ایّوبون جوابی: نئیه شر آداملار اوغور تاپیرلار؟
ایّوب دوستلارینین اعتئنا اتمه‌دئیی دلئل‌لرله جاواب ورئر: شر آداملار قوجالیب قودرتله‌نئرلر، اؤولادلاری اویناییر، و اونلار تارییا «بئزی راحات بوراخ» دیئندن سونرا صولح ائچئنده اؤلورلر. دولو و آجی، هر ائکئسی ده توزدا اوزانیر. اونلارین تسلّیسی، دیئر، یالاندیر.
21 1سونرا ایّوب جاواب وردی: 2«سؤزلرئمه دئقّتله قولاق آسین، قوی سئزئن منه وردئیئنئز تسلّی بو اولسون. 3من دانیشارکَن منه دؤزون، دانیشاندان سونرا گئنه ده اَله سالین. 4منه گلئنجه، مگر شکایتئم یالنیز بئر ائنسانا قارشی‌دیر؟ نئیه صبرئمی ائتئرمَیَم؟ 5منه باخین و مات قالین، اَلئنئزی آغزینیزین اوستونه قویون. 6اونو یادیما سالاندا، واهئمه‌یه دوشورم، و بدنئمی تئتره‌مه توتور. 7نئیه شر آداملار یاشاماقدا داوام ادئرلر، قوجالیب قودرتده آرتیرلار؟ 8اؤولادلاری گؤزلری قاباغیندا اونلارلا بئرلئکده برقرار و سالامات‌دیرلار، نسئل‌لری ده گؤزلری قاباغیندادیر. 9اِولری سالامات و قورخودان آزاددیر، تارینین دَیَنه‌یی اونلارین اوستونه دوشمور. 10اؤکوزلری جوتله‌شر و هچ واخت ائشدن دوشمز؛ ائنَکلری بالالار و بالا سالماز. 11کئچئک اوشاقلارینی سورو کئمی سربست بوراخیرلار، و اؤولادلاری آتیلیب-دوشورلر. 12دف و چنگ سسئنه نغمه اوخویورلار، و نی سسئنه شنلئک ادئرلر. 13گونلرئنی رئفاه ائچئنده کچئردئرلر، و صولح ائچئنده قبئره اِنئرلر. 14آمّا تارییا دیئرلر: ”بئزی راحات بوراخ! سنئن یوللارینی تانیماغا هچ آرزوموز یوخدور. 15قادئری‌موطلق کئمدئر کی، اونا خئدمت ادک؟ اونا دوعا اتمکدن نه قازانجیمیز اولار؟“ 16آمّا اونلارین رئفاهی اؤز اَللرئنده دیئل؛ شر آداملارین مصلحتی ائله منئم هچ ائشئم یوخدور. 17شر آداملارین چیراغی نچه دفه سؤندورولور؟ فلاکت‌لری نچه دفه اونلارین اوستونه دوشور؟ تاری قضبئنده نچه دفه عذاب پایلار؟ 18نچه دفه اونلار یِل قاباغیندا سامان کئمی اولورلار، طوفانین سوووردوغو سامان چؤپو کئمی؟ 19سئز دیئرسئنئز: ”تاری بئر آدامین جزاسینی اؤولادلاری اوچون ساخلاییر.“ قوی آدامین اؤزونه عوضئنی ورسئن کی، اونو بئلسئن. 20قوی اؤز گؤزلری اؤز هلاکتئنی گؤرسون، و قوی قادئری‌موطلقئن قضبئنی ائچسئن. 21چونکی آیلاری کسئلَنده، اؤزوندن سونرا اؤز عایئله‌سی اونون نه‌یئنه گرکدئر؟ 22آیا کئمسه تارییا علم اؤیرَده بئلر، چونکی اوجالاردا اولانلاری محاکئمه ادن اودور؟ 23بئری طاقتی یرئنده اؤلور، تامامیله راحات و سالامات حالدا، 24بدنی یاخشی بسله‌نمئش، و سوموکلرئنئن ایلئیی حله ده نَمدئر. 25آیریسی جانی آجی حالدا اؤلور، هچ بئر یاخشیلیق دادمادان. 26بئرلئکده تورپاقدا اوزانیرلار، و قوردلار هر ائکئسئنی اؤرتور. 27باخین، سئزئن فئکئرلرئنئزی و منه ضرر یتئرمک اوچون فئتنه‌لرئنئزی بئلئرم. 28چونکی سئز دیئرسئنئز: ”ائندی اعیان آدامین اِوی هارادادیر؟ شر آدامین یاشادیغی چادیر هارادادیر؟“ 29مگر یوللاری گزنلردن هچ سوروشمامیسینیز؟ اونلارین وردئیی شهادتی قبول اتمَزسئنئز، 30کی، شر آدام فلاکت گونونده صاغ قالیر، و قضب گونونده نئجات تاپیر؟ 31کئم اونون رفتارینی اوزونه وورار؟ و اتدئکلرئنه گؤره اونا کئم عوضئنی وِرَر؟ 32او قبئره آپاریلیب، و مزاری اوستونده کشئک چکئلئب. 33دره‌نئن تورپاغی اونا شئرئندئر؛ هرکس اونون دالینجا گدئر، و اوندان قاباق گلنلرئن سایی-حسابی یوخدور. 34بله‌جه نجه منی بوش سؤزلرله تسلّی وره بئلرسئنئز؟ جاوابلارینیز یالاندان باشقا بئر شی دیئل.»
