Jobu 20

20 ¹Nígbà náà ni Sofari ará Naama dáhùn pé: ²“Ìdí nìyí tí àwọn èrò mi tí ń yọ mí lẹ́nu fi ń sún mi láti dáhùn, nítorí ìrúkèrúdò tí ń bẹ nínú mi. ³Mo gbọ́ ìbániwí tí ń dójútì mí, ẹ̀mí kan sì ń sún mi láti inú òye mi láti fèsì. ⁴Dájúdájú ìwọ mọ bí ó ti rí láti ìgbà pípẹ́ wá, láti ìgbà tí a ti fi ènìyàn sí orí ilẹ̀ ayé: ⁵ìṣẹ́gun ènìyàn búburú kúrú, ayọ̀ aláìwà-bí-Ọlọ́run sì wà fún ìṣẹ́jú kan péré. ⁶Bí ìgbéraga rẹ̀ tilẹ̀ dé ọ̀run tí orí rẹ̀ sì kan àwọsánmà, ⁷yóò ṣègbé títí láé, bí ìgbẹ́ ara rẹ̀; àwọn tí ó ti rí i yóò béèrè pé, ‘Níbo ló wà?’ ⁸Yóò fò lọ bí àlá, a kì yóò sì rí i mọ́, a ó lé e kúrò bí ìran òru. ⁹Ojú tí ó rí i kì yóò rí i mọ́; ibùjókòó rẹ̀ kì yóò sì wò ó mọ́. ¹⁰Àwọn ọmọ rẹ̀ yóò máa tọrọ lọ́wọ́ àwọn tálákà; ọwọ́ ara rẹ̀ ni yóò sì dá ọrọ̀ rẹ̀ padà. ¹¹Agbára èwe tí ó kún inú egungun rẹ̀ yóò bá a dùbúlẹ̀ nínú erùpẹ̀. ¹²Bí ibi tilẹ̀ dùn ní ẹnu rẹ̀ tí ó sì fi í pamọ́ sábẹ́ ahọ́n rẹ̀, ¹³bí ó tilẹ̀ kọ̀ láti jẹ́ kí ó lọ, tí ó sì pa á mọ́ ní ẹnu rẹ̀, ¹⁴síbẹ̀ oúnjẹ rẹ̀ yóò kan nínú ikùn rẹ̀; yóò di oró paramọ́lẹ̀ nínú rẹ̀. ¹⁵Ó gbé ọrọ̀ mì ṣùgbọ́n yóò bì wọ́n jáde; Ọlọ́run yóò lé wọn jáde kúrò nínú ikùn rẹ̀. ¹⁶Ó fà oró paramọ́lẹ̀ mu; ehín ejò olóró yóò sì pa á. ¹⁷Kì yóò rí àwọn ìṣàn omi, àwọn odò tí ń ṣàn pẹ̀lú oyin àti wàrà. ¹⁸Yóò dá èso iṣẹ́ àṣekára rẹ̀ padà láìjẹ ẹ́; kì yóò gbádùn èrè òwò rẹ̀. ¹⁹Nítorí ó ni àwọn tálákà lára ó sì fi wọ́n sílẹ̀; ó fi agbára gba ilé tí òun kò kọ́. ²⁰Nítorí tí ikùn rẹ̀ kò mọ àlàáfíà, kì yóò sì fi àwọn ohun tí ó wù ú bọ́ lọ́wọ́. ²¹Kò sí ohun tí ó kù fún un láti jẹ run; nítorí náà aásìkí rẹ̀ kì yóò dúró pẹ́. ²²Ní àkúnwọ́sílẹ̀ ọ̀pọ̀ rẹ̀, ìpọ́njú yóò dé bá a; gbogbo ẹrù ìyà yóò wá sórí rẹ̀. ²³Nígbà tí ó bá ti kún ikùn rẹ̀, Ọlọ́run yóò tú ìbínú gbígbóná rẹ̀ sí i, yóò sì rọ̀ ọ́ sórí rẹ̀ bí oúnjẹ rẹ̀. ²⁴Bí ó tilẹ̀ sá fún ohun ìjà irin, ọfà idẹ yóò gún un ká. ²⁵Ó fà á yọ, ó sì jáde kúrò nínú ara rẹ̀; orí dídán rẹ̀ jáde kúrò nínú àpò òróòro rẹ̀. Ẹ̀rù yóò bà á. ²⁶Òkùnkùn biribiri ti wà ní ìdúró de àwọn ìṣúra rẹ̀; iná tí kò sí ẹni tí ó dá yóò jó un run, yóò sì jẹ ohun yòówù tí ó ṣẹ́kù nínú àgọ́ rẹ̀ run. ²⁷Àwọn ọ̀run yóò ṣípayá ẹ̀bi rẹ̀, ilẹ̀ ayé yóò sì dìde sí i. ²⁸Gbogbo ọrọ̀ ilé rẹ̀ ni a ó kó lọ, tí a ó gbá lọ ní ọjọ́ ìbínú Ọlọ́run. ²⁹Èyí ni ìpín ènìyàn búburú láti ọ̀dọ̀ Ọlọ́run, ogún tí Ọlọ́run yàn fún un.”