యోబు 21

21 ¹అప్పుడు యోబు ఇలా జవాబిచ్చాడు: ²"నా మాటలను జాగ్రత్తగా వినండి, మీరు నాకు ఇచ్చే ఓదార్పు ఇదే అయ్యుండనివ్వండి. ³నేను మాట్లాడేటప్పుడు నన్ను సహించండి, నేను మాట్లాడిన తరువాత మీరు హేళన చేస్తూ ఉండవచ్చు. ⁴నా విషయానికొస్తే, నా ఫిర్యాదు కేవలం ఒక మనుష్యునికి వ్యతిరేకంగా ఉందా? నేను నా సహనం ఎందుకు కోల్పోకూడదు? ⁵నా వైపు చూసి విస్మయం చెందండి, మీ చేతిని మీ నోటిపై పెట్టుకోండి. ⁶నేను దాన్ని జ్ఞాపకం చేసుకున్నప్పుడు నేను భయభ్రాంతుడనవుతాను, వణకు నా శరీరాన్ని పట్టుకుంటుంది. ⁷దుష్టులు ఎందుకు జీవిస్తూనే ఉంటారు, ముసలివారవుతూ, బలంలో అభివృద్ధి చెందుతూ ఉంటారు? ⁸వారి పిల్లలు వారి కళ్ళ ఎదుటనే వారితో స్థిరపడి, సురక్షితంగా ఉంటారు, వారి సంతానం వారి కంటి ఎదుటనే ఉంటారు. ⁹వారి ఇళ్ళు క్షేమంగా, భయరహితంగా ఉంటాయి, దేవుని దండం వారిమీద పడదు. ¹⁰వారి ఎద్దు జతకూడి ఎప్పుడూ విఫలం కాదు; వారి ఆవు దూడను ఈనుతుంది, గర్భస్రావం కాదు. ¹¹వారు తమ చిన్నపిల్లలను మందవలె స్వేచ్ఛగా తిరగనిస్తారు, వారి పిల్లలు గంతులు వేస్తారు. ¹²వారు తంబుర, సితారాలతో పాడతారు, పిల్లనగ్రోవి శబ్దానికి సంతోషిస్తారు. ¹³వారు తమ దినాలను వర్ధిల్లుతూ గడుపుతారు, సమాధానంతో సమాధికి దిగిపోతారు. ¹⁴అయినా వారు దేవునితో ఇలా అంటారు, 'మమ్మల్ని విడిచిపెట్టు! నీ మార్గాలను తెలుసుకోవాలని మాకు కోరిక లేదు. ¹⁵మేము ఆయనను సేవించడానికి సర్వశక్తిమంతుడు ఏపాటివాడు? ఆయనకు ప్రార్థన చేయడం వలన మాకు లాభం ఏమిటి?' ¹⁶అయితే వారి వర్ధిల్లడం వారి స్వంత చేతుల్లో లేదు; దుష్టుల ఆలోచనతో నాకేమీ సంబంధం లేదు. ¹⁷దుష్టుల దీపం ఎంత తరచుగా ఆర్పివేయబడుతుంది? వారి విపత్తు ఎంత తరచుగా వారిమీద పడుతుంది? దేవుడు తన కోపంలో ఎంత తరచుగా బాధలను పంచిపెడతాడు? ¹⁸గాలికి ఎదురుగా ఉన్న గడ్డిపరకవలె, తుఫాను ఎగరగొట్టే పొట్టువలె వారు ఎంత తరచుగా ఉంటారు? ¹⁹'ఒకని శిక్షను దేవుడు వాని పిల్లల కోసం దాచిపెడతాడు' అని మీరు అంటారు. వాడే దాన్ని తెలుసుకునేలా ఆయన వానికే ప్రతిఫలమివ్వాలి. ²⁰వాని స్వంత కళ్ళే వాని నాశనాన్ని చూడనివ్వండి, వాడు సర్వశక్తిమంతుని ఉగ్రతను త్రాగనివ్వండి. ²¹వాని నెలలు కుదించబడినప్పుడు, తన తరువాత మిగిలిన తన కుటుంబం గురించి వాడు ఏమి లక్ష్యపెడతాడు? ²²పైన ఉన్నవారికి తీర్పు తీర్చేవాడు ఆయనే గనుక, దేవునికి ఎవరైనా జ్ఞానాన్ని బోధించగలరా? ²³ఒకడు పూర్తి బలంతో, పూర్తిగా నెమ్మదిగా, సురక్షితంగా ఉండి చనిపోతాడు, ²⁴వాని శరీరం బాగా పోషించబడి, వాని ఎముకల మూలుగ ఇంకా తడిగా ఉంటుంది. ²⁵మరొకడు ఏ మేలును రుచి చూడకుండా, చేదైన ప్రాణంతో చనిపోతాడు. ²⁶వారిద్దరూ కలిసి మట్టిలో పండుకుంటారు, పురుగులు వారిద్దరినీ కప్పివేస్తాయి. ²⁷చూడండి, నాకు మీ ఆలోచనలు తెలుసు, నాకు అన్యాయం చేయాలనే మీ కుతంత్రాలు తెలుసు. ²⁸ఎందుకంటే మీరు ఇలా అంటారు, 'ఘనుని ఇల్లు ఇప్పుడు ఎక్కడ? దుష్టులు నివసించిన గుడారం ఎక్కడ?' ²⁹దారుల్లో ప్రయాణించేవారిని మీరు ఎన్నడూ అడగలేదా? వారు ఇచ్చే రుజువును మీరు అంగీకరించరా, ³⁰విపత్తు దినాన దుష్టుడు తప్పించబడతాడని, ఉగ్రత దినాన వాడు విడిపించబడతాడని? ³¹వాని ప్రవర్తనను గురించి వాని ముఖం ఎదుటనే ఎవరు వాడిని ఎదిరిస్తారు, వాడు చేసినదానికి ఎవరు వానికి ప్రతిఫలమిస్తారు? ³²వాడు సమాధికి మోసుకుపోబడతాడు, వాని సమాధిపై కావలి ఉంచబడుతుంది. ³³లోయలోని మట్టి వానికి తియ్యగా ఉంటుంది; ప్రతివాడూ వాని వెంట వెళ్తాడు, వాని ముందు వెళ్ళినవారు లెక్కకు మించినవారు. ³⁴కాబట్టి మీరు వ్యర్థమైన మాటలతో నన్ను ఎలా ఓదార్చగలరు? మీ జవాబులు అబద్ధం తప్ప మరేమీ కాదు."