Zofaru Acookia Rĩngĩ

Zofaru acookia aiyũrĩtwo nĩ gũthĩĩnĩka gwake mwene, na agataarĩria ũhootani mũkuhĩ wa mũndũ mwaganu: amerũkagia ũtonga agacooka akaũtahĩka, akaiga ũũru rũrĩmĩ-inĩ rwake nginya ũgatuĩka ũrũrũ wa nyoka. Oiga atĩ rĩu nĩrĩo igai rĩrĩa Ngai ũtuĩte, na gũtirĩ ũndũ ũngĩ aheana.

Gĩcunjĩ 20.

Naake Zofaru ũrĩa Mũnaamathi agĩcookia atĩrĩ: “Gĩkĩ nĩkĩo gĩtũmaga meciiria makwa marĩa matangĩku maningĩrĩrie njookie, nĩ ũndũ wa kĩrigiicano kĩrĩa kĩrĩ thĩinĩ wakwa. Nĩnjiguaga irũithia rĩrĩa rĩĩnjonorithagia, na kuuma ũmenyoinĩ wakwa roho ũkaanĩngĩrĩria njookie. Ti-itherũ nĩũĩ ũrĩa gũtũire kuuma o tene, kuuma rĩrĩa mũndũ aigirwo gũkũ thĩ: gũtũũgĩra kwa mũndũ mwaganu nĩ gwa ihinda inini, nakĩo gĩkeno kĩa ũrĩa ũtarĩ na Ngai gĩtũũraga o kahinda kanini. O na mwĩtĩĩo wake ũngĩkinya igũrũ, na mũtwe wake ũhutie matu, nĩagaathira nginya tene, o ta mai make mwene; nao arĩa maamuonete makaũria atĩrĩ, ‘Arĩ ha?’ Akoombũka ta kĩrooto, ndagacooka kuoneka, aingatwo ta kĩoneki kĩa ũtukũ. Riitho rĩrĩa rĩaamuonire rĩtikamuona rĩngĩ; nakĩo gĩikaro gĩake gĩtikamũrora rĩngĩ. Ciana ciake igaathaithana kũrĩ athĩĩni; namo mooko make mwene no mũhaka macookie ũtonga wake. Hinya wa wĩthĩ ũrĩa ũiyũrĩte mahĩndĩ make ũgaakoma hamwe nake rũkũngũinĩ. O na gũtuĩka ũũru nĩ mũrĩo kanuainĩ gake na akaũhitha rungu rwa rũrĩmĩ rwake, o na gũtuĩka ndangĩenda kũũrekia, agaũiga kanuainĩ gake, no irio ciake ikaagarũrũka igatuĩka cũrũ ndainĩ yake; igatuĩka thumu wa nyoka thĩinĩ wake. Nĩameretie ũtonga no nĩagaũtahĩka; Ngai nĩakaũruta kuuma ndainĩ yake. Akoonga thumu wa nyoka; namo magego ma nyoka nĩmamũũragaga. Ndarĩ hĩndĩ akoona tũrũũĩ, njũũĩ iria ithereraga ũũkĩ na iria. No mũhaka acookie maciaro ma wĩra wake atamamerete; ndagakenera uumithio wa wonjoria wake. Nĩgũkorwo nĩahinyĩrĩirie athĩĩni na akĩmaatiga; nĩatunyanire nyũmba ĩrĩa ataakire. Tondũ nda yake ndĩarĩ na thaayũ, ndakahonoka hamwe na indo iria eeriragĩria. Gũtirĩ kĩndũ gĩatigaire akĩrĩe; nĩ ũndũ ũcio ũgaacĩru wake ndũgatũũra. Hĩndĩ ĩrĩa aiyũrĩirwo nĩ indo nyingĩ, mĩnyamaro ĩkaamũkinyĩra; naguo ũritũ wothe wa thĩĩna ũkaamũkora. Rĩrĩa akaaiyũria nda yake, Ngai nĩakamũrekereria marakara make mahiũ, na aamuurĩrie mo ta irio ciake. O na angĩũrĩra indo ya mbaara ya kĩgera, mũguĩ wa gĩcango nĩũkamũtheeca ũmũtũrĩkanie. Aũcomora, naguo ũkoima mwĩrĩinĩ wake; mũthia waguo ũkũhenia ũkoima ndũrũinĩ yake. Imakania ikamũkora. Nduma nene nĩĩhithĩire igĩĩna ciake; mwaki ũtaakĩirwo nĩ mũndũ nĩũkamũcina, na ũniine kĩrĩa gĩothe gĩtigaire hemainĩ yake. Igũrũ nĩrĩkaguũria wĩhia wake, nayo thĩ ĩmũũkĩrĩre. Ũtonga wothe wa nyũmba yake nĩũgakuuo, ũhaataganio mũthenya wa marakara ma Ngai. Gĩkĩ nĩkĩo gĩcunjĩ kĩa mũndũ mwaganu kuuma kũrĩ Ngai, igai rĩrĩa aathĩĩrĩirwo nĩ Ngai.”