Jobu 21

21 ¹Nígbà náà ni Jobu dáhùn pé: ²“Ẹ fi etí sílẹ̀ dáradára sí ọ̀rọ̀ mi, kí èyí sì jẹ́ ìtùnú tí ẹ fi fún mi. ³Ẹ mú sùúrù fún mi nígbà tí mo bá ń sọ̀rọ̀, lẹ́yìn tí mo bá sì ti sọ̀rọ̀ tán, ẹ lè máa fi mí ṣe ẹlẹ́yà lọ. ⁴Ní ti èmi, ṣé ènìyàn lásán ni mo ń ṣàròyé sí? Èéṣe tí sùúrù mi kò fi ní tán? ⁵Ẹ wò mí kí ẹnu sì yà yín, kí ẹ sì fi ọwọ́ yín bo ẹnu yín. ⁶Nígbà tí mo bá rántí rẹ̀, ẹ̀rù bà mí, ìwárìrì sì mú ara mi. ⁷Èéṣe tí àwọn ènìyàn búburú fi ń wà láàyè lọ, tí wọ́n ń darúgbó, tí wọ́n sì ń pọ̀ sí i ní agbára? ⁸Àwọn ọmọ wọn fìdí kalẹ̀ ní àìléwu pẹ̀lú wọn ní ojú wọn, àti àwọn ìran wọn níwájú wọn. ⁹Ilé wọn wà láìséwu, wọn kò sì bẹ̀rù, ọ̀pá Ọlọ́run kì í sì í bọ́ lù wọ́n. ¹⁰Akọ màlúù wọn ń bímọ, kì í sì í kùnà; abo màlúù wọn ń bí ọmọ, kì í sì í ṣẹ́yún. ¹¹Wọ́n ń jẹ́ kí àwọn kékeré wọn máa sáré káàkiri bí agbo ẹran, àwọn ọmọ wọn sì ń fò kiri. ¹²Wọ́n ń kọrin sí ìlù àti dùùrù, wọ́n sì ń yọ̀ sí ohùn fèrè. ¹³Wọ́n ń lo ọjọ́ wọn nínú ọrọ̀, wọ́n sì ń sọ̀kalẹ̀ lọ sínú isà òkú ní àlàáfíà. ¹⁴Síbẹ̀ wọ́n wí fún Ọlọ́run pé, ‘Fi wá sílẹ̀! Àwa kò ní ìfẹ́ láti mọ ọ̀nà rẹ. ¹⁵Kí ni Olódùmarè, tí àwa ó fi sìn ín? Èrè kí sì ni àwa ó jẹ bí a bá gbàdúrà sí i?’ ¹⁶Ṣùgbọ́n ọrọ̀ wọn kò sí ní ọwọ́ ara wọn; èmi kò ní nǹkan kan ṣe pẹ̀lú ìmọ̀ràn àwọn ènìyàn búburú. ¹⁷Nígbà mélòó ni fìtílà àwọn ènìyàn búburú fi ń kú? Nígbà mélòó ni àjálù wọn fi ń bọ́ lù wọ́n? Nígbà mélòó ni Ọlọ́run fi ń pín ìrora nínú ìbínú rẹ̀? ¹⁸Nígbà mélòó ni wọ́n fi dàbí koríko gbígbẹ níwájú afẹ́fẹ́, bí ìyàngbò tí ìjì ń gbá lọ? ¹⁹Ẹ wí pé, ‘Ọlọ́run to ìjìyà ènìyàn jọ fún àwọn ọmọ rẹ̀.’ Jẹ́ kí ó san án fún ọkùnrin náà fúnra rẹ̀, kí ó bàa lè kọ́ ọ. ²⁰Jẹ́ kí ojú ara rẹ̀ rí ìparun rẹ̀, kí ó sì mu ìbínú Olódùmarè. ²¹Nítorí kí ni ó ṣe kàn án nípa agbo ilé rẹ̀ lẹ́yìn rẹ̀, nígbà tí a bá ké oṣù rẹ̀ kúrú? ²²Ṣé ẹnikẹ́ni lè kọ́ Ọlọ́run ní ìmọ̀, nígbà tí òun ni ó ń ṣe ìdájọ́ àwọn tí ó wà lókè? ²³Ẹnìkan a kú nígbà tí ó kún fún agbára, ní ìrọ̀rùn pátápátá àti ní àìléwu, ²⁴ara rẹ̀ kún fún oúnjẹ dáradára, àti pé mùdùnmúdùn egungun rẹ̀ ṣì tutù. ²⁵Ẹlòmíràn a kú pẹ̀lú ọkàn kíkorò, láìfi ẹnu kan ohun rere kankan rí. ²⁶Pa pọ̀ ni wọ́n dùbúlẹ̀ nínú erùpẹ̀, kòkòrò sì bo àwọn méjèèjì. ²⁷Ẹ wò ó, mo mọ èrò yín, àti ète yín láti ṣe mí ní àìtọ́. ²⁸Nítorí ẹ wí pé, ‘Níbo ni ilé ọlọ́lá wà nísinsìnyí? Níbo ni àgọ́ tí ènìyàn búburú gbé ń gbé?’ ²⁹Ṣé ẹ kò tí ì béèrè lọ́wọ́ àwọn tí ń rìn ìrìnàjò rí? Ṣé ẹ kì yóò gba ẹ̀rí tí wọ́n fi lélẹ̀, ³⁰pé a dá ènìyàn búburú sí ní ọjọ́ àjálù, pé a gbà á sílẹ̀ ní ọjọ́ ìbínú? ³¹Ta ni ó dojú kọ ọ́ lójú rẹ̀ nítorí ìwà rẹ̀, ta ni ó sì san án padà fún ohun tí ó ti ṣe? ³²A gbé e lọ sí isà òkú, a sì ń ṣọ́ ibojì rẹ̀. ³³Erùpẹ̀ àfonífojì dùn mọ́ ọn; gbogbo ènìyàn ń tẹ̀lé e, àwọn tí ó ṣáájú rẹ̀ sì kò lóǹkà. ³⁴Nítorí náà, báwo ni ẹ ṣe lè tù mí nínú pẹ̀lú ọ̀rọ̀ asán? Èké lásán ni èsì yín jẹ́.”