صوفار گئنه جاواب وردی
صوفار اؤز تلاطومو ائچئندن جاواب ورئر و شر آدامین قیسا ظفرئنئن تصوئرئنی چکئر: او، وار-دؤولتی اودار، آمّا اونو قوسار، پئسلئیی دئلئنئن آلتیندا گئزله‌یَر، تا کی، او اَفعی زهرئنه دؤنسون. او بونو تارینین تعیئن اتدئیی پای چاغیریر و باشقا هچ نه تکلئف اتمئر.
20 1او واخت نَعماتلی صوفار جاواب ورئب ددی: 2«بونا گؤره‌دئر کی، ناراحات دوشونجه‌لرئم منی جاواب ورمه‌یه واداشدیریر، ائچئمده اولان تلاطوما گؤره. 3منی تحقئر ادن بئر تَنبِه اشئدئرم، و آنلاغیمدان بئر روح منی جاواب ورمه‌یه واداشدیریر. 4یقئن کی، قدئم زامانلاردان بَری نجه اولدوغونو بئلئرسن، ائنسان یِر اوزونه قویولاندان بَری: 5شریرلر آنجاق قیسا بئر واخت ظفر تاپار، و تاریسیزلارین شادلیغی آنجاق بئر آن سورور. 6گرچی اونون تکبّورو گؤیلره چاتار و باشی بولودلارا دَیَر، 7اؤز پئینی کئمی ابده‌جک محو اولاجاق؛ اونو گؤرَنلر سوروشاجاقلار: ”او هارادادیر؟“ 8بئر یوخو کئمی اوچوب گده‌جک، بئر داها تاپیلمایاجاق، گجه رؤیاسی کئمی قووولاجاق. 9اونو گؤرَن گؤز اونو بئر داها گؤرمه‌یه‌جک؛ اونون یِری ده اونا آرتیق باخمایاجاق. 10اونون اؤولادلاری یوخسوللاردان دئلَنه‌جکلر؛ اؤز اَللری وار-دؤولتئنی قایتارمالی‌دیر. 11سوموکلرئنی دولدوران جاوانلیق طاقتی اونونلا بئرلئکده تورپاقدا اوزاناجاق. 12گرچی پئسلئک اونون آغزیندا شئرئندئر و اونو دئلئنئن آلتیندا گئزله‌یئر، 13گرچی اونو بوراخماغا راضی اولمور و اونو آغزیندا ساخلاییر، 14آمّا اونون یمه‌یی قارنیندا تورشویور؛ ائچئنده اَفعئلرئن زهرئنه چِورئلئر. 15وار-دؤولتی اودار، آمّا اونو قوسار؛ تاری اونو قارنیندان قووار. 16اَفعئلرئن زَهَرئنی اَمَر؛ گورزه‌نئن دئشلری اونو اؤلدورَر. 17آخار سولارا هچ باخمایاجاق، بال و قاتیق آخان چایلارا. 18زحمتئنئن محصولونو اودمادان قایتارمالی‌دیر؛ تئجارتئنئن منفعتئندن لذّت آلمایاجاق. 19چونکی یوخسوللاری اَزئب ترک اتدی؛ تئکمه‌دئیی بئر اِوی ضبط اتدی. 20قارنی راحاتلیق بئلمه‌دئیی اوچون، طاماح اتدئیی شیلرله قاچیب قورتولمایاجاق. 21اودماغا اونا هچ بئر شی قالمادی؛ اونا گؤره ده رئفاهی داوام اتمیه‌جک. 22بوللوغونون دولولوغوندا، سیخینتی اونو یاخالایاجاق؛ عذابین بوتون آغیرلیغی اوستونه گله‌جک. 23قارنینی دولدوراندا، تاری یانار قضبئنی اونون ضئدّئنه گؤندَ‌ره‌جک و اونو یمک کئمی اوستونه یاغدیراجاق. 24گرچی دمئر سئلاحدان قاچار، بئر بورونج اوخ اونو دَلئب کچه‌جک. 25اونو چکئب چیخاردار، او، بدنئندن چیخار؛ پاریلدایان اوجو اؤدوندن چیخار. دهشتلر اونون اوستونه دوشَر. 26تام قارانلیق اونون خزئنه‌لری اوچون پوسقودا دورار؛ هچ کسئن یاندیرمادیغی بئر اود اونو محو اده‌جک و چادیریندا قالان هر شیی اودوب قورتاراجاق. 27گؤیلر اونون تقصئرئنی آشکار اده‌جک، و یِر اونون ضئدّئنه قالخاجاق. 28اِوئنئن بوتون وار-دؤولتی داشیناجاق، تارینین قضب گونونده سوپورولوب آپاریلاجاق. 29بو، شریر آدامین تاریدان آلدیغی پای‌دیر، تارینین اونون اوچون تعیئن اتدئیی ائرثدئر.»
