UJobe 20

20 ¹Wayesephendula uZofari umNahama, wathi: ²“Yilokhu okwenza imicabango yami ekhathazekile ingiphoqe ukuba ngiphendule, ngenxa yesiyaluyalu esiphakathi kwami. ³Ngizwa ukusolwa okungihlazayo, nomoya ophuma ekuqondeni kwami ungishukumisela ukuba ngiphendule. ⁴Ngempela uyakwazi ukuthi bekunjani kusukela endulo, selokhu umuntu abekwa emhlabeni: ⁵ukunqoba kwababi kumfushane, nenjabulo yongamesabi uNkulunkulu ihlala umzuzwana nje. ⁶Noma ukuzidla kwakhe kufinyelela emazulwini, nekhanda lakhe lithinta amafu, ⁷uyakubhubha kuze kube phakade, njengobulongwe bakhe; labo abake bambona bayakubuza bathi, ‘Uphi na?’ ⁸Uyakundiza njengephupho, angaphinde atholakale, axoshwe njengombono wasebusuku. ⁹Iso elambonayo ngeke liphinde limbone; indawo yakhe ngeke isambuke. ¹⁰Abantwana bakhe bayakucela kwabampofu; izandla zakhe ngokwazo kumele zibuyise ingcebo yakhe. ¹¹Amandla obusha agcwele emathanjeni akhe ayakulala naye othulini. ¹²Noma ububi bumnandi emlonyeni wakhe, abufihle ngaphansi kolimi lwakhe, ¹³noma engathandi ukubuyeka buhambe, abugcine emlonyeni wakhe, ¹⁴nokho ukudla kwakhe kuyaba muncu esiswini sakhe; kuphenduka ubuhlungu bezimfezi ngaphakathi kwakhe. ¹⁵Ugwinya ingcebo kodwa ayihlanze; uNkulunkulu uyayikhipha esiswini sakhe. ¹⁶Umunya ubuhlungu bezimfezi; amazinyo ebululu ayambulala. ¹⁷Akasoze ayibuke imifudlana, imifula egeleza uju namasi. ¹⁸Kumele abuyise izithelo zomsebenzi wakhe ngaphandle kokuzigwinya; ngeke ayijabulele inzuzo yokuhweba kwakhe. ¹⁹Ngokuba wachoboza washiya abampofu; waphanga indlu angayakhanga. ²⁰Ngenxa yokuthi isisu sakhe sasingenakho ukuthula, ngeke aphunyuke nalezo zinto azifisayo. ²¹Akusalanga lutho angaludla; ngakho-ke ukuchuma kwakhe ngeke kume. ²²Ekugcwaleni kwenala yakhe, usizi luyakumfica; sonke isisindo sosizi siyakwehlela phezu kwakhe. ²³Lapho esegcwalise isisu sakhe, uNkulunkulu uyakudedela ulaka lwakhe oluvuthayo phezu kwakhe, alunise phezu kwakhe njengokudla kwakhe. ²⁴Noma ebalekela isikhali sensimbi, umcibisholo wethusi uyakumgwaza amphumele. ²⁵Uyawuhosha, uphume emzimbeni wakhe; isihloko esicwebezelayo siphume enyongweni yakhe. Izethuso ziyamehlela. ²⁶Ubumnyama obumpeleyo bucathamele amagugu akhe; umlilo ongabaswanga muntu uyakumqeda uqothule noma yini esele etendeni lakhe. ²⁷Amazulu ayakwembula icala lakhe, nomhlaba uyakumvukela. ²⁸Yonke ingcebo yendlu yakhe iyakususwa, ikhukhulwe ngosuku lolaka lukaNkulunkulu. ²⁹Yilesi isabelo somuntu omubi esivela kuNkulunkulu, ifa amiselwe lona nguNkulunkulu.”