Zopharna Latluida Ngahānkai
Zopharna akhalattawui ningrākhaiwui eina ngahānkai, kala makaphā mina atam kateokha mathānki kaji hānga: ana lan mayuisanglala maloshokluiya, makaphā chi amaleli kazipda phara̱wui hu ngasāhaowa. Hi Varena kahaimi yarna da ana hānga, kala khangatei khikha mamimana.
20 1Chiwui thili Naamathwui Zopharna ngahānkai: 2"Iwui aphunli leiwui kachikchikwui vang, chiwui vangmi iwui khamai kachikchik eina ili ngahānkā khavai kasatmi. 3Ili ngakaikashe khamachin akha ina shā, kala iwui theishingkakhuiwui eina manglā akhana ili ngahānkā khavai kasatmi. 4Mi okathuili haisai eina thuida, achālakhawui eina kathada shokkahai kaji nana kachangkhat eina thei: 5makhayābingwui khamathānkhon kasha̱khawui vangmānga, kala vare makathei miwui mai hunkhawui vangmānga. 6Awui langkaso kazingram tangda kālala, kala awui kui muiyāli saza̱lala, 7awui apai thāda ana katang makhavai shimānhaora; ali theikahaibingna, ‘Ana kali leikhala?’ da hāngra. 8Ana mang thāda yongthuihaora, matheiluimara, kala ngayā mahākhami thāda kashamshokhaora. 9Ali theikahai mikna ali matheiluimara; awui pamna ali mayangluimara. 10Awui naongarāna kachāmabingli pora; awui pāng eina awui lan latung ngasakphalungra. 11Awui ara̱-ara̱li chipem yaron ngalāwui pangshapna ali khangarum chifali pisangra. 12Makaphā awui khamorli shimlala, kala awui malezingli chi ngathumlala, 13chi horhaikhavai maninglala, kala awui khamorli chi mayonlala, 14Kha awui kashakazā awuklungli kathur ngasāra; awui lungli phara̱yurwui hu ngasāra. 15Ana lan shaihaowa kha chi longra; Varena awukwui alungwui eina chi kashamshokhaora. 16Ana phara̱yurwui hu mangra; chaoshaiwui hārana ali sāthatra. 17Ana khuira̱ eina seina̱khan khalonga kongrābing chi mayangluimara. 18Ana awui ngalangkazārwui athei chi mayuisang maleila hanmiphalungra; awui leihkhayorwui tongkazā chi maringphākhuimara. 19Kaja ana kachāma mibingli akha̱ sāmihaida horhaowa; ana masākahai shim chi tukkhuihaowa. 20Kaja awui wuk chingri matheikahaiwui vang, ana awui ningkachāng lan chi eina mayāmshokrarmara. 21Awui tukshai khavai khikha mathāhaimara; chiwui vang eina awui mataikasang manganingchingmara. 22Awui kashap pemtinghai atamli, sipkasā ali ngaphankhuira; kachotkachāng kharit saikorana awuitungli rāshungra. 23Ana awui wuk chipemmi tharan, Varena awuitungli awui malungkhavāt chitheira, kala chi awui kashakazā sāda awuitungli rotā ngasakra. 24Ana mariwui zeighaiwui eina yāmhailala, pithraiwui malāna ali zangthuira. 25Ana chi khuithuihaiakha, chi awui phasāwui eina thānshokra; phikphik kahai amato china awui athiwui eina thānshokra. Khangachee awuitungli rāshungra. 26Tangkhamang katongana awui lan chi rimkapama; khipānakha masākakā meina ali chuira, kala awui shimkhurli thākahai saikora chi chuiserra. 27Kazingramna awui khayonkhamāng theingasakra, kala okathuina awuitungli thuingarara. 28Awui shimwui lan saikora khuivāhaora, kala Varewui malungkhavāt zimiksholi khuithuihaora. 29Varewuili hi makhayā miwui yarna, kala Varena ali kapangkhui shimluikatna."
