ኢዮብ 21 FHB Father's Heart Bible™

21 ¹ሽዑ ኢዮብ ከምዙይ ኢሉ መለሰ፦ ²“ንቓለይ ኣፀቢቕኩም ስምዑ፤ እዝ ከዓ እትህቡኒ መፀናንዒ ይኹን። ³ክዛረብ እንተለኹ ዓገሱኒ፤ ምስ ተዛረብኩ ኸዓ ከተላግፁ ትኽእሉ ኢኹም። ⁴ኣነስ፥ ጥርዓነይ ኣብ ልዕሊ ሰብዶ እዩ? ስለ ምንታይ ደኣ ትዕግስተይ ዘይጠፍእ? ⁵ንኣይ ጠሚትኩም ተገረሙ፤ ኢድኩም ድማ ኣብ ኣፍኩም ግበሩ። ⁶እዙይ ክዝክር እንተለኹ እሸበር፤ ንስጋይውን ራዕዲ ሓዞ። ⁷ሓጥኣን ስለ ምንታይ ይነብሩ፥ ኣሪጎም ድማ ብሓይሊ ይበዝሑ? ⁸ደቆም ኣብ ቅድሚ ዓይኖም ምሳታቶም ተደላዲሎምን ተፀኒዖምን ኣለዉ፤ ዘርኦም ድማ ኣብ ቅድሚ ኣዒንቶም ኣሎ። ⁹ኣባይቶም ብሰላም ኣለዋ፥ ካብ ፍርሓት ድማ ናፃ እየን፤ በትሪ እግዚኣብሄር ከዓ ኣብ ልዕሊኦም ኣይወድቕን። ¹⁰ብዕራዮም ይዋሰብ፥ ከቶ ኣይፈሽልን፤ ላሕሞም ትወልድ፥ ጥንሲ ድማ ኣይወርዳን። ¹¹ንናእሽቱ ደቆም ከም መጓሰ ይፍንውዎም፤ ደቆም ድማ ይዘልሉ። ¹²ብኸበሮን ብበገናን ይዝምሩ፤ ብድምፂ እምብልታ ድማ ይሕጎሱ። ¹³መዓልቲታቶም ብብልፅግና የሕልፉ፤ ብሰላም ድማ ናብ መቓብር ይወርዱ። ¹⁴ንእግዚኣብሄር ግና ከምዙይ ይብልዎ፦ “ሕደገና! ንመንገድኻ ኽንፈልጥ ኣይንደልን ኢና። ¹⁵እቲ ዅሉ ዝኽእል መን እዩ፥ ክነገልግሎ? ንእኡ እንተ ፀለናዮኸ እንታይ ክዓብሰልና እዩ?” ¹⁶ብልፅግናኦም ግና ኣብ ኢዶም ኣይኮነን፤ ምኽሪ ሓጥኣን ካባይ ይርሓቕ። ¹⁷መብራህቲ ሓጥኣን ክንደይ ሻዕ እዩ ዝጠፍእ? መዓቶም ክንደይ ሻዕ እዩ ኣብ ልዕሊኦም ዝወርድ? እግዚኣብሄር ብዂራኡ ክንደይ ሻዕ እዩ ስቓይ ዝዕድል? ¹⁸ክንደይ ሻዕ እዮም ከም ሓሰር ቅድሚ ንፋስ ዝኾኑ፥ ከምቲ ንፋስ ኣውሎ ዝፀርጎ ብቝቡቕ? ¹⁹ንስኻትኩም “እግዚኣብሄር ቅፅዓት ሰብ ንደቁ የቐምጦ” ትብሉ ኣለኹም። ንሱ ባዕሉ ምእንቲ ኽፈልጦ፥ ንሰብ ባዕሉ ይፈድዮ። ²⁰ኣዒንቱ ጥፍኣቱ ይረኣያ፤ ቍጥዓ እቲ ዅሉ ዝኽእል ድማ ይስተ። ²¹ኣዋርሑ ተቘሪፁ ምስ ሞተ፥ ድሕሪኡ ብስድራ ቤቱ እንታይ ይግደስ? ²²ንእግዚኣብሄር ፍልጠት ዝምህሮ ኣሎዶ? ነቶም ኣብ ላዕሊ ዘለዉ ዝፈርድ ንሱ ባዕሉ እዩ እሞ። ²³ሓደ ሰብ ብምሉእ ሓይሉ ይመውት፥ ፈፂሙ ዓሪፉን ተፀኒዑን፤ ²⁴ስጋኡ ብፅቡቕ ተመጊቡ፥ ኣንጕዐ ኣዕፅምቱ ድማ ገና ርሑስ እዩ። ²⁵ካልእ ከዓ ብምረት ነፍሱ ይመውት፥ ሰናይ ከቶ እንተይጠዓመ። ²⁶ብሓደ ኣብ ሓመድ ይድቅሱ፤ ንኽልቲኦም ድማ ሓሰኻ ይሽፍኖም። ²⁷እንሆ፥ ሓሳባትኩም፥ ከምኡ ድማ ንኽትብድሉኒ ዝሓሰብኩምዎ ተንኮል እፈልጥ እየ። ²⁸ንስኻትኩም “ቤት እቲ መስፍን ሕዚ ኣበይ ኣላ? እቲ ሓጥኣን ዝነብሩሉ ድንኳን ኣበይ ኣሎ?” ትብሉ ኣለኹም እሞ። ²⁹ነቶም ብመንገዲ ዝሓልፉ ሓቲትኩምዶ ኣይትፈልጡን? ነቲ ዝህብዎ ምስክር ኣይትቕበሉን ኢኹም፥ ³⁰እቲ ክፉእ ሰብ ብመዓልቲ መዓት ከም ዝድሕን፥ ብመዓልቲ ቍጥዓ ድማ ከም ዝናገፍ? ³¹ኣብ ገፁ ኾይኑ ዝገንሖ መን እዩ? ብሰሪ መንገዱ፥ ነቲ ዝገበሮ ኸዓ ዝፈድዮ መን እዩ? ³²ናብ መቓብር ይውሰድ፤ ኣብ ልዕሊ መቓብሩ ኸዓ ሓለዋ ይግበር። ³³ሓመድ እቲ ሽንጥሮ ንዕኡ ጥዑም እዩ፤ ኵሉ ሰብ ይስዕቦ፥ እቶም ቀቅድሚኡ ዝነበሩ ኸዓ ቍፅሪ የብሎምን። ³⁴እምበኣር በዝ ከንቱ ቃላት ከመይ ኢልኩም ክተፅናንዑኒ ትኽእሉ? መልስታትኩም ዓመፅ ጥራሕ ደኣ እዩ።”