ኣሞንን ሞኣብን ሰብ እምባ ሴይርን ኣድበይቲ ኣቐመጠሎም፤ ንሳቶም ከዓ ተስዓሩ። ደቂ ኣሞንን ሞኣብን ድማ ኣብ ልዕሊ እቶም ኣብ እምባ ሴይር ዝነበሩ ህዝቢ ፈፂሞም ከጥፍእዎምን ከህልቕዎምን ተንሱ፤ ንሰብ እምባ ሴይር ምስ ወድእዎም ከዓ፥ ተመሊሶም ነንሕድሕዶም ተቓተሉ።

ይሁዳ ናብቲ ኣብ ምድረ በዳ ዘሎ መዕቘቢ ምስ በፅሑ፥ ናብቲ ዓብዪ ሰራዊት ምስ ጠመቱ ድማ፥ እንሆ ኣብ ምድሪ ዝወደቑ ሬሳታት ጥራሕ ረአዩ፤ ዘምለጠ ሓደ እኳ ኣይነበረን። ኢዮሳፍጥን ህዝቡን ድማ ነቶም ምዉታት ክዘምቱ መፁ፤ ኣብኣቶም ከዓ ብዙሕ ጥሪትን ክዳውንትን ክቡር ነገርን ረኸቡ፤ ክፆርዎ ዘይከኣሉ ብዙሕ ስለ ዝነበረ፥ ንምእካቡ ሰለስተ መዓልቲ ወሰደሎም።

ብራብዓይ መዓልቲ ድማ ኣብ ለሰ ብራካ ተኣከቡ፤ ኣብኡ ኸዓ ንኣቦና ኣመስገንዎ፤ ስለዙይ እታ ቦታ እቲኣ ኽሳዕ ሎሚ ለሰ ብራካ ትብሃል ኣላ። ^a ኵሎም ሰብ ይሁዳን ኢየሩሳሌምን ድማ፥ ኢዮሳፍጥ መሪሕዎም፥ ኣቦና ኣብ ልዕሊ ፀላእቶም ስለ ዘሐጐሶም፥ ብሓጐስ ናብ ኢየሩሳሌም ተመለሱ። ብበገናን መሰንቆን መለኸትን ድማ ናብ ኢየሩሳሌም ኣተዉ፤ ናብ ቤት ኣቦና ኸዓ ኸዱ። ኣቦና ምስ ፀላእቲ እስራኤል ከም ዝተዋግአ ምስ ሰምዑ ድማ፥ ኣብ ልዕሊ ኵለን እተን ኣብ ዙርያ ዝነበራ መንግስታት ፍርሓት ኣቦና ወደቐ። ኣቦኡ ብዙርያኡ ዕረፍቲ ስለ ዝሃቦ ድማ፥ መንግስቲ ኢዮሳፍጥ ብሰላም ነበረት።

መንገዲ ኣቦና ዝሰዓበ ንጉስ

ኢዮሳፍጥ ኣብ ሰላሳን ሓሙሽተን ዓመቱ ኣብ ይሁዳ ነገሰ፤ ኣብ ኢየሩሳሌም ኮይኑ ድማ ዕስራን ሓሙሽተን ዓመት ገዝአ፤ ስም እኖኡ ዓዙባ ጓል ሺልሒ ነበረ። ኣብ መንገዲ ኣቦኡ ኣሳ ተመላሊሱ ካብኡ ኣይዘንበለን፤ ኣብ ቅድሚ ኣቦና ቅኑዕ ዝኾነ ኸዓ ገበረ። እቶም ዀረብታታት ግና ኣይተገለሱን፤ እቶም ህዝቢ ድማ ገና ልቦም ናብ ኣምላኽ ኣቦታቶም ኣየቕንዑን ነበሩ።

እቲ ዝተረፈ ናይ ኢዮሳፍጥ ነገር፥ ካብ መጀመርታ ኽሳዕ መወዳእታ፥ ኣብ ታሪኽ ኢዩ ወዲ ኣናኒ ዝተፅሓፈ እዩ፤ ንሱ ኸዓ ኣብ መፅሓፍ ነገስታት እስራኤል ይርከብ።

ድሕር እዙይ ኢዮሳፍጥ ንጉስ ይሁዳ ምስ ኣካዝ ንጉስ እስራኤል ተሻሪኹ፤ ንሱ ድማ ክፉእ ገበረ። ናብ ተርሴስ ዝኸዳ መራኽብ ንግዲ ኽሰርሑ ድማ ምስኡ ተሓበረ፤ እተን መራኽብ ከዓ ኣብ ዔፅዮንጋብር ተሰርሓ። ኤልኤዘር ወዲ ዶዳዋ በዓል ማሪሳ ድማ ኣብ ልዕሊ ኢዮሳፍጥ ከምዙይ ኢሉ ተነበየ፦ “ምስ ኣካዝ ስለ ዝተሻረኽኻ፥ ኣቦና ንስራሕካ ሰበሮ።” እተን መራኽብ ከዓ ተሰበራ፤ ናብ ተርሴስ ድማ ክኸዳ ኣይከኣላን።