యోబు 20

20 ¹అప్పుడు నయమాతీయుడైన జోఫరు ఇలా జవాబిచ్చాడు: ²"నాలో కలవరం ఉన్నందున, నా కలత చెందిన ఆలోచనలు నన్ను జవాబియ్యమని బలవంతపెడుతున్నాయి. ³నన్ను అవమానపరచే గద్దింపును నేను వింటున్నాను, నా వివేకంలో నుండి ఒక ఆత్మ నన్ను జవాబియ్యమని పురికొల్పుతోంది. ⁴పురాతన కాలం నుండి, మనుష్యుడు భూమిపై ఉంచబడినప్పటి నుండి అది ఎలా ఉందో నీకు తప్పకుండా తెలుసు: ⁵దుష్టుని విజయోత్సాహం క్షణికమైనది, భక్తిహీనుని ఆనందం ఒక క్షణం మాత్రమే నిలుస్తుంది. ⁶అతని గర్వం ఆకాశాలను అంటినా, అతని తల మేఘాలను తాకినా, ⁷అతను తన సొంత మలం వలె శాశ్వతంగా నశించిపోతాడు; అతనిని చూసినవారు, 'అతడు ఎక్కడ ఉన్నాడు?' అని అడుగుతారు. ⁸అతను కలలా ఎగిరిపోతాడు, ఇక ఎన్నడూ కనబడడు, రాత్రి దర్శనంలా తరిమివేయబడతాడు. ⁹అతనిని చూసిన కన్ను ఇక అతనిని చూడదు; అతని స్థలం ఇక అతనిని కనిపెట్టదు. ¹⁰అతని పిల్లలు దరిద్రుల నుండి భిక్షమెత్తుకుంటారు; అతని సొంత చేతులే అతని ఐశ్వర్యాన్ని తిరిగి ఇచ్చివేయవలసి వస్తుంది. ¹¹అతని ఎముకలను నింపిన యౌవన బలం అతనితో పాటు మట్టిలో పరుండుతుంది. ¹²చెడు అతని నోటికి తియ్యగా ఉన్నప్పటికీ, అతను దానిని తన నాలుక క్రింద దాచుకున్నప్పటికీ, ¹³దానిని విడిచిపెట్టడానికి ఇష్టపడక తన నోటిలో ఉంచుకున్నప్పటికీ, ¹⁴అతని ఆహారం అతని కడుపులో పులిసిపోతుంది; అది అతనిలో నాగుపాముల విషమవుతుంది. ¹⁵అతను ఐశ్వర్యాన్ని మ్రింగివేస్తాడు గాని వాంతి చేసుకుంటాడు; దేవుడు దానిని అతని కడుపులో నుండి బయటకు వెళ్ళగొడతాడు. ¹⁶అతను నాగుపాముల విషాన్ని జుర్రుకుంటాడు; సర్పపు కోరలు అతనిని చంపుతాయి. ¹⁷అతను తేనె, పెరుగు ప్రవహించే నదులను, ఏరులను ఎన్నడూ చూడడు. ¹⁸అతను తన కష్టార్జిత ఫలాన్ని మ్రింగకుండానే తిరిగి ఇచ్చివేయవలసి వస్తుంది; తన వ్యాపార లాభాన్ని అతను అనుభవించడు. ¹⁹ఎందుకంటే అతను దరిద్రులను నలిపి విడిచిపెట్టాడు; తాను కట్టని ఇంటిని అతను ఆక్రమించుకున్నాడు. ²⁰అతని కడుపునకు ఎన్నడూ శాంతి తెలియనందున, తాను ఆశించిన వాటితో అతను తప్పించుకోలేడు. ²¹అతను మ్రింగివేయడానికి ఏదీ మిగలలేదు; కాబట్టి అతని క్షేమం నిలువదు. ²²అతని సమృద్ధి నిండుగా ఉన్నప్పుడే బాధ అతనిని ఆవరిస్తుంది; దుఃఖపు పూర్తి భారం అతని మీదికి వస్తుంది. ²³అతను తన కడుపు నింపుకున్నప్పుడు, దేవుడు తన మండుతున్న కోపాన్ని అతనిపై వదులుతాడు, దానిని అతని ఆహారంగా అతని మీద కురిపిస్తాడు. ²⁴అతను ఇనుప ఆయుధం నుండి పారిపోయినా, ఇత్తడి బాణం అతనిని పొడిచివేస్తుంది. ²⁵అతను దానిని బయటికి లాగుతాడు, అది అతని శరీరం నుండి వస్తుంది; మెరుస్తున్న ములుకు అతని పిత్తాశయం నుండి బయటికి వస్తుంది. భయాంకరాలు అతని మీదికి వచ్చిపడతాయి. ²⁶కటిక చీకటి అతని ధనరాశుల కోసం పొంచి ఉంది; ఎవరూ రాజేయని అగ్ని అతనిని దహిస్తుంది, అతని గుడారంలో మిగిలినదానిని మ్రింగివేస్తుంది. ²⁷ఆకాశాలు అతని దోషాన్ని బయలుపరుస్తాయి, భూమి అతనికి విరోధంగా లేస్తుంది. ²⁸అతని ఇంటి ఐశ్వర్యమంతా కొట్టుకుపోతుంది, దేవుని ఉగ్రత దినమున ఊడ్చివేయబడుతుంది. ²⁹ఇది దుష్టునికి దేవుని నుండి లభించే భాగం, దేవుడు అతనికి నియమించిన స్వాస్థ్యం."